ដោយគង់ ម៉ាលីន
ភ្នំពេញ៖ សកម្មភាពសាងសង់អាគារភ្លោះ ដែលជាមជ្ឈមណ្ឌលពាណិជ្ជកម្ម កប់ពពកលំដាប់ពិភពលោក Thai Bunrong Twin Tower មានសភាពស្ងប់ស្ងាត់ដូចចោរលួចសេះ ខណៈប្រភពព៌តមានច្បាស់ការណ៍បានឲ្យដឹងថា គំរោងនេះអាចនឹងលុបចោលនាពេលអនាគត។
លោកសាស្ត្រាចារ្យទួស សាភឿនដែលធ្លាប់អះអាងថា ស្ថាបត្យករចូលរួមគូប្លង់គំរោងនេះ និងជាមន្ត្រីជាន់ខ្ពស់នៃក្រុមហ៊ុន Thai Bunrong Group ដែលជាអ្នកអភិវឌ្ឍន៍គំរោងនេះមិនបានឆ្លើយតបសំណួរសុំការពន្យល់បានទេ។
លោកទួស សាភឿន ធ្លាប់បានឲ្យដឹងថា ក្រុមស្ថាបត្យករ និងវិស្វករលំដាប់ពិភពលោក ដែលធ្លាប់មានបទពិសោធន៍សាងសង់អាគារខ្ពស់ៗមកពីបួនប្រទេស កំពុងសិក្សាពីការសាងសង់អាគារនេះ។ លោកបន្តថា ក្រុមស្ថាបត្យករ និងវិស្វករចូលរួមគូរប្លង់អាគារភ្លោះកប់ពពកនេះមានមកពីប្រទេសបារាំង សហរដ្ឋអាមេរិក ប្រទេសចិន និងក្រុមស្ថាបត្យករ និងវិស្វករពោរពេញដោយជំនាញនិងបទពិសោធន៍កម្ពុជាជាច្រើនរូបផងដែរ។
លោកធ្លាប់បានមានប្រសាសន៍ឲ្យដឹងថា រហូតមកទល់ពេលនេះ ក្រុមអ្នកជំនាញនិងក្រុមហ៊ុន បានសម្រេចបន្ថែមកំពស់អាគារនេះ ដល់កំពស់៥៦៨ម៉ែត្រ និងបង្កើនទុនវិនិយោគផ្នែកសំណង់ រហូតដល់ជាង៣០០០លានដុល្លារអាមេរិក និងជាង៣០០០លានដុល្លារទៀត នឹងត្រូវប្រើប្រាស់ធ្វើឲ្យអាគារនេះដំណើរការដោយរសរវើក។
លោកធ្លាប់បានអះអាងប្រកបដោយមោទនភាពថា “ការសាងសង់មជ្ឈមណ្ឌលពាណិជ្ជកម្មពិភពលោកនេះ មិនមានការប្រែប្រួលទេ។ វានឹងជាមោទនភាព និងជាកិត្យានុភាពសម្រាប់កម្ពុជានៅលើពិភពលោក” ។ លោកបន្តថា “មិនមានប្រទេសទាំងអស់អាចមានសមត្ថភាពសាងសង់ទេ ជួនកាលពួកគេមានលុយ តែមិនប្រាកដថាអាចសាងសង់បាននោះឡើយ” ។
លោកបន្តថា “យើងកំពុងប្រឹងប្រែងធ្វើឲ្យអាគារនេះ មានភាពភាពអស្ចារ្យ មិនមែនរាប់បញ្ចូលអង់តែននោះទេ គឺកំពស់ជាង៥០០ម៉ែត្រនេះ ជាអាគារដែលអាចប្រើប្រាស់បានដល់ចំណុចកំពូល។
បញ្ហាវិបត្តិសេដ្ឋកិច្ចសាកល និងការចាប់ខ្លួនមហាសេដ្ឋីចិន ដែលជាអ្នកវិនិយោគគំរោងនេះនៅសហរដ្ឋអាមេរិក ទំនងជាហេតុផលពិតប្រាកដ នៅពីក្រោយការលុបចោលគំរោងដ៏មហិមានេះ៕
