ដោយៈសុខុម
អន្តរជាតិៈ ដូចដែលហើយបានដឹងហើយថា ដែកគឺជាសម្ភារៈដ៏សំខាន់មួយ ដែលមិនអាចខ្វះបាននៅក្នុងការជំរុញវិស័យសំណង់ ដូចនេះតើអ្នកដឹងទេថា ក្រុមហ៊ុនផលិតដែកដែលធំជាងគេបំផុត ក្នុងពិភពលោកមានឈ្មោះអ្វី ស្ថិតនៅក្នុងប្រទេសណា និងមានប្រវត្តិបែបណា? តោះ! មកស្វែងយល់ត្រួសៗទាំងអស់គ្នា!។
ក្រុមហ៊ុនផលិតដែកដែលធំជាងគេបំផុត ក្នុងពិភពប្រចាំឆ្នាំ២០២១ នេះមានឈ្មោះថា ArcelorMittal S.A. ជាមួយនឹងសមត្ថភាពផលិតដែក ប្រចាំឆ្នាំប្រមាណ៩២,៥លានតោនគិតត្រឹមឆ្នាំ២០១៨។ ក្រុមហ៊ុនផលិតដែកពហុជាតិសាសន៍មួយនេះ មានទីស្នាក់ការកណ្ដាលនៅក្នុងប្រទេសលុចសំបួរ។
*ប្រវត្តិក្រុមហ៊ុន
ក្រុមហ៊ុនArcelorMittal ដែលជាបុត្រសម្ព័ន្ធនៃក្រុមហ៊ុន Mittal Steel ត្រូវបានបង្កើតឡើងក្នុងឆ្នាំ២០០៦ (១៥ឆ្នាំមុន) តាមរយៈការច្របាច់បញ្ចូលគ្នា ជាមួយក្រុមហ៊ុន Arcelor ដើម្បីក្លាយជាក្រុមហ៊ុនផលិតដែកធំបំផុតក្នុងពិភពលោក ជាមួយនឹងតម្លៃភាគហ៊ុនក្នុងមួយភាគហ៊ុន៤៨ដុល្លារអាមេរិក ហើយបើសរុបមានតម្លៃរហូតដល់ទៅប្រមាណ៣៣ពាន់លានដុល្លារ នៅពេលនោះ។
ក្រុមហ៊ុនយក្សមួយនេះ ផលិតដែកបានរហូតដល់ទៅ១០% នៃដែកទាំងអស់ដែលត្រូវបានផលិតសម្រាប់ផ្គត់ផ្គង់ ក្នុងវិស័យសំណង់ទូទាំងពិភពលោក។
គិតត្រឹមឆ្នាំ២០២០ ក្រុមហ៊ុននេះ ទទួលបានប្រាក់ចំណូល៥៣,២៧ពាន់លានដុល្លារ ទ្រព្យសកម្មសរុប៨២,០៥២ពាន់លានដុល្លារ និងបុគ្គលិកចំនួន១៦៨.០០០នាក់។
*ផលិតផល និងសកម្មភាពនានា
ក្រុមហ៊ុននេះផលិតដែកជាច្រើនប្រភេទមិនថា ដែកជ្រុង ដែកមូល ដែកសំប៉ែត ដែកវែង ដែកខ្លី និងសូម្បីដែកលួស។ក្រុមហ៊ុននេះ បានចូលរួមយ៉ាងសកម្មក្នុងសកម្មភាពស្រាវជ្រាវ និងការអភិវឌ្ឍនៅក្នុងវិស័យរ៉ែ និងដែក។
ក្នុងឆ្នាំ២០១៦ ក្រុមហ៊ុននេះផលិតដែក បានប្រមាណ៩០លានតោន ហើយគិតត្រឹមឆ្នាំ២០១៧ ក្រុមហ៊ុននេះបានផលិតដែកពិសេសចំនួន២០០មុខ សម្រាប់ប្រើប្រាស់នៅក្នុងការផលិតរថយន្ត ដោយពាក់កណ្ដាលក្នុងចំណោមនោះ ត្រូវបានបញ្ចេញតាំងពីឆ្នាំ២០០៧។
ក្នុងចំណោមប្រភេទដែកទាំងនោះ រួមមានទាំងដែកប្រភេទ Usibor 2000 ដែលក្រុមហ៊ុនបានប្រកាសកាលពីខែមិថុនា ឆ្នាំ២០១៦ និងបញ្ចេញតាមក្រោយក្នុងឆ្នាំដដែលនោះផងដែរ។ នៅពេលបញ្ចេញមានការអះអាងថា ដែកដ៏រឹងមាំសម្រាប់ផលិតរថយន្តនេះមានភាពរឹងមាំជាងដែកផ្សេងៗទៀត ដែលប្រើប្រាស់សម្រាប់ផលិតរថយន្តដល់ទៅ១ភាគ៣ឯណោះ។
*រចនាសម្ព័ន្ធក្រុមហ៊ុន
លោក Lakshmi Mittal ដែលជាជនជាតិឥណ្ឌា (ម្ចាស់ក្រុមហ៊ុន Mittal Steel) គឺជាប្រធាន និងជានាយកប្រតិបត្តិ។ គ្រួសាររបស់លោក កំពុងកាន់កាប់ភាគហ៊ុន៤០%នៅក្នុងក្រុមហ៊ុន៕
