ដោយ ហ្សូលី
ភ្នំពេញៈ អ្នកជំនាញអចលនទ្រព្យអន្តរជាតិនៅតែបង្ហាញសុទិដ្ឋិនិយមថា វិស័យអចលនទ្រព្យនៅតាមបណ្តាខេត្ត ក្រុងនៅទូទាំងកម្ពុជា កំពុងរីកលូតលាស់ទៅមុខឥតឈប់ឈរ ហើយការវិនិយោគអចលនទ្រព្យនៅទីក្រុងភ្នំពេញ នៅតែបន្តទទួលបានផលចំណេញខ្ពស់ពីការវិនិយោគ ធៀបនឹងបណ្តាប្រទេសនានាក្នុងតំបន់ ។
ការសិក្សាអន្តរជាតិមួយបានបង្ហាញថា ទីក្រុងភ្នំពេញនៅតែស្ថិតឈរនៅលំដាប់ទី១ ក្នុងចំណោមទីក្រុងដទៃទៀតក្នុងតំបន់អាស៊ាន ជាទីក្រុងដែលទទួលបានផលចំណេញខ្ពស់ពីការវិនិយោគអចលនវត្ថុ។
មានកត្តាជាច្រើន ដែលជម្រុញឱ្យទីក្រុងភ្នំពេញជាទីក្រុងល្អជាងគេ បើទោះបីជាប្រទេសកំពុងជួបប្រទះវិបត្តិជំងឺសាកលក៏ដោយ។ វិស័យខុនដូ បុរីលំនៅដ្ឋាន អាផាតម៉ិន អគារពាណិជ្ជកម្ម និងដីធ្លី នៅក្នុងទិក្រុងភ្នំពេញ សុទ្ធសឹងតែមានគម្រោងអភិវឌ្ឍ និងចរន្តទិញលក់ឥតឈប់ឈរ។
ប្រធានក្រុមហ៊ុន Knight Frank ប្រចាំប្រទេសកម្ពុជាលោក Ross Wheble បានថ្លែងប្រាប់សារព័ត៌មានអន្តរជាតិសារជាថ្មីថា វិស័យអចលនទ្រព្យនៅទីក្រុងភ្នំពេញ មានភាពរីកចម្រើន ហើយតំបន់សំខាន់ៗមួយចំនួន សុទ្ធតែមានសក្តានុពល សម្រាប់អភិវឌ្ឍគម្រោងអចលនទ្រព្យ និងទទួលបានផលចំណេញខ្ពស់។
ជាមួយគ្នានឹងសក្តានុពលនៃខណ្ឌនិមួយៗ ក្នុងទីក្រុងភ្នំពេញ មានលក្ខណៈពិសេសរៀងខ្លួនៗ ដូចជា ខណ្ឌបឹងកេងកង ជាបណ្តុំគម្រោងខុនដូ អគារពាណិជ្ជកម្មផ្សារទំនើប រីឯខណ្ឌសែនសុខ ពោរពេញដោយបុរី លំនៅដ្ឋាន។ ចំណែកខណ្ឌទួលគោកមានអគារការិយាល័យជាដើម។ លើសពីនេះ ខណ្ឌផ្សេងៗទៀតដែលស្ថិតក្នុងទីក្រុងភ្នំពេញ បានរីកចម្រើនជាបន្តបន្ទាប់ ស្របតាមផែនការនិងស្ថានភាពសេដ្ឋកិច្ចប្រទេស។
អ្នកវិនិយោគមកពីហុងកុង ចិនដីគោក និងក្នុងតំបន់ មានការចាប់អារម្មណ៍ជាច្រើនក្នុងវិស័យលំនៅដ្ឋានក្នុងទីក្រុងភ្នំពេញ។
ក្រុមហ៊ុនអចលនទ្រព្យអន្តរជាតិ CBRE នៅតែព្យាករណ៍ថា ការផ្គត់ផ្គង់ខុនដូនៅឆ្នាំនេះនឹងកើនឡើង៣៤ភាគរយ។
លោក Jame Hodge អនុប្រធានក្រុមហ៊ុន CBRE ប្រចាំនៅកម្ពុជា បានលើកឡើងថា រាជធានីភ្នំពេញជាមូលដ្ឋានគ្រឹះដ៏សំខាន់ ក្នុងការធ្វើដំណើរវែងឆ្ងាយទៅមុខ ដោយពុំមានបញ្ហាអ្វីកើតឡើងច្រើននោះទេ ដែលបណ្តាលឲ្យអ្នកវិនិយោគ ក្នុងវិស័យអចលនទ្រព្យទទួលបានផលច្រើន និងយូរអង្វែង។
តម្រូវការអចលនទ្រព្យ ពីសំណាក់ប្រជាពលរដ្ឋខ្មែរ មានការកើនឡើងខ្ពស់ រីឯច្បាប់វិនិយោគនៅក្នុងប្រទេសកម្ពុជា មានភាពងាយស្រួលដល់អ្នកវិនិយោគិនបរទេស ធ្វើឲ្យវិស័យអចលនទ្រព្យ កើនឡើជាលំដាប់រហូតមកដល់ពេលនេះ បណ្តាលឲ្យអ្នកវិយោគទទួលបានផលច្រើនជាងប្រទេសដទៃក្នុងតំបន់អាស៊ាន៕
