ដោយៈ គង់ ម៉ាលីនណា
ភ្នំពេញៈ ក្នុងប៉ុន្មានឆ្នាំចុងក្រោយនេះ រដ្ឋាភិបាលបានបើកដៃឲ្យក្រុមហ៊ុនឯកជនធ្វើការវិនិយោគ និងកែលំអរព្រលានយន្តហោះធំៗចំនួន៤ ដែលជាការបើកចំហជើងមេឃកម្ពុជាកាន់តែធំបន្ថែមទៀតទៅកាន់ពិភពលោក។
រដ្ឋាភិបាលកម្ពុជាបាន នឹងកំពុងធ្វើពិពិធកម្មព្រលានយន្តហោះ នៅក្នុងប្រទេសដោយមានទាំងពង្រីកផ្លូវរត់ និងសាងសង់ព្រលានយន្តហោះខ្នាតអន្តរជាតិថ្មី ក្នុងទុនវិនិយោគរាប់ពាន់លានដុល្លារអាមេរិក ដើម្បីឆ្លើយតបទៅនឹងការដឹកជញ្ជូនតាមផ្លូវការអាកាស និងប្រកួតប្រជែងនៅក្នុងតំបន់ ព្រមទាំងលំហូវិនិយោគមកពីបណ្តាប្រទេសនានាលើសកលលោក។
អ្នកនាំពាក្យ និងជាអនុរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិលលោកស៊ិនចាន់ សេរីវុត្ថាបានមានប្រសាសន៍ឲ្យដឹងកាលពីពេលថ្មីៗនេះថា រដ្ឋាភិបាលបានបោះទុនជាង៣០០០លានដុល្លារអាមេរិក ក្នុងការពង្រីកនិងស្តារឡើងវិញ នូវព្រលានយន្តហោះទាំង៣របស់កម្ពុជា ដើម្បីជំរុញឱ្យវិស័យអាកាសចរណ៍កម្ពុជា កាន់តែការតែទំនើប និងអាចឱ្យយន្តហោធុនធំអាចចុះចតបាន។
លោកបន្ថែមថា “ទំហំទុននៃការវិយោគចំណាយលើព្រលានយន្ត នៅភ្នំពេញ សៀមរាប និងខេត្តព្រះសីហនុ រួមទាំងគម្រោងព្រលានយន្តហោះថ្មីៗផ្សេងទៀត អញ្ចឹងយើងគ្រោងចំណាយជាង៣០០០លានដុល្លារអាមេរិក” ។
រាជរដ្ឋាភិបាលបាន និងកំពុងតែដំណើរការអភិវឌ្ឍ ហេដ្ឋារចនាសម្ព័ន្ឋអាកាសយានដ្ឋានជាតិ-អន្តរជាតិចំនួន៣ គឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប អាកាសយានដ្ឋានអន្តរជាតិខេត្តព្រះសីហនុ ដែលគ្រប់គ្រងនិងធ្វើទំនើបកម្មអាកាសយានដ្ឋានដោយក្រុមហ៊ុន (SCA) ហើយក្រុមហ៊ុនអភិវឌ្ឍន៍ចិនដ៏ធំ ក៏បាននិងកំពុងបញ្ចប់ការសាងសង់ ព្រលានយន្តហោះលំដាប់អនរជាតិ តារាសាគរ ខេត្តកោះកុងផងដែរ។
ក្រៅពីអាកាសយានដ្ឋានអន្តរជាតិ ដូចជា ព្រលានយន្តហោះខេត្តមណ្ឌលគិរី កម្ពុជាក៏គ្រោងឱ្យមានអកាសយានដ្ឋាន ក្នុងស្រុកមួយចំនួនទៀតដូចជា អាកាសយានដ្ឋានបាត់ដំបង អាកាសយានដ្ឋានស្ទឹងត្រែង អាកាសយានដ្ឋានកោះកុង និងអាកាសយានដ្ឋានប៉ោយប៉ែតជាដើមនាពេលអានាគត។
លោកហូ វណ្ឌីអគ្គលេខាធិការសម្ព័ន្ធទេសចរណ៍ជាតិកម្ពុជាបានមានប្រសាសន៍ឱ្យដឹងថា ការធ្វើពិពិធកម្មព្រលានយន្តរបស់កម្ពុជា នាពេលបច្ចុប្បន្ននេះ គឺឆ្លើយតបទៅនឹងការដឹកជញ្ជូនតាមផ្លូវអាកាសនាពេលខាងមុខ និងសម្រាប់ធ្វើការប្រកួតប្រជែង ការដឹកជញ្ជូនតាមផ្លូវអាកាសនៅក្នុងតំបន់ និងនៅលើពិភពលោក។
លោកបន្តថា “វាជាចំណុចល្អខ្លាំងមែនទែន សម្រាប់ប្រទេសកម្ពុជា ព្រោះថាការដឹកជញ្ជូនតាមផ្លូវអាកាសនេះ គឺមានសារៈសំខាន់ណាស់ នៅក្នុងទសវត្សរ៍នេះ ពីព្រោះយើងដឹងហើយថា ការរីកចំរើននៅក្នុងប្រទេសនាមួយៗ វាមានការេប្រកួតប្រជែងគ្នាខ្លាំងណាស់” ។ លោកបន្ថែមថា “ការដឹកជញ្ជូនតាមផ្លូវការននេះ បាននឹងកំពុងមានការប្រកួតប្រជែងខ្ពស់ និងមានសក្តានុពលខ្លាំង ដោយមិនមែនប្រកួតប្រជែងឆ្នាំនោះទេ តែគេប្រកួតប្រជែងជាមួយនឹងពេលវេលា គេគិតខែ មកអាទិត្យ និងថ្ងៃ ហើយកន្លែងខ្លះគេគិតម៉ោងថែមទៀត” ។
លោកហូ វណ្ឌីបានបញ្ជាក់ថា ល្គឹកណាកម្ពុជា មិនជួបនូវវិបត្តិផ្សេងៗ ដូចជាវិបត្តិនយោបាយ វិបត្តិគ្រោះទុរភឹក្ស ឬ វិបត្តិជំងឺផ្សេងនោះទេ កម្ពុជានឹងទទួលបានការចាប់អារម្មណ៍ពីភ្ញៀវទេសចរ និងការវិនិយោគកាន់តែច្រើនថែមទៀត ពីព្រោះថា រាជរដ្ឋាភិបាលកម្ពុជា ចង់ឃើញនូវការអភិវឌ្ឍន៍ដ៏លេចធ្លោ និង ការប្រកួតប្រជែងខ្លាំងនៅក្នុងតំបន់ផងដែរ។
ជាមួយគ្នានេះលោកយិន លាងគង់អ្នកវិភាគសេដ្ឋកិច្ចសង្គមកម្ពុជាឯករាជ្យបានថ្លែងថា ការធ្វើដំណើរតាមផ្លូវអាកាសកាន់តែកើនឡើង និងពេញនិយម ដោយសារមានសុវត្ថិភាពខ្កស់ លឿន រហ័ស និងងាយស្រូលតភ្ជាប់ពាណិជ្ជកម្ម និងលំហូរទុនវិនិយោគផ្ទាល់រវាងប្រទេសនិមួយ។ ដោយមើលឃើញបែបនេះហើយ ទើ់បរាជរដ្ឋាភិបាលក្រោមការដឹកនាំរបស់សម្តេចតេជោ បានដាក់ចេញនូវយុទ្ឋសាស្ត្របើកចំហជើងមេឃ ដើម្បីទទួលការចុះចតពីយន្តហោះមកពីគ្រប់ទិសទី ដើម្បីទាក់ទាញភ្ញៀវទេសចរណ៍អន្តរជាតិ និងវិនិយោគិន។
លោកបន្តថា “ទន្ទឹមនឹងបណ្តាប្រទេសនានាលើពិភពលោក កំពុងលូតលាស់ផ្នែកសេដ្ឋកិច្ច ការប្រកួតប្រជែងគ្នាផ្នែកផ្លូវអាកាសបាននិងកំពុងកើនឡើង ហេតុនេះការសម្រេចចិត្តវិនិយោគព្រលានយន្តហោះ ជាគោលនយោបាយសេដ្ឋកិច្ចមួយ ដ៏ត្រឹមត្រូវដែលបានដាក់ចេញដោយរដ្ឋាភិបាល” ៕
