ដោយស៊ីវ ម៉េង
ភ្នំពេញ៖ ស្របពេលទីផ្សារអចលនទ្រព្យ កាន់តែមានភាពប្រកួតប្រជែង ហើយការនាំចូល Franchise ក្រុមហ៊ុនធំៗចូលមកម្ពុជាកាន់តែច្រើន អ្នកជំនាញក្នុងវិស័យនេះបានលើកឡើងពីរលកថ្មីមួយក្នុងវិស័យនេះ ដោយអះអាងថា ក្រុមហ៊ុនធំៗនឹងលេបក្រុមហ៊ុនអចលនទ្រព្យតូចៗនាពេលអនាគត។
លោកឧកញ៉ាបណ្ឌិតគីម ហ៊ាង អគ្គនាយកក្រុមហ៊ុន KW Cambodia និង Khmer Real Estate បានមានប្រសាសន៍ឲ្យដឹថថា រយៈពេលបីឆ្នាំខាងមុខ ក្រុមហ៊ុនភ្នាក់ងារអចលនទ្រព្យតូចៗ ដែលមានបុគ្គលិកចន្លោះពី២០ ទៅ៣០នាក់នឹងស្លាប់ដោយខ្លួនឯង ប្រសិនជាពួកគេមិនជ្រកក្រោមស្លាក ឬទិញ Franchise ពីក្រុមហ៊ុនធំៗ ដើម្បីធ្វើប្រតិបត្តិការទេនោះ។
លោកបានលើកជាឧទាហរណ៍ថា នៅពេលអ្នកអភិវឌ្ឍន៍បុរី ឬខុនដូមួយ ត្រូវការក្រុមហ៊ុនមួយ ដែលដើរតួនាទីជាភ្នាក់ងារលក់គំរោងរបស់ពួកគេ ពួកគេនឹងជ្រើសរើសយកក្រុមហ៊ុនដែលមានបុគ្គលិក ឬអ្នកលក់២០០ទៅ៣០០នាក់ ពួកគេមិនរើសក្រុមហ៊ុនដែលមានភ្នាក់ងារលក់២០ទៅ៣០នាក់នោះទេ។
លោកគីម ហ៊ាងបានបន្តថា “នេះជានិន្នាការទីផ្សារសេរី អ្នកខ្លាំងរស់ អ្នកខ្សោយនឹងស្លាប់ដោយខ្លួនឯង ហេតុនេះជម្រើសល្អគឺក្រុមហ៊ុនតូចៗត្រូវរំលាយ ឬមកជ្រកក្រោមស្លាកក្រុមហ៊ុនធំ។
បច្ចុប្បន្នក្រុមហ៊ុនអចលនទ្រព្យ លំដាប់ពិភពលោកជាច្រើន បានចូលមកកាន់ទីផ្សារកម្ពុជា ដូចជា Century21 Cambodia, ERA, CBRE, Knight Frank, Keller William ជាដើម ដែលធ្វើឲ្យទីផ្សារនេះកាន់តែមានទំនុកចិត្ត ព្រមទាំងចរិកនៃការប្រកួតប្រជែងកើនឡើង។
លោកបណ្ឌិតគីម ហ៊ាងបានបន្តថា ក្រុមហ៊ុនអាមេរិកធំៗ មុនចូលមកកម្ពុជាពួកគេបានសិក្សាទីផ្សារ៤ទៅ៥ឆ្នាំមុន ទើបពួកគេសម្រេចចិត្តចូលមក ហេតុនេះនៅពេលពួកគេចូលមកដល់ មានន័យថាទីផ្សារនេះរៀបរយសម្រាប់ពួកគេរួចហើយ។
លោកបន្តថា “អ្នករកស៊ីអចលនទ្រព្យគ្មានអាជ្ញាប័ណ្ណ នឹងកាត់បន្ថយ ហើយពួកគេនឹងរត់មករកក្រុមហ៊ុន ដែលមានអាជ្ញាប័ណ្ណដោយខ្លួនឯង នៅពេលទីផ្សារកាន់តែមានទំនុកចិត្តជាមួយក្រុមហ៊ុនដែលមានអាជ្ញាប័ណ្ណ និងមានកេរ្ត៍ឈ្មោះល្បីនៅលើពិភពលោក” ៕
