ដោយៈ ម៉ាណេត
ភ្នំពេញៈ ខេត្តស្វាយរៀង កំពុងទទួលបានគម្រោងវិនិយោគថ្មីៗជាបន្តបន្ទាប់ ដោយបានប្រកាសបោះទុនរាប់រយលានដុល្លារអាមេរិក និងបង្កើតឱកាសការងារជូនដល់ប្រជាពលរដ្ឋរាប់ម៉ឺននាក់ បើទោះបីជាស្ថិតក្នុងវិបត្តិកូវីដ១៩ ។
ជាក់ស្តែង រដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តគម្រោងវិនិយោគថ្មីចំនួន៤ ដែលបានបោះទីតាំងនៅខេត្តស្វាយរៀង ក្នុងកុម្ភៈកន្លងមកនេះ ខណៈគម្រោងថ្មីចំនួន៤នេះ បានប្រកាសទុនវិនិយោគប្រមាណ៩៨,២លានដុល្លារ។
គម្រោងទាំងនេះ រួមមានគម្រោងបង្កើតរោងចក្រផលិត សំបកកង់យានយន្ត គម្រោងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ គម្រោងបង្កើតរោងចក្រផលិតសម្ភារៈបរិក្ខារសម្រាប់ចង្ក្រាន BBQ, ផ្គុំតម្លើងបរិក្ខារអេឡិចត្រូនិក និងអំពូលភ្លើង និងគម្រោងបង្កើតរោងចក្រផលិតក្រណាត់ និងកាត់ដេរសម្លៀកបំពាក់ ជាដើម។
ជាមួយគ្នានេះដែរ ក្រុមហ៊ុន Sailun Group កាលពីខែមីនា ឆ្នាំ២០២១ បានពិចារណា បង្កើតរោងចក្រផលិតសំបកកង់រថយន្តដឹកអ្នកដំណើរ ដែលមានតម្លៃជាង១៨០លានដុល្លារនៅកម្ពុជា។
កាលពីថ្មីៗនេះ ក្រុមហ៊ុន WAN DA WEI YE INTERNATIONAL CO., LTD. បានប្រកាសពីគម្រោងបង្កើត រោងចក្រដំឡើងទោចក្រយាន ទោចក្រយានអគ្គិសនី (កង់អាគុយ) និងគ្រឿងបង្គុំគ្រប់ប្រភេទ ដែលមានទីតាំងស្ថិត នៅក្នុងតំបន់សេដ្ឋកិច្ចពិសេសតាយសេង បាវិត សង្កាត់បាវិត ក្រុងបាវិត ខេត្តស្វាយរៀង និងបោះទុនវិនិយោគប្រមាណ១.៧លានដុល្លារអាមេរិក។
លោកម៉ែន វិបុលអភិបាលខេត្តស្វាយរៀង ធ្លាប់មានប្រសាសន៍នាពេលកន្លងមកនេះថា នៅតំបន់មានសក្ដានុពលសំខាន់ៗ និងសមិទ្ធផល ដែលរដ្ឋបាលខេត្តស្វាយរៀងសម្រេចបានរួមមាន វិស័យសេដ្ឋកិច្ច ឧស្សាហកម្ម ពាណិជ្ជកម្ម និងកសិកម្មជាដើម ជាពិសេសខេត្ត បានក្លាយជាប្រភពការងារ ជូនដល់ប្រជាពលរដ្ឋទាំងក្នុងខេត្ត និងក្រៅខេត្តប្រមាណជាង៨ម៉ឺននាក់ បម្រើនៅក្នុងវិស័យឧស្សាហកម្ម រោងចក្រសហគ្រាស សេវាកម្ម និងកាស៊ីណូជាដើម។
លោកបានបន្តថា “ជាមួយនឹងភាពរីកចម្រើន និងការអភិវឌ្ឍន៍បង្កើតបានជាសមិទ្ធផលនានាជាច្រើននៅក្នុងខេត្ត ជាពិសេសលើផ្នែកហេដ្ឋារចនាសម្ព័ន្ធ បានធ្វើឱ្យសេដ្ឋកិច្ចក្នុងខេត្តមានភាពរីកចម្រើន។លោកបន្តថា “វិស័យអចលនទ្រព្យ និងលំនៅដ្ឋានក៏កំពុងមានប្រជាប្រិយភាព និងទទួលបានការវិនិយោគជាច្រើនគម្រោងដែរ ហើយក្នុងនោះគម្រោងលក់ដីឡូតិ៍កំពុងមានភាពផុសផុលផងដែរ” ៕
