ដោយៈ វណ្ណារ៉ា
ភ្នំពេញៈ ស្របពេលវិបត្តិសេដ្ឋកិច្ចកំពុងកើតឡើង ទីផ្សារអាផាតម៉ិនកំពុងធ្លាក់ចុះនូវតម្រូវការ ខណៈការផ្គត់ផ្គង់អាផាតម៉ិនបន្តកើនឡើង នៅក្នុងទីផ្សារដែលទើបរីកចម្រើននេះ។
ស្ថាបនិកក្លឹបអ្នកវិនិយោគអចលនទ្រព្យកម្ពុជា លោកសៅ សាខុំ បានមានប្រសាសន៍តាមទូរស័ព្ទកាលពីល្ងាចថ្ងៃទី២៥ ខែសីហា ឆ្នាំ២០២០កន្លងមកថា ទីផ្សារអាផាតម៉ិននាពេលបច្ចុប្បន្ន បើទោះជាស្ថិតនៅក្នុងស្ថានភាពប្រឈមនឹងវិបត្តិជំងឺ Covid-19 ក៏នៅតែអាចរក្សាបាននូវភាពល្អប្រសើរ បើធៀបទៅនឹងផ្នែកដទៃទៀត នៃវិស័យអចលនទ្រព្យនៅកម្ពុជា។
លោកបានបន្តថា “ទីផ្សារជួលអាផាតម៉ិន នៅតែបន្តរក្សាបានស្ថានភាពល្អប្រសើរ ហាក់មិនសូវរងនូវផលប៉ះពាល់នោះទេ ផ្ទុយទៅវិញនៅចុងឆ្នាំ២០២០នេះ វត្តមាននៃអគារអាផាតម៉ិនថ្មីមួយចំនួនទៀត នឹងត្រូវបានដាក់បញ្ចូលទៅក្នុងទីផ្សារបន្ថែមទៀត។ លោកបញ្ជាក់ថា “បច្ចុប្បន្ននេះ តាមខ្ញុំដឹងអគារអាផាតម៉ិន នៅទូទាំងរាជធានីភ្នំពេញ មានជាង៤០០អគារ និងត្រូវបានបែងចែកជា៣កម្រិត រួមមានកម្រិតA កម្រិត Bនិងកម្រិត C ហើយតម្លៃទីផ្សារជួល ក៏មានការប្រែប្រួលទៅតាមប្រភេទអគារ ទីតាំង ទំហំ សម្ភារៈដែលបំពាក់នៅក្នុងយូនីត និងសេវាកម្មដែលម្ចាស់អគាររៀបចំ និងផ្តល់ជូនជាកញ្ចប់” ។
តំបន់ដែលប្រមូលផ្តុំ ទៅដោយវត្តមានអគារអាផាតម៉ិនច្រើនជាងគេ នៅក្នុងរាជធានីភ្នំពេញ ត្រូវបានគេកត់សម្គាល់ឃើញថា ស្ថិតនៅក្នុងតំបន់ទួលទំពូង បន្ទាប់មកតំបន់បឹងកេងកង ខណ្ឌទួលគោក និងខណ្ឌដូនពេញ។
ហេតុផលដែលធ្វើឱ្យតំបន់ទួលទំពូង មានប្រជាប្រិយភាពក្នុងការវិនិយោគអាផាតមិនច្រើនជាងគេ ត្រូវបានលោក សៅ សាខុំ បញ្ជាក់ថា “ទួលទំពូង ជាតំបន់ដែលប្រមូលផ្តុំទៅដោយអាគារពាណិជ្ជកម្ម និងស្ថាប័នឯកជនច្រើនមិនចាញ់ តំបន់បឹងកេងកងប៉ុន្មាននោះទេ ប៉ុន្តែបើនិយាយពីតម្លៃដី គឺទាបជាងតំបន់បឹងកេងកងជិតពាក់កណ្តាល” ។
ដីនៅបឹងកេងកង ដែលស័ក្ដិសមនឹងសំណង់អគារអាផាតម៉ិន មានតម្លៃប្រមាណជាង៥០០០ដុល្លារ ក្នុងមួយម៉ែត្រការ៉េ ប៉ុន្តែនៅទួលទំពូងអាចស្ថិតនៅក្នុងចន្លោះត្រឹមជាង ២៥០០-៣០០០ដុល្លារក្នុងមួយម៉ែត្រការ៉េ ដូច្នេះវាជាបានក្លាយជាជម្រើសល្អរបស់អ្នកវិនិយោគ។
ជាមួយនឹងការបញ្ជាក់ពីស្ថានភាព នៃតម្រូវការទីផ្សារជួលនៅពេលបច្ចុប្បន្ននេះ លោកសៅ សាខុំ ក៏បានបង្ហាញពីភាពជឿជាក់ថា ទីផ្សារនៃការជួលវិស័យក្នុងផ្នែកនេះ នឹងមានការកើនឡើងនៅដើមឆ្នាំ២០២១ ជាពិសេសក្រោយពេលវិបត្តិ នៃជំងឺឆ្លងត្រូវបានស្ងប់ស្ងាត់ និងត្រូវបានទប់ស្កាត់បានជាស្ថាពរ៕
