ដោយៈលក្ខិណា
ភ្នំពេញៈ ក្រោយពេលរដ្ឋាភិបាល ប្រកាសបង្កើតរដ្ឋបាលក្រុងថ្មី ក្នុងទឹកដីខេត្តកំពត គឺក្រុងបូកគោ បណ្ដាវិនិយោគិនជាច្រើន បានបង្ហាញពីសុទិដិ្ឋនិយម ចំពោះក្រុងថ្មីនេះហើយរំពឹងថា ទីក្រុងថ្មីមួយនេះ នឹងក្លាយជាទីក្រុងបៃតង និងមានសក្ដានុពលទាក់ទាញសម្រាប់វិនិយោគទាំងវិនិយោគិន ក្នុងនិងក្រៅប្រទេសនៅពេលអនាគត។
អគ្គនាយកក្រុមហ៊ុន Youngsia Real Estate លោក Cooler Tan ម្ចាស់គម្រោង បូកគោលែនដ៏ ក្នុងទឹកដីខេត្តកំពតបានមានប្រសាសន៍ឲ្យដឹងកាលពីដើមសប្តាហ៍នេះថា ក្រោយពេលរដ្ឋាភិបាលប្រកាស បង្កើតទីក្រុងថ្មីមួយនៅជើងភ្នំបូកគោ លោកមើលឃើញថាទីក្រុងមួយនេះ នឹងក្លាយជាទីក្រុងបៃតងមួយ ក្នុងប្រទេសកម្ពុជានាពេលដ៏ខ្លីខាងមុខនេះ ដោយសារតែតំបន់ នៃទីក្រុងបូកគោគឺល្អណាស់ ព្រោះនៅជុំវិញទីក្រុងនេះមានភ្នំ មានសមុទ្រ មានសួនបៃតង ដែលស័ក្ដិសមបំផុតជាទីក្រុងបៃតង និងមានភាពទាក់ទាញខ្លាំងជាងខេត្តផ្សេងៗទៀត។
លោកបន្តថា ដោយសារតែសក្ដានុពលនៃទីក្រុងថ្មី អំណោយផលខ្ពស់សម្រាប់វិនិយោគ លោកក៏បានសម្រេចបណ្ដាក់ទុនវិនិយោគ នូវគម្រោងមួយផងដែរនៅជើងភ្នំបូកគោ តាមបណ្ដោយផ្លូវឡើងទៅលើកំពូលភ្នំបូកគោ ដោយទីតាំងនៃគម្រោងវិនិយោគរបស់លោក ជាតំបន់ដែលមានភ្ញៀវទេសចរជាតិ និងអន្តរជាតិឆ្លងកាត់ និងធ្វើដំណើរទៅកាន់រមណីយដ្ឋានបូកគោ។
លោកបន្តថា “គម្រោងវិនិយោគបូកគោលែនដ៏ ជាគម្រោងវិនិយោគខ្នាតមធ្យមទេ តែវានឹងទាក់ទាញ ឱ្យគម្រោងវិនិយោគដទៃទៀត ចូលមកបណ្ដាក់ទុនវិនិយោគបន្តបន្ទាប់នៅក្នុងទីក្រុងបូកគោ” ។ លោកបន្ថែមថា អ្វីដែលលោករំពឹង គឺគម្រោងវិនិយោគបូកគោលែនដ៏របស់លោក នឹងទាក់ទាញគម្រោងដទៃទៀតនោះ គឺគម្រោងផ្ដោតលើគុណតម្លៃតាមរយៈការសាងសង់ ប្រព័ន្ធហេដ្ឋារចនាសម្ព័ន្ធនៅក្នុងគម្រោងនោះ ដោយក្នុងគម្រោងមានផ្លូវធំៗ មានសួនបៃតង មានប្រព័ន្ធទឹកស្អាត អគ្គិសនី និងភ្លើងបំភ្លឺនៅពេលរាត្រី។
អ្វីដែលពិសេសនោះ ក្នុងគម្រោងក៏មានអភិវឌ្ឍន៍ផ្ទះយន្តហោះ ដែលមានទំហំ១៦គុណ៤០ម៉ែត្រ និងអភិវឌ្ឍន៍ផ្ទះអាជីវកម្មមួយចំនួន នៅផ្នែកខាងមុខនៃគម្រោង ។ ក្រៅពីនេះ ក្នុងគម្រោងបូកគោឡែនដ៏ ក៏មានលក់គម្រោងដីឡូត៍ប្រទេសផ្ទះលំហែកាយ សម្រាប់អតិថិនជទូទៅ អាចទិញ និងទុកវិនិយោគនៅពេលអនាគត ទៅតាមចំណង់ចំណូលចិត្តរបស់ខ្លួន ដោយមានប្រព័ន្ធហេដ្ឋារចនាសម្ព័ន្ធសុវត្ថិភាពរួចស្រេច ។
ភ្នាក់ងារអចលនទ្រព្យប្រចាំខេត្តកំពត លោកលឹម សុជាតិបានឲ្យដឹងថា ជាការពិតណាស់ការបង្កើតទីក្រុងថ្មី ក្នុងទឹកដីខេត្តកំពត វាពិតជាបានទាក់ទាញនូវវិនិយោគិនថ្មីៗបន្តទៀតចូលបណ្ដាក់ទុនវិនិយោគ ក្នុងខេត្តនេះដោយបានអភិវឌ្ឍន៍ ទៅលើគម្រោងរបស់គេ ដែលបានត្រៀមនិងគម្រោងថ្មីៗបន្តបន្ទាប់ ទោះកម្ពុជាកំពុងប្រឈមនឹងជំងឺកូវីដ១៩ក្ដី ។
អភិបាលខេត្តកំពតលោកជាវ តាយបានមានប្រសាសន៍ឲ្យដឹងកាលពីពេលថ្មីៗនេះថា ទោះបីកម្ពុជាកំពុងមានបញ្ហាជំងឺកូវីដ ក៏ខេត្តកំពតនៅតែមានគំរោងវិនិយោគច្រើន ហើយគំរោងនិមួយៗនៅតែបន្តដំណើរការ មិនបានផ្អាកដោយសារវិបត្តិនេះនោះឡើយ៕
