ដោយៈស៊ីវ ម៉េង
ភ្នំពេញៈ បុរីនិងផ្សារទំនើបកៀនស្វាយផាក ដែលបានបោះទុនវិនិយោគជិត១០លានដុល្លារអាមេរិកនៅតែបន្តសាងសង់ និងឆ្ពោះទៅមុខ ទោះបីកម្ពុជាប្រឈមមុខនឹងវិបត្តិកូវីដ១៩ក្តី។
លោកឧកញ៉ានួន រិទ្ធី អគ្គនាយកបុរីកៀនស្វាយផាកបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៦ សីហាកន្លងមកថា ការសាងសង់បុរីនេះ ក្នុងដំណាក់កាលទី១បានបញ្ចប់ហើយ និងកំពុងសាងសង់ដំណាក់កាលទី២ សាងសង់បាន៥០ភាគរយ ខណៈដំណាក់កាលទី៣ នឹងសាងសង់នាពេលខាងមុខ។ លោកបន្តថា ដោយសារបញ្ហាជំងឺកូវីដ ការលក់លំនៅដ្ឋានក្នុងបុរីនេះ ហាក់មានភាពយឺតយ៉ាវបន្តិច ប៉ុន្តែការសាងសង់នៅតែបន្ត ដោយសារទំនុកចិត្តពីអតិថិជន។
លោកបន្តថា “ការសាងសង់ផ្សារទំនើបក្នុងបុរីនេះ នឹងចាប់ផ្តើមនៅឆ្នាំ២០២២ខាងមុខ ព្រោះតំបន់នេះមានសក្តានុពល នៅពេលផ្លូវក្រវ៉ាត់ក្រុងទី៣សាងសង់រួច និងបានតភ្ជាប់មកកានតំបន់នេះ”។ លោកបន្តថា “លំនៅដ្ឋានក្នុងបុរីកៀនស្វាយ ផាកមានតម្លៃចាប់ពីជាង៥០,០០០ ដល់ជាង៧៥,០០០ដុល្លារអាមេរិក ជាមួយនឹងការសាងសង់ ផ្តោតលើគុណភាពសំណង់ សោភ័ណភាព និងផ្តល់ផាសុខភាពដល់អ្នករស់នៅ”។
លោកឧកញ៉ានួន រិទ្ធី បានបន្តថា វិស័យអចលនទ្រព្យនៅកម្ពុជា នៅតែបន្តមានភាពរីកចម្រើន ពិសេសការទិញលក់ដីធ្លីបានបន្តកើនឡើង បើទោះជាផ្នែកផ្សេងទៀតក្នុងវិស័យនេះបានរងផលប៉ះពាល់ខ្លះក្តី ប៉ុន្តែវាមិនមានសភាពធ្ងន់ធ្ងរខ្លាំងនោះទេ ដោយសារតែកម្ពុជាមានមូលដ្ឋានច្បាប់ បទដ្ឋានគតិយុត្តិនានា ដែលទាក់ទាញការវិនិយោគពីអ្នកវិនិយោគជាតិ អន្តរជាតិ ពិសេសអ្នកវិនិយោគអន្តរជាតិ អាចបើកក្រុមហ៊ុនដោយមានទុន១០០ភាគរយ និងអាចទិញផ្ទះពីជាន់ទី១ជាដើម។
លោកឧកញ៉ាបានបន្តថា អ្នកមានបំណងចាប់អារម្មណ៍ទិញលំនៅដ្ឋាន ក្នុងបុរីកៀនស្វាយ ផាកស្ថិតនៅតំបន់ផ្លូវក្រវ៉ាត់ក្រុងទី៣ ដែលជាតំបន់មានការរីកចម្រើនលឿន និងអាចប្រកបអាជីវកម្មបានសូមទំនាក់ទំនងលេខទូរស័ព្ទ០១៧ ៧៩៦៦៣៣៕
