ដោយ ហ្សូលី
សេអ៊ូលៈ រដ្ឋាភិបាលកូរ៉េខាងត្បូង ត្រៀមបញ្ចេញកញ្ចប់ថវិកាសម្រាប់ស្តារសេដ្ឋកិច្ចប្រទេសជាលើកទី៤ បន្ទាប់ពីជំងឺ Covid-19 ផ្ទុះឡើងសារជាថ្មី។
រដ្ឋមន្ត្រីក្រសួងហិរញ្ញវត្ថុ លោក ហុង ណាំគឺ បានមានប្រសាសន៍នៅក្នុងកិច្ចប្រជុំស្តីពីសំណើថវិកានៅឆ្នាំក្រោយ ជាមួយអ្នកយកព័ត៌មានថា កូរ៉េខាងត្បូងកំពុងពិនិត្យមើលសេចក្តីព្រាងច្បាប់នេះ ឱ្យបានល្អិតល្អន់ ខណៈពេលដែលចំនួនឆ្លង ក្នុងប្រទេសកើនឡើងយ៉ាងឆាប់រហ័ស។
កាលពីខែកក្កដារដ្ឋសភា បានអនុម័តថវិកាបន្ថែមលើកទី៣ ដែលមានទឹកប្រាក់ចំនួន៣៥,១ពាន់ពាន់លានវ៉ុន (២៩.៥ ពាន់លានដុល្លារ) ដើម្បីកាត់បន្ថយការថយចុះសេដ្ឋកិច្ចនៃការរីករាលដាលនៃជំងឺឆ្លងនេះ។
សេដ្ឋកិច្ចរបស់ប្រទេសកូរ៉េខាងត្បូង បានធ្លាក់ចុះ៣,៣ភាគរយ នៅក្នុងត្រីមាសទី ២ ពីមួយត្រីមាសមុនដែលជាកំណើនទាបបំផុត គិតចាប់តាំងពីត្រីមាសទី១ ឆ្នាំ១៩៩៨ នៅពេលដែលវាបានធ្លាក់ចុះ ៦,៨ ភាគរយ។
អង្គការសហប្រតិបត្តិការ និងអភិវឌ្ឍន៍សេដ្ឋកិច្ចថ្មីៗនេះបានព្យាករណ៍ថា សេដ្ឋកិច្ចរបស់ប្រទេសកូរ៉េខាងត្បូង នឹងធ្លាក់ចុះ០,៨ ភាគរយនៅឆ្នាំ២០២០ ធៀបនឹងឆ្នាំមុន។
ជាមួយនឹងការឆ្លងវីរុសប្រចាំថ្ងៃកើនឡើងដល់៣ខ្ទង់ ប្រទេសកូរ៉េខាងត្បូងបានបង្កើនការទប់ស្កាត់វីរុសដល់កម្រិតទី២ នៅក្នុងប្រព័ន្ធដោយដាក់ច្បាប់ហាមឃាត់ ការប្រជុំចំនួន៥០នាក់ឬច្រើនជាងនេះ។ បន្ទាប់ពីចំនួននៅតែច្រើនឡើង ការអនុវត្តវិធានកម្រិតទី ៣ ដែលក្នុងនោះការប្រមូលផ្តុំមនុស្ស១០នាក់ ឬច្រើនជាងនេះនៅសាលារៀន និងព្រឹត្តិការណ៍កីឡាត្រូវហាមឃាត់។
លោករដ្ឋមន្ត្រីបាននិយាយថា “ប្រសិនបើវិធានការផ្លាស់ប្តូរសង្គម ត្រូវបានបង្កើនដល់កម្រិតទី៣ ផលប៉ះពាល់សេដ្ឋកិច្ចរបស់វានឹងកាន់តែធ្ងន់ធ្ងរ” ៕
