ដោយៈ ប៊ី
ភ្នំពេញៈ អ្នកជំនាញបានអះអាងថា គម្រោងសាងសង់អចលនទ្រព្យធំៗនៅកម្ពុជា នៅតែបន្តអភិវឌ្ឍន៍ធម្មតា បើទោះបីប្រទេសកម្ពុជាបានជួបប្រទះនឹងជំងឺកូវីដ១៩ ខណៈវិស័យអចលនទ្រព្យ បានទាក់ទាញទុនវិនិយោគរាប់ពាន់លានដុល្លារក្នុងមួយឆ្នាំៗ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានថ្លែងនៅកម្មវិធីមួយស្តីពី “វិស័យអចលនទ្រព្យ និងសំណង់ក្នុងបរិការណ៍ដែលហុំព័ទ្ធដោយជំងឺកូវីដ១៩”កាលពីថ្មីៗនេះថា គម្រោងសាងសង់ធំៗមួយចំនួន គឺនៅតែបន្តអភិវ ឌ្ឍន៍ធម្មតា ហើយបើទោះបីប្រទេសកម្ពុជា បានជួបប្រទះនឹងជំងឺកូវីដ១៩ វិស័យអចលនទ្រព្យកម្ពុជា នឹងអាចនៅតែបន្តភាពរឹងមាំបានដដែល បើសិនណាវិស័យធនាគារនៅតែងអាចបន្តផ្តល់ប្រាក់កម្ចីបាន។
លោកបានថ្លែងដូច្នេះថា “ប្រទេសកម្ពុជាបានប្រឈមនឹងជំងឺកូវីដ១៩ តែគម្រោងសាងសង់ធំៗ គឺនៅតែបន្តអភិវឌ្ឍន៍ធម្មតា”។
ជាមួយគ្នានេះដែរ លោកបានបន្តថា បើតាមការសិក្សាទៅលើវិស័យអចលនទ្រព្យនៅលើប្រទេសជឿនលឿន ភាគច្រើន១០ឆ្នាំម្តងនឹងរងនូវផលប៉ះពាល់ម្តង។ ដូចនេះហើយពេលដែលរងផលប៉ះពាល់នេះហើយ គឺជាឱកាសសម្រាប់អ្នកមានលទ្ធភាពបានដើរទិញទុក ហើយនៅពេលដែលបានធូរស្បើយ ជាឱកាសដែលគេលក់ចេញដើម្បីទទួលបានផលចំណេញ ដែលនេះគឺជាឱកាសមួយនៅក្នុងបញ្ហាផងដែរ។
លោកបានថ្លែងថា សម្រាប់វិស័យអចលនទ្រព្យនៅកម្ពុជា ក្នុងឆ្នាំ២០២១នេះមានការធ្លាក់ចុះ តែក៏ជាឱកាសមួយដល់អ្នកវិនិយោគិន ក្នុងការដើរទិញអចនទ្រព្យទុក ព្រោះពេលនេះគឺអាចទិញបានក្នុងតម្លៃធូរថ្លៃ ហើយបន្ទាប់ពីស្ថានភាពបានប្រើសើរវិញនោះ នឹងអាចលក់ចេញក្នុងតម្លៃខ្ពស់ផងដែរ។
យោងតាមរបាយការណ៍និន្នាការសេដ្ឋកិច្ចសង្គម នៃក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅដើមខែកក្កដាឱ្យដឹងថា ក្នុងរយៈពេល៥ ខែ ដើមឆ្នាំ២០២១ រដ្ឋាភិបាលកម្ពុជាបានអនុម័ត គម្រោងសាងសង់សរុបចំនួន១៨២៣ បើធៀបនឹងរយៈពេលដូចគ្នាឆ្នាំ២០២០ ធ្លាក់ចុះប្រមាណ ២៧៨ គម្រោង។
ក្នុងនោះគម្រោងសំណង់លំនៅឋានមានចំនួន១ ៦០៧គម្រោងស្មើនឹង៨៧,៩ភាគរយនៃសំណើសុំសាងសង់សរុបធ្លាក់ចុះ១៣៩គម្រោង ធៀបនឹងរយៈពេលដូចគ្នាឆ្នាំមុន។ គម្រោងលំនៅឋាន ដែលបានអនុញ្ញាតសាងសង់ គិតជាប្រាក់មានប្រមាណ២៣៤៩លានដុល្លារធ្លាក់៣២,៦ភាគរយ៕
