ដោយៈម៉ាណេត
អន្តរជាតិៈ ក្រុមហ៊ុន Berkshire Hathaway Inc របស់មហាសេដ្ឋី Warren Buffett បានទិញភាគហ៊ុនចំនួន ៥ភាគរយ នៅក្នុងក្រុមហ៊ុនពាណិជ្ជកម្មឈានមុខគេ របស់ជប៉ុនចំនួន៥ ។ នេះបើយោងតាមសេចក្តីថ្លែងការណ៍របស់ក្រុមហ៊ុកាលពីដើមសប្តាស៍នេះ។
ក្រុមហ៊ុន Berkshire បានឱ្យដឹងថា ភាគហ៊ុនទាំងនោះមានតម្លៃជាង៦ពាន់លានដុល្លារ និងត្រូវបានទិញក្នុងរយៈពេលប្រមាណមួយឆ្នាំ តាមរយៈការទិញទៀងទាត់នៅផ្សារហ៊ុនតូក្យូ។ នេះបើយោងតាមទីភ្នាក់ងារព័ត៌មាន Bloomberg ។
ភាគហ៊ុនទាំងនោះ ស្ថិតនៅក្នុងក្រុមហ៊ុន Itochu Corp ក្រុមហ៊ុន Marubeni Corp ក្រុមហ៊ុន Mitsubishi Corp ក្រុមហ៊ុន Mitsui & Co និងក្រុមហ៊ុន Sumitomo Corp ។ ក្រុមហ៊ុន Berkshire បានឱ្យដឹងថា ខ្លួនមានគម្រោងនឹងរក្សាការវិនិយោគរបស់ជប៉ុន ក្នុងរយៈពេលវែង។
ក្រុមហ៊ុន Berkshire បានឱ្យដឹងទៀតថា ខ្លួនអាចបង្កើនការកាន់កាប់របស់ខ្លួនរហូតដល់៩,៩ភាគរយ នៅក្នុងក្រុមហ៊ុនណាមួយ ក្នុងចំណោមក្រុមហ៊ុនទាំង៥ ។ ក្រុមហ៊ុនបានបន្ថែមថា វានឹងមិនលើសពីការគ្រប់គ្រងនោះទេ លើកលែងតែមានការយល់ព្រមជាក់លាក់ពីក្រុមប្រឹក្សាភិបាលរបស់វិនិយោគិន។
ទស្សនាវដ្តី Forbes បានរាយការណ៍ថា ក្រុមហ៊ុន Berkshire Hathaway គឺជាក្រុមហ៊ុនកាន់កាប់ដោយលោក Buffett ដែលត្រូវបានចាត់ទុកថា ជាវិនិយោគិនម្នាក់ក្នុងចំណោមវិនិយោគិនល្បីបំផុតក្នុងពិភពលោក និងមានទ្រព្យសម្បត្តិចំនួន ៧២ពាន់លានដុល្លារ និងជាមហាសេដ្ឋីមានទ្រព្យសម្បត្តិច្រើនជាងគេបំផុតលំដាប់ទី៤ របស់ពិភពលោក។
ប៉ុន្តែទោះបីជាយ៉ាងណា ក៏លោកបានជួបការលំបាកអំឡុងជំងឺកូវីដ-១៩ ជាពិសេសលើការវិនិយោគក្នុងឧស្សាហកម្មអាកាសចរណ៍។
នៅក្នុងសេចក្តីថ្លែងការណ៍នោះ លោក Buffett បាននិយាយថា លោកពិតជារីករាយដែលបានចូលរួម នៅក្នុងក្រុមហ៊ុនជប៉ុន ហើយលោកសង្ឃឹមថាវានឹងមាន “ឱកាសនៃផលប្រយោជន៍ទៅវិញទៅមក” ៕ AFP
