ដោយៈឧត្តម
ឌូបៃ: បន្ទាប់ពីរស់នៅក្នុងទីក្រុងឡុងដ៏ ប្រទេសអង់គ្លេសអស់រយៈជិត៣ទសវត្សរ៍ លោក Christophe Reech ដែលជាប្រធានក្រុមហ៊ុនបារាំងដ៏ធំមួយ មានអារម្មណ៍ធុញទ្រាន់ ចំពោះការបិទខ្ទប់ទីក្រុង ដើម្បីទប់ស្កាត់ការឆ្លងរាតត្បាតវីរុសកូវីដ-១៩ ។
នៅរដូវផ្ការីកឆ្នាំនេះ គាត់បានលក់ផ្ទះប្រណីតរបស់គាត់នៅក្រុងឡុងដ៍ ហើយបានចាកចេញទៅកាន់ក្រុងឌូបៃ ដើម្បីកសាងជីវិតថ្មីនៅទីនោះជាមួយគ្រួសាររបស់គាត់។
មហាសេដ្ឋីរូបនេះនិយាយថា គ្មានថ្ងៃដែលគាត់ត្រលប់ទៅរស់នៅទីក្រុងឡុងដ៏វិញឡើយ។ ហើយមិត្តភក្ដិជាច្រើនរបស់គាត់ ដែលសុទ្ធតែជាស្ដេចលុយ ក៏បានផ្លាស់ទៅរស់នៅក្នុងទីក្រុងឌូបៃដូចគ្នាដែរ ដោយធ្វើឱ្យការលក់ផ្ទះប្រណីតៗនៅក្នុងទីក្រុង នៃប្រទេសអារ៉ាប់រួមអេមីរ៉ាត នេះមានសន្ទុះកើនឡើងខ្លាំងមិនធ្លាប់មាន។
អ្នកជំនួញដែលកាន់កាប់ក្រុមហ៊ុនជាច្រើន នៅក្នុងវិស័យអចលនទ្រព្យ និងបច្ចេកវិទ្យាហិរញ្ញវត្ថុរូបនេះបានលើកឡើងថា “នៅទីនេះក្នុងក្រុងឌូបៃ មានយុទ្ធសាស្ត្រតែមួយគត់គឺធ្វើជំនួញដូចធម្មតា។ វិធីសាមញ្ញបំផុតគឺត្រូវធ្វើឱ្យប្រាកដថា គ្រប់គ្នាត្រូវបានចាក់វ៉ាក់សាំង ហើយរក្សាឱ្យអ្វីៗបើកដំណើរការ” ។
គាត់បាននិយាយទៀតថា “ពិតណាស់ កត្តានោះបានទាក់ទាញមនុស្សជាច្រើនដូចរូបខ្ញុំជាដើម” ។
ខណៈការចែកចាយវ៉ាក់សាំងមិនស្មើគ្នា នៅទូទាំងពិភពលោក និងការឆ្លងវីរុសកូវីដ-១៩ រលកថ្មីនៃការរីករាលដាលជំងឺនេះ បានបង្ខំឱ្យប្រទេសនានាបង្កើនវិធានការរឹតបន្តឹង ដើម្បីទប់ស្កាត់ការឆ្លងរាតត្បាត ក្រុមអ្នកទិញជាជនបរទេស ដែលមានលុយច្រើន បានសម្រុកចូលក្នុងទីផ្សារផ្ទះប្រណីតនៅក្រុងឌូបៃ។ អ្នកមានទាំងនោះបានសម្រុកទិញផ្ទះវីឡា និងផ្ទះជាន់លើប្រណីតៗដែលមានតម្លៃថ្លៃ ដោយធ្វើឱ្យតម្លៃផ្ទះហក់ឡើងខ្ពស់មិនធ្លាប់មាន។
ការលក់អចលនទ្រព្យប្រណីតៗនៅក្រុងឌូបៃ ដែលធ្លាប់តែមានសន្ទុះយឺត បានកើនឡើងរហូតដល់២៣០%ក្នុងត្រីមាសទី១ ដើមឆ្នាំ២០២១នេះ បើធៀបនឹងរយៈពេលដូចគ្នាកាលពីឆ្នាំមុន។
យោងតាម Property Finder ដែលជាគេហទំព័រអចលនទ្រព្យធំបំផុត របស់ប្រទេសអារ៉ាប់រួមអេមីរ៉ាតបានឱ្យដឹងថា តម្លៃអចលនទ្រព្យប្រណីតៗ នៅតំបន់មួយចំនួនបានហក់ឡើង៤០% ។
យោងតាមក្រុមហ៊ុនផ្ដល់ប្រឹក្សាអចលនទ្រព្យ Property Monitor បានឱ្យដឹងថា ផ្ទះប្រណីតចំនួន៩០ផ្ទះ ដែលមានតម្លៃ២,៧លានដុល្លារអាមេរិក ត្រូវបានលក់ដាច់កាលពីខែមុន បន្ថែមពីលើ៨៤ផ្ទះដែលលក់ដាច់ក្នុងខែមីនា ដោយវ៉ាឈ្នះកម្រិតកើនឡើងខ្ពស់បំផុតកាលពី៨ឆ្នាំមុន។
ក្រុមហ៊ុននេះបានឱ្យដឹងទៀតថា នៅក្នុងឆ្នាំ២០២០ទាំងមូល ផ្ទះប្រណីតលក់ដាច់បានតែ៥៤ប៉ុណ្ណោះ៕
