វិស័យSMEត្រូវបានលើកកំពស់ក្នុងអំឡុងវិបត្តិកូវីដ១៩?

ដោយៈ គង់ ម៉ាលីនណា

ភ្នំពេញៈ វិបត្តិកូវីដ១៩ វិស័យសហគ្រាសធុនតតូច ​និងមធ្យម(SME) ត្រូវបានលើកកំពស់ តាមរយៈការផ្តល់ឥណទានជាមួយការប្រាក់សមរម្យ។នេះបើតាមការឲ្យដឹងពីមន្រ្តីជាន់ខ្ពស់ក្រសួងឧស្សាហកម្ម។

លោកហេង សុខគង់អ្នកនាំពាក្យ និងជារដ្ឋលេខាធិការក្រសួងឧស្សាហកម្ម បច្ចេក​វិទ្យា និងនវានុវត្តន៍បានមានប្រសាសន៍៍ឲ្យដឹងថា ទន្ទឹមនឹងបញ្ហានេះកម្ពុជាបានលើកស្ទួយសហគ្រាសធុនតូច និងមធ្យមក្នុងបរិបទកូវីដនេះ ដោយធ្វើយ៉ាងណាអាចឱ្យសហគ្រាសទាំងអស់នោះអាចនៅឈរជើងបាន ដោយមានការផ្ដល់កញ្ជប់ពិសេស និងការលើកលែងជាច្រើន។ ក្រៅពីការលើកលែងពិសេសនេះ គឺខាងក្រសួងពាក់ព័ន្ធ ក៏បានបង្កើតនូវធនាគារSME ដែលមានដើមទុនដំបូង១០០លានដុល្លារសហរដ្ឋអាមេរិក ដើម្បីជាការចូលរួមចំណែកមួយយ៉ាងសំខាន់ក្នុងការផ្ដល់នៅកម្ចីទុន។

ធនាគារនេះបានផ្តល់ឥណទាន ជាមួយអត្រាការប្រាក់ទាបត្រឹមកម្រិត៧ភាគរយសម្រាប់សហគ្រាសធុនតូច និងមធ្យម អាចយកទៅពង្រីក ឬទ្រទ្រង់អាជីវកម្មឱ្យដំណើរការ និងបង្កើនផលិតភាពក្នុងដំណាក់កាលនៃជំងឺកូវីដ១៩ និងក្រោយកូវីដត្រូវបានបញ្ចប់ផងដែរ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោកបន្តថា “ជាមួយគ្នានោះ ក្រសួងឧស្សាហកម្ម និងក្រសួងពាក់ព័ន្ធបានផ្ដល់ជូននូវលក្ខណៈពិសេសជាច្រើន ដូចជាការលើកលែងពន្ធអាករមួយចំនួន និងការផ្ដល់នូវកម្ចីពិសេស ដោយពន្យារពេលបង់ការប្រាក់ និងប្រាក់ដើមទៅរោងចក្រសហគ្រាស ដែលទទួលផលប៉ះពាល់ដោយសារតែកូវីដ១៩”។

ក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ បានធ្វើកំណែទម្រង់ក្នុងការគ្រប់គ្រងនិងការចុះបញ្ជី រោងចក្រ សិប្បកម្ម ការអភិវឌ្ឍស្វ័យប្រវត្តិកម្ម ដើម្បីជួយសម្រួលក្នុងការផ្នែកកិច្ចការរដ្ឋបាល ដើម្បីចំណេញពេលវេលានិងការសន្សំសំចៃផ្សេងៗដើម្បីគាំទ្រដល់ការបង្កើនលទ្ធភាព និងប្រសិទ្ធភាពការងារផែនការ។ ក្រៅពីនេះក្រសួង ក៏បានជំរុញ ការអភិវឌ្ឍន៍វិស័យឧស្សាហកម្មរបស់កម្ពុជា ដោយធ្វើប្រព្រឹត្តិកម្មនូវមុខទំនិញ ដែលអាចផលិតក្នុងស្រុក ច្រើនជាងការនាំចូលមកពីខាងក្រៅ ជាពិសេសលើទំនិញយុទ្ធសាស្ត្រនិងផលិតផលកសិឧស្សាហកម្ម។

លោកហេង សុខគង់បានបន្តថា ថ្វីត្បិតតែប្រទេសកម្ពុជាមានបញ្ហាប្រឈមនៅក្នុងដំណាក់កាលនៃការរីករាលដាលនៃជំងឺកូវីដ១៩ កម្ពុជាសង្ឃឹមថា នឹងមានការងើបឡើងវិញនៃខ្សែចង្វាក់ផលិតកម្មវិស័យឧស្សាហកម្ម និងសហគ្រាសធុនតូចនិងមធ្យម ព្រោះកម្ពុជាមានចក្ខុវិស័យវែងឆ្ងាយច្បាស់លាស់ និងមានដៃគូរទីផ្សារដ៏ធំគឺប្រទេសចិន។

ក្រៅពីនេះ កម្ពុជារំពឹងថានឹងអាចចុះអនុស្សារណៈ នៃការយោគយល់ជាមួយនឹងប្រទេសកូរ៉េខាងត្បូង ដែលជាប្រភពទីផ្សាររបស់កម្ពុជា សម្រាប់ការនាំចេញបន្ថែមទៀត ដើម្បីរកទីផ្សារបន្ថែមឲ្យរោងចក្រ សហគ្រាសធុនតូច និងមធ្យម ដែលជាក្ដីសង្ឃឹមបន្ថែមទៀតនៅក្នុងការពង្រឹងខឿនសេដ្ឋកិច្ច៕

 

 

 

LEAVE A REPLY

Please enter your comment!
Please enter your name here