ដោយ៖ ម៉ាណេត
ភ្នំពេញ៖ កម្ពុជារកចំណូលបាន ១,៣ ពាន់លានដុល្លារ ពីការនាំចេញគ្រឿងអលង្ការ និងត្បូងមានតម្លៃទៅកាន់ទីផ្សារអន្តរជាតិក្នុងរយៈពេល ៦ ខែដំបូងនៃឆ្នាំនេះ កើនឡើងគួរឱ្យកត់សម្គាល់ពីជាង ៤១៥ លានដុល្លារកាលពីឆ្នាំមុន។ នេះបើយោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា។
របាយការណ៍បាននិយាយថា កម្ពុជាបាននាំចេញគ្រឿងអលង្ការ និងត្បូងមានតម្លៃ ២៥.៥៦៣ ឯកតា (យូនីត) ដែលមានទម្ងន់សរុប ៣៦.៨០៣ គីឡូក្រាមក្នុងរយៈពេល៦ខែដំបូងឆ្នាំ២០២០នេះ។
ការនាំចេញគ្រឿងអលង្ការ និងត្បូងមានតម្លៃសរុបកាលពីឆ្នាំមុនមានតម្លៃ ៤១៥,៧៥ លានដុល្លារ ស្មើនឹង ១៩ ៨៨០ គីឡូក្រាម ឬ ៤៧ ០៧១ ឯកតា។
ក្នុងរយៈពេល ៦ ខែដើមឆ្នាំនេះ កម្ពុជាក៏បាននាំចូលគ្រឿងអលង្ការ និងត្បូងមានតម្លៃ មានតម្លៃប្រមាណ ៣៨៣,៣២ លានដុល្លារ ស្មើនឹង ២៨ ៨៤៤ គីឡូក្រាម ឬ ៦៤០,២២២ ឯកតា។ ក្នុងឆ្នាំ ២០១៩ ទាំងមូលតម្លៃនាំចូលមានចំនួន ១៤៩.៥៧ លានដុល្លារ ស្មើនឹង ៥៧.៦៣២ គីឡូក្រាម ឬ ១.០៤៣.៧២៧ ឯកតា។
ប្រទេសសឹង្ហបុរីគឺជាទីផ្សារនាំចេញធំជាងគេរបស់ប្រទេសកម្ពុជា បន្ទាប់មកគឺប្រទេសថៃ វៀតណាម ប៊ែលហ្សិក ជប៉ុន អ៊ីតាលី និងចិន។
ប្រទេសថៃ សឹង្ហបុរី កាណាដា ប៊ែលហ្សិក និងហុងកុងគឺជាទីផ្សារនាំចូលធំជាងគេរបស់ប្រទេសកម្ពុជា។ នេះបើយោងតាមក្រសួងពាណិជ្ជកម្មកម្ពុជា។
បច្ចុប្បន្ននេះ ក្រុមហ៊ុនរុករករ៉ែមាសធំៗ ចំនួន២ កំពុងប្រតិបត្តិការនៅកម្ពុជា រួមមានក្រុមហ៊ុនរុករករ៉ែមាសដែលមានមូលដ្ឋាននៅប្រទេសឥណ្ឌា Mesco Gold ។
ក្រុមហ៊ុន Mesco Gold ទទួលបានអាជ្ញាប័ណ្ណធ្វើប្រតិបត្តិការនៅខេត្តរតនគិរី ក្នុងការរ៉ុករករ៉ែមាសនៅចុងឆ្នាំនេះ។
ក្រុមហ៊ុន Emerald Resources ដែលបានចុះបញ្ជីនៅអូស្រ្តាលី កំពុងអភិវឌ្ឍគម្រោងរ៉ែមាសអូក្វាវនៅក្នុងខេត្តមណ្ឌលគីរី ហើយគ្រោងនឹងទាញយករ៉ែមាសជាលើកដំបូងនៅត្រីមាសទី ២ ឆ្នាំ ២០២១៕
