ដោយៈគង់ ម៉ាលីនណា
ភ្នំពេញៈ គម្រោងអភិវឌ្ឍន៍អគារពាណិជ្ជកម្មលំដាប់ពិភពលោក Thai Boon Roong Twin Towers កម្ពស់៥៦៧ម៉ែត្រ ស្មើនឹង១៣៣ជាន់ និងគ្រោងទុនវិនិយោគជាង៣០០០លានដុល្លារ បាននិងកំពុងត្រៀមខ្លួន ដើម្បីចាប់ផ្តើមសាងសង់នាពេលខាងមុខ។
លោកសាស្រ្តាចារ្យទួស សាភឿនប្រធានក្រុមវិស្វករ គ្រប់គ្រងគំរោងនេះបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៣ កក្កដានេះថា រហូតមកទល់ពេលនេះ ការសាងសង់ជញ្ជាំងទប់ដី ការងារគម្រោងប្លង់ និងការងារបច្ចេកទេសដទៃៗទៀតបានបញ្ចប់ហើយ នៅរង់ចាំតែពេលវេលាចាប់ផ្តើមសាងសង់ប៉ុណ្ណោះ។
លោកសាស្រ្តាចារ្យបានបន្តថា “រហូតមកទល់ពេលនេះ ខ្ញុំមិនទាន់អាចបញ្ជាក់ពីពេលវេលាបើកការដ្ឋាននៅឡើយទេ ព្រោះបញ្ហាកូវីដដែលធ្វើឲ្យយើងមិនអាចដឹកជញ្ជូនសម្ភារៈសាងសង់មកពីប្រទេសចិនបាន”។លោកបន្តថា “គំរោងនេះមិនជាប់គាំងទេ យើងនៅតែសាងសង់ ដោយមិនមានបញ្ហាទុនសំរាប់សាងសង់ទេ ព្រោះយើងបានរៀបចំរួចរាល់ហើយ”។
ទាក់ទងនឹងប្លង់ស្ថាបត្យកម្មរបស់អាគារកប់ពពកនេះ បានផ្លាស់ប្តូរឬយ៉ាងណា លោកសាស្រ្តាចារ្យទួស សាភឿនបានបញ្ជាក់ថា “ប្លង់ស្ថាបត្យកម្មរបស់អាគារនេះ នៅដដែល មិនបានផ្លាស់ប្តូរនោះទេ”។
ប្រសិនជាសាងសង់ចប់ Thai Boon Roong Twin Towers គឺជាគម្រោងសាងសង់អគារដ៏ធំ និងខ្ពស់ជាងគេនៅកម្ពុជា ដែលគ្រោងសាងសង់លើផ្ទៃដីទំហំជាង៥ហិកតាទល់មុខសណ្ឋាគារ និងកាស៊ីណូ Naga World។ មជ្ឈមណ្ឌលពាណិជ្ជកម្មនេះនឹងមានក្រឡាផ្ទៃសរុប១,៤លានម៉ែត្រការ៉េ ដែលរួមបញ្ចូលនូវសណ្ឋាគារកម្រិតផ្កាយ៥ អាផាតមិនខុនដូ ការិយាល័យលំដាប់អន្តរជាតិ ផ្សារទំនើប ភោជនីយដ្ឋាន កន្លែងគយគន់ទេសភាព និងសេវាកម្មកម្សាន្តលំដាប់ពិភពលោកជាច្រើនទៀត។
លោកទួស សាភឿន បានសរសេរនៅលើបណ្តាញសង្គមផ្លូវការ កាលពីថ្ងៃទី ២១ ខែកក្កដាថa “ រយៈពេល៤ឆ្នាំកន្លងទៅហើយ មានមិត្តភក្តិជាច្រើនសួរខ្ញុំថា គម្រោងមជ្ឈមណ្ឌលពាណិជ្ជកម្មថៃប៊ុនរ៉ុង កម្ពស់៥៦៧ ម៉ែត្រនៅតែបន្តសាងសង់ឬទេ! មហាគម្រោងនេះ នឹងមិនមានអ្វីប្រែប្រួលទេ គម្រោងប្លង់បច្ចេកទេសបានគូរបញ្ចប់១០០ ភាគរយ ចំណែកជញ្ជាំងទប់ដី ការពារបាក់ដី ការពារជម្រាបទឹកទន្លេ ជម្រៅ២៦ម៉ែត្រក៏បានចាក់បេតុងបញ្ចប់រួចរាល់ ១០០ ភាគរយហើយ”។
លោកបន្ថែមទៀតថា “នៅពេលនេះក្រុមការងារសាងសង់ និងក្រុមការងារផ្នែកបច្ចេកទេសផ្សេងៗ ក៏បានត្រៀមខ្លួនរៀបចំរួចរាល់ផងដែរ ដោយនៅរង់ចាំតែឱកាសល្អ និងការបញ្ចប់ស្ថានការណ៍អួអាប់ដោយសារជំងឺកូវីដ គម្រោងនេះនឹងចាប់ផ្តើមហើយ ក្រោមការដាក់ចេញផែនការ និងបទបញ្ជាយ៉ាងម៉ឺងម៉ាត់ពីអ្នកឧកញ៉ាអគ្គនាយកក្រុមហ៊ុន ថៃ ប៊ុនរ៉ុង។
លោកបានថ្លែងថា “មិនមែនប្រទេសទាំងអស់ សុទ្ធតែមានសមត្ថភាពកសាងអគារធំបែបនេះបានទេ ជួនកាលគេមានលុយ តែមិនប្រាកដថាអាចសាងសង់បាននោះឡើយ”។
យោងតាមរបាយការណ៍និន្នាការសេដ្ឋកិច្ចសង្គម នៃក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅដើមខែកក្កដាឱ្យដឹងថា ក្នុងរយៈពេល៥ខែដើមឆ្នាំ ២០២១ រដ្ឋាភិបាលកម្ពុជា បានអនុម័តលើគម្រោងសាងសង់សរុប១៨២៣ គម្រោង បើធៀបទៅនឹងរយៈពេលដូចគ្នាឆ្នាំ ២០២០ គឺបានធ្លាក់ចុះប្រមាណ២៧៨គម្រោង៕
