ដោយៈគង់ សូរិយា
មណ្ឌលគិរីៈ តំបន់គោលដៅសំខាន់ៗចំនូន៦ ត្រូវបានរដ្ឋាភិបាលដាក់ចេញ ដើម្បីជំរុញអភិវឌ្ឈន៍ ខេត្តមណ្ឌលគិរីជាប៉ូលសេដ្ឋកិច្ចទី៤ ដែលគ្រោងទាក់ទាញទេសចរណ៍និងរកចំណូលទាំងផ្ទាល់ និងប្រយោល១៥០០លានដុល្លារអាមេរិក។
យោងតាមឯកសាររបស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា គោលដៅទេសចរណ៍ រាជរដ្ឋាភិបាលបានកំណត់តំបន់ អាទិភាពសំខាន់ៗចំនួន៦ រួមមាន តំបន់របៀងអេកូទេសចរណ៍ និងទេសចរណ៍ធម្មជាតិនៃដែនជម្រកសត្វព្រៃទាំង ៥ (ដែនជម្រកសត្វព្រៃភ្នំព្រេច ណាមលៀរ លំផាត់ កែវសីមា និងស្រែពក)។
តំបន់របៀងទេសចរណ៍វប្បធម៌ និងអេកូទេសចរណ៍ ប៊ូស្រា-ដាក់ដាំ ដែលលើកទឹកចិត្តឲ្យមានការអភិវឌ្ឍតែសកម្មភាពអេកូទេសចរណ៍ និងទេសចរណ៍ធម្មជាតិ ភ្ជាប់ជាមួយទេសចរណ៍វប្បធម៌ជនជាតិដើមភាគតិច។
ក្រុងសែនមនោរម្យ ជាបណ្តុំសកម្មភាពទេសចរណ៍ពហុបំណង។ តំបន់ស្រុកអូររាំង ភ្ជាប់ជាមួយគម្រោងអភិវឌ្ឍន៍ ព្រលានយន្តហោះខេត្តមណ្ឌលគិរី ដែលអាចអភិវឌ្ឍន៍ជាតំបន់ប្រជុំជនរណប ភ្ជាប់ជាមួយក្រុងសែនមនោរម្យ។
តំបន់ប្រជុំជន នៃស្រុកកោះញែក ដែលមានសក្តានុពល ក្នុងការរៀបចំអភិវឌ្ឍន៍ជាមណ្ឌលទេសចរណ៍ នាពេលអនាគត ហើយដែលការអភិវឌ្ឍមានវិសាលភាព ទូលំទូលាយជាងក្នុងតំបន់អភិរក្ស នៃដែនជម្រកសត្វព្រៃ និងតំបន់ទេសចរណ៍សមាហរណតាមច្រកព្រំដែន៕