ដោយៈសុវណ្ណារ៉ា
ព្រះសីហនុៈក្រុមហ៊ុនអភិវឌ្ឍន៍បានឲ្យដឹងថា គម្រោងអភិវឌ្ឍក្រុងថ្មីនៃតំបន់ឆ្នេររាម ខេត្តព្រះសីហនុ ដែលគ្រោងបោះទុនវិនិយោគសរុបរហូតដល់១០០០លានដុល្លារ នឹងគ្រោងផ្ដើមបើកការដ្ឋានសាងសង់ ក្នុងជំហានដំបូងនៅពេលឆាប់ៗខាងនេះ។
យោងតាមសេចក្តីប្រកាសព៌តមានរបស់ក្រុមហ៊ុន Furi Cooperation ដែលជាអ្នកអភិវឌ្ឍន៍គំរោងនេះបានឲ្យដឹងកាលពីថ្ងៃទី១ កញ្ញាកន្លងមកថា គម្រោងអភិវឌ្ឍន៍ទីក្រុងរាម CRYSTAL VILLE REAM BEACH ដែលមានការអភិវឌ្ឍចំរុះ ដូចជាបណ្តុំលំនៅដ្ឋានប្រភេទវីឡា កម្រិតអភិជន មជ្ឈមណ្ឌលពាណិជ្ជកម្ម ផ្សារទំនើប និងសណ្ឋាគារផ្កាយ៥ រួមនឹងតំបន់កម្សាន្តជាច្រើនទៀត ក្រោមការវិនិយោគរួមគ្នារវាងក្រុមហ៊ុនក្នុងស្រុក និងក្រុមហ៊ុនដ៏ធំមកពីសឹង្ហបូរីនេះកំពុងដំណើរការទៅមុខយ៉ាងរលូន។
លោកស្រីលឹម សុខាដាវីន នាយិកាគ្រប់គ្រងផ្នែកលក់គម្រោងអភិវឌ្ឍន៍ទីក្រុងរាម CRYSTAL VILLE REAM BEACH បានមានប្រសាសន៍ឲ្យដឹងថា ការអភិវឌ្ឍទីក្រុងស៊ីវិល័យដ៏ធំមួយនេះ នឹងត្រូវបានបែងចែកជាដំណាក់កាល និងតំបន់ផ្សេងគ្នាជាច្រើន ដែលក្នុងនោះរួមមានដូចជា លំនៅដ្ឋានលំហែរកាយបែបវីឡាកម្រិតអភិជន (៣ប្រភេទផ្សេងគ្នា) សណ្ឋាគារអន្តរជាតិលំដាប់ផ្កាយ៥ ផ្សារទំនើប ក្លឹបលើឆ្នេរសមុទ្រ រួមជាមួយនឹងអាងហែលទឹកសមុទ្រសិប្បនិម្មិត CRYSTAL LAGOON ដ៏ធំនៅចំកណ្តាលគម្រោងអភិវឌ្ឍន៍ ដែលមានទំហំរហូតដល់៦ហិកតា។
លោកស្រីបន្តថា នៅក្នុងគំរោងនេះ មានរួមបញ្ចូលនូវលំនៅដ្ឋានបែបវីឡាទាំង៣ប្រភេទ ដែលស្ថិតនៅក្នុងគម្រោងអភិវឌ្ឍន៍ដ៏ធំ និងលើកដំបូងនៅក្រុងរាមមួយនេះ គឺសុទ្ធតែមានលក្ខណៈខុសប្លែកពីគម្រោងទូទៅ ដោយសារតែក្រុមហ៊ុនវិនិយោគ និងអភិវ ឌ្ឍន៍ផ្តោតសំខាន់ទៅលើភាពច្នៃប្រឌិត បង្កើតសោភ័ណភាពស្រស់ស្អាត និងប្រណីតភាព ស័ក្ដិសមទៅនឹងប្រភេទវីឡាស្នាក់នៅ បែបលំហែរកាយនៅតំបន់ឆ្នេរសមុទ្រជិតឧទ្យានជាតិរាម ខេត្តព្រះសីហនុ។
លោកស្រីបន្តថា នៅគ្រប់វីឡាទាំងអស់ សុទ្ធតែមានអាងហែកទឹកនៅពីមុខ ត្រូវតាមក្បួនហុងស៊ុយជនជាតិចិន មានកន្លែងអង្គុយសម្រាកលេង ឬដេកហាលកំដៅថ្ងៃនាតំបន់សមុទ្រ មានតំបន់ម្លប់ឈើបៃតងនៅព័ទ្ធជុំវិញ ហើយនៅលើដំបូលក៏មានកន្លែងអង្គុយលេង ឬទទួលទានអាហារលក្ខណៈគ្រួសារផងដែរ។
ការអភិវឌ្ឍគំរោង CRYSTAL VILLE REAM BEACH ស្ថិតនៅតំបន់ដែលពោរពេញ ទៅដោយសម្រស់ធម្មជាតិយ៉ាងស្រស់ត្រកាល ដោយនៅពីក្រោយគម្រោងមានជួរភ្នំដ៏ខ្ពស់ និងវែងអន្លាយ នៅពីគម្រោងជាប់ជាមួយនឹងបឹងកោងកាង នៅចំពីមុខគម្រោងជាឆ្នេរសមុទ្រដ៏ស្រស់ស្អាត ភ្ជាប់ជាមួយនឹងមហាវិថីឆ្នេររាម ដែលមានទំហំ៥០ម៉ែត្រ តភ្ជាប់ទៅកាន់ឆ្នេរអូរត្រេះ៕