មហាសេដ្ឋីចិត្តធម៌ Lord Haughey គ្រោងបោះទុន២ពាន់លានដុល្លារសាងសង់ផ្ទះតម្លៃធូរថ្លៃរាប់សែនខ្នងដើម្បីជួយដល់អ្នកក្រ

សុខុម
ស្កុតលែន: មហាសេដ្ឋីជំនួញលោក Lord Willie Haughey គ្រោងបោះទុនវិនិយោគរហូតដល់ទៅប្រមាណ២ពាន់លានដុល្លារអាមេរិក ដើម្បីសាងសង់ផ្ទះតម្លៃធូរថ្លៃចំនួន១១,០០០ខ្នងនៅស្កុតឡែន សម្រាប់រយៈពេល៩ឆ្នាំខាងមុខ។

យោងតាមសារព័ត៌មាន BBC ចុះផ្សាយកាលពីថ្ងៃទី១៨ ឧសភា ឱ្យដឹងថា ក្រុមហ៊ុនរបស់លោកមានឈ្មោះថា City Facilities Management Holdings ដែលមានមូដ្ឋាននៅទីក្រុង Glasgow ស្កុតលែន បានចាប់ដៃគូសហការជាមួយក្រុមហ៊ុនអចលនទ្រព្យ Ediston រួចហើយនៅក្នុងគម្រោងនេះ។

មហាសេដ្ឋីចិត្តធម៌រូបនេះបានលើកឡើងថា គម្រោងនេះនឹងជួយពលរដ្ឋកាត់បន្ថយការចំណាយទៅលើថ្លៃឈ្នួលផ្ទះ ហើយបង្វែរការចាប់អារម្មណ៍របស់អ្នកជួលផ្ទះឱ្យងាកមកទិញផ្ទះបង់រំលស់វិញ។

លោកបានប្រាប់សារព័ត៌មាន BBC Scotland ថា “ខ្ញុំកំពុងតែព្យាយាមជួយសម្រាលវិបត្តិលំនៅដ្ឋាន”។ លោកបានបន្ថែមថា “ខ្ញុំបានអានអត្ថបទមួយដែលលើកឡើងថា ពលរដ្ឋវ័យក្មេងបានចំណាយជាង៥០%នៃប្រាក់ចំណូលរបស់ពួកគេទៅលើលំនៅដ្ឋាន។ ខ្ញុំគិតថាត្រូវតែមានវិធីប្រសើរជាងនេះ នោះគឺផ្ទះដែលមានតម្លៃធូរថ្លៃដែលមានក្នុងគម្រោងនេះ”។

ក្រុមហ៊ុនអចលនទ្រព្យ Ediston ដែលមានមូដ្ឋាននៅក្រុង Edinburgh បានទិញយកភាគហ៊ុន២៤%នៅក្នុងក្រុមហ៊ុនរបស់លោកក្នុងតម្លៃ៩០៦លានដុល្លារអាមេរិក។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

បុរសវ័យ៦៤ឆ្នាំរូបនេះសង្ឃឹមថា ការចាប់ដៃគូសហការនៅក្នុងគម្រោងសាងសង់លំនៅដ្ឋាននេះនឹងជួយដោះស្រាយកង្វះខាតលំនៅដ្ឋាននៅស្កុតលែន។ លោកបានបន្ថែមថា សម្រាប់ផ្ទះថ្មីដែលមានផ្ទៃសរុប១១១ម៉ែត្រការ៉េទាំងនេះ អ្នកទិញបង់រំលស់ត្រឹមតែ១.០០០ដុល្លារប៉ុណ្ណោះក្នុងមួយខែ។ លោកបានគូសបញ្ជាក់ថា “គ្មានអ្នកណាលក់ផ្ទះក្នុងតម្លៃធូរថ្លៃបែបនេះទេ”៕

LEAVE A REPLY

Please enter your comment!
Please enter your name here