ដោយ៖ ម៉ាណេត
ភ្នំពេញ៖ ក្រុមហ៊ុន អ អិម អេ (RMA) (ខេមបូឌា) ម.ក ទទួលបានចំណូលចំនួន ២១៧ ប៊ីលានរៀល នៅត្រីមាសទី២ ឆ្នាំ២០២០ ថយចុះមកត្រឹម ៤០,៩% បើប្រៀបធៀបទៅនឹងត្រីមាសទី២ ឆ្នាំ២០១៩ ដែលមានចំនួន ៣៦៦,៩ ប៊ីលាន រៀល។ នេះបើយោងតាមរបាយការណ៍របស់ក្រុមហ៊ុន ដែលបានដាក់ជូនផ្សារមូលបត្រកម្ពុជានៅថ្ងៃទី២៤ ខែសីហា ឆ្នាំ២០២០ ។
ប៉ុន្តែរបាយការណ៍ខាងលើ បានឱ្យដឹងថា ចំណូលក្នុងឆមាសទី១ ឆ្នាំ២០២០ មានចំនួន ៦៤៥,៩ ប៊ីលានរៀល (ជាង ១៦១លានដុល្លារ) ខ្ពស់ជាងឆមាសទី១ ឆ្នាំ ២០១៩ ដែលមានចំនួន ៦៤២ ប៊ីលានរៀល។ ការកើនឡើងនេះ បណ្តាលមកពីការទទួលបានចំណូលដ៏ខ្លាំងក្នុងត្រីមាសទី១ឆ្នាំ២០២០ ។
ទន្ទឹមនឹងនេះ ប្រាក់ចំណេញសម្រាប់ត្រីមាសទី២ ឆ្នាំ២០២០ ដែលមានចំនួន ១៨,៨ ប៊ីលានរៀល បានថយចុះចំនួន ៤៥,៥% បើប្រៀបធៀបទៅនឹងត្រីមាសទី២ ឆ្នាំ២០១៩ ដែលមានចំនួន ៣៤,៥ ប៊ីលានរៀល។ ប្រាក់ចំណេញនៅឆមាសទី១ ឆ្នាំ២០២០ មានចំនួន ៥៨,៤ ប៊ីលានរៀល ៣,៨% ទាបជាងប្រាក់ចំណេញនៅឆមាសទី១ ឆ្នាំ២០១៩ ដែលមានចំនួន ៦០,៧ ប៊ីលានរៀល។
ទ្រព្យសកម្មសរុបគិតត្រឹមថ្ងៃទី៣០ ខែមិថុនា ឆ្នាំ២០២០ មានចំនួន ៤០៨,៨ ប៊ីលានរៀល ១៦,៩% ទាបជាងទ្រព្យសកម្មសរុបគិតត្រឹមថ្ងៃទី៣១ ខែធ្នូ ឆ្នាំ២០១៩ ដែលមានចំនួន ៤៩១,៧ ប៊ីលានរៀល។
ម្យ៉ាងវិញទៀត បំណុលសរុបគិតត្រឹមថ្ងៃទី៣០ ខែមិថុនា ឆ្នាំ២០២០ មានចំនួន ២៤៧,៩ ប៊ីលានរៀល ៣៤% ទាបជាងបំណុលសរុបគិតត្រឹមថ្ងៃទី៣១ ខែធ្នូ ឆ្នាំ២០១៩ ដែលមានចំនួន ៣៧៥,៤ ប៊ីលានរៀល។
មូលធនរបស់ក្រុមហ៊ុននៅថ្ងៃទី៣០ ខែមិថុនា ឆ្នាំ២០២០ មានចំនួន ១៦០,៩ ប៊ីលានរៀល ដែលកើនឡើងចំនួន៤៤,៦ ប៊ីលានរៀលលើមូលធនក្រុមហ៊ុនចំនួន ១១៦,៣ ប៊ីលានរៀល គិតត្រឹមថ្ងៃទី៣១ ខែធ្នូ ឆ្នាំ២០១៩ ដែលនេះបានឆ្លុះបញ្ចាំងអំពីលទ្ធភាពចំណេញដ៏រឹងមាំ៕