ដោយ លក្ខិណា
ភ្នំពេញៈ សម្ដេចតេជោហ៊ុន សែននាយករដ្ឋមន្ត្រីនៃកម្ពុជា ជាបានអំពាវនាវជាថ្មីដល់បណ្ដាលគ្រឹះស្ថាន និងមីក្រូហិរញ្ញវត្ថុឯកជនទាំងអស់ មេត្តាយោគយល់ដល់ប្រជាពលរដ្ឋដែលបានខ្ចីប្រាក់ និងរងផលប៉ះពាល់ដោយសារតែជំងឺកូវីដ១៩ ក្នុងឆ្នាំ២០២០នេះ។
សម្ដេចតេជោប្រសាសន៍កាលពីចុងសប្តាហ៍មុនថា ដើម្បីជាការឆ្លើយតបនិងជាការព្រមាន ដល់អ្នកដែលធ្វើតាមមេឧទ្ទាមនៅក្រៅប្រទេស ដោយមិនព្រមសងលុយធនាគារ មិនព្រមសងលុយមីក្រូហិរញ្ញវត្ថុ សម្ដេចលើកទឹកចិត្តអោយរឹបអូស។ ធ្វើដូចនេះ ដើម្បីទប់ស្កាត់ភាពចលាចល នៅក្នុងប្រទេសពាក់ព័ន្ធជាមួយនឹងវិស័យធនាគារ។
សម្ដេចថា “មកដល់ពេលនេះ ខ្ញុំនៅតែអង្វរកដដែលដល់ធនាគារ និងមីក្រូហិរញ្ញវត្ថុ យោគយល់ចំពោះការលំបាក ក្នុងការសងប្រាក់ទៅកាន់ធនាគារ និងមីក្រូហិរញ្ញវត្ថុ ហើយក៏អំពាវនាវអោយមានការរៀបចំឥណទានឡើងវិញផងដែរ” ។
សម្ដេចតេជោក៏អំពាវនាវអោយគ្រឹះស្ថានមីក្រូហិរញ្ញវត្ថុ និងធនាគារពិនិត្យមើលនិងផ្ដល់កម្ចីដល់គ្រឹះស្ថានអប់រំឯកជន ក្នុងការទទួលបានឥណទាន ដើម្បីរៀបចំប្រព័ន្ធអប់រំ តាមអនឡាញខណៈខែក្រោយៗមាន សាលាខ្លះនឹងបើកសាកល្បងឡើងវិញខ្លះៗ ក៏ប៉ុន្តែមិនទាន់ដឹងថា តើអាចទៅរួចក្នុងកម្រិតណានៅឡើយទេ ។
បើតាមសមាគមមីក្រូហិរញ្ញវត្ថុកម្ពុជាបានឲ្យដឹងថា គិតត្រឹមថ្ងៃទី២ខែសីហា ឆ្នាំ២០២០ អតិថិជនរបស់គ្រឹះស្ថានមីក្រូហិរញ្ញវត្ថុនៅកម្ពុជា ជាង២៥ម៉ឺននាក់ស្មើប្រមាណ ៩០%នៃអ្នកបានដាក់ពាក្យស្នើសុំ បានទទួលការអនុញ្ញាតរៀបចំឥណទានឡើងវិញ ដែលមានទំហំឥណទានសរុបចំនួនជាង១.២៣២ លានដុល្លារអាមេរិក ។នេះមិនទាន់គិតពីទំហំនៃការផ្ដល់ឥណទានឡើងវិញ សម្រាប់វិស័យធនាគារនៅឡើយ ៕