ដោយៈ សុខុម
អង់គ្លេស: តម្លៃផ្ទះនៅប្រទេសអង់គ្លេស បានកើនឡើង២,១%នៅក្នុងខែមេសា ដែលជាការកើនឡើងប្រចាំខែខ្ពស់បំផុត ក្នុងរយៈពេលជាង១៧ឆ្នាំមកនេះ។
ការហក់ឡើងតម្លៃលំនៅដ្ឋាននេះ បានកើតឡើងក្រោយពីលោក Rishi Sunak រដ្ឋមន្ត្រីក្រសួងហិរញ្ញវត្ថុ បានសម្រេចពន្យារការបញ្ចុះពន្ធ លើការទិញលក់អចលនទ្រព្យដោយមិននឹកស្មានដល់។ នេះបើយោងតាមស្ថាប័នផ្ដល់កម្ចីទិញផ្ទះ Nationwide បានលើកឡើងកាលពីថ្ងៃសុក្រ ទី៣០ មេសា។
តម្លៃផ្ទះនៅពេលនេះគឺខ្ពស់ជាង៧,១%បើធៀបនឹងកម្រិតក្នុងខែមេសា ឆ្នាំ២០២០ នៅពេលការបិទខ្ទប់ ដើម្បីទប់ស្កាត់ការឆ្លងរាតត្បាតវីរុសកូវីដ-១៩ និងកំណើនធ្វើការងារពីផ្ទះបន្តជំរុញតម្រូវការផ្ទះដែលធំទូលាយជាងមុន។
លោក Robert Gardner ដែលជាអ្នកជំនាញសេដ្ឋកិច្ចជាន់ខ្ពស់ នៅស្ថាប័នផ្ដល់កម្ចីទិញផ្ទះ Nationwide បានលើកឡើងថា ការឡើងថ្លៃផ្ទះខ្លាំងក្នុងខែមេសា នេះគឺដោយសារការពន្យារពេល បញ្ចុះពន្ធលើការទិញលក់អចលនទ្រព្យ។
តាមពិតការបញ្ចុះពន្ធ លើការទិញលក់អចលនទ្រព្យ ត្រូវផុតកំណត់នៅចុងខែមីនា។ ប៉ុន្តែពេលនេះការទិញផ្ទះដំបូង ដែលមានតម្លៃ៦៩៧.០៥០ដុល្លារអាមេរិក នៅអង់គ្លេស ឬអៀរឡង់ខាងជើង នឹងនៅតែរួចពន្ធប្រថាប់ត្រា រហូតដល់ដំណាច់ខែមិថុនា ហើយការអនុគ្រោះពន្ធ លើផលចំណូលត្រឹម៣៤៦.០០០ដុល្លារអាមេរិក នឹងបន្តរហូតដល់ដំណាច់ខែកញ្ញា។
លោក Rishi Sunak បានដាក់ចេញវិធានការបញ្ចុះពន្ធនេះ នៅខែកក្កដា ឆ្នាំ២០២០ ក្នុងគោលបំណងជំរុញសន្ទុះទីផ្សារលំនៅដ្ឋាន បន្ទាប់ពីការលក់ផ្ទះបានដាំក្បាលចុះខ្លាំងអំឡុងពេលប៉ុន្មានខែដំបូង នៃការផ្ទុះការឆ្លងរាតត្បាតវីរុសកូវីដ-១៩ ។
តម្រូវការផ្ទះបានកើនឡើងខ្លាំង នៅពេលវិធានការរឹតបន្តឹងនានាធូរស្រាល។ អ្នកទិញជាច្រើន បានស្វែងរកផ្ទះធំទូលាយជាងមុន ដែលនៅឆ្ងាយពីកណ្ដាលក្រុង ព្រោះពួកគេបានចាប់ផ្តើមធ្វើការពីផ្ទះ ជាជាងធ្វើដំណើរទៅធ្វើការនៅការិយាល័យ។
ទិន្នន័យចុងក្រោយពីការិយាល័យជាតិស្ថិតិបង្ហាញថា តម្លៃផ្ទះនៅខែកុម្ភៈ ខ្ពស់ជាង៨,៤% បើធៀបនឹងកម្រិតក្នុងឆ្នាំ២០២០ ដែលជាការកើនឡើងប្រចាំឆ្នាំខ្ពស់បំផុតចាប់តាំងពីឆ្នាំ២០១៤ ។
ស្ថាប័នផ្ដល់កម្ចីទិញផ្ទះ Nationwide និយាយថា តម្លៃផ្ទះនឹងកើនឡើងបន្ថែមទៀតនៅប៉ុន្មានខែខាងមុខ ដោយសារស្ថិរភាពនៃការផ្គត់ផ្គង់លំនៅដ្ឋាន និងកំណើនពលរដ្ឋដែលចង់រើចេញពីផ្ទះតូចចង្អៀត នៅកណ្ដាលក្រុង ទៅរស់នៅផ្ទះជាយក្រុងដែលធំទូលាយអំឡុងពេលឆ្លងរាតត្បាតវីរុសកូវីដ-១៩ ។
ទោះជាយ៉ាងណា លោក Howard Archer អ្នកជំនាញសេដ្ឋកិច្ចនៅក្រុមហ៊ុនព្យាករណ៍សេដ្ឋកិច្ចរបស់អង់គ្លេស EY ITEM Club បានព្យាករថា តម្លៃផ្ទះប្រចាំឆ្នាំនឹងធ្លាក់ចុះវិញនៅដំណាច់ឆ្នាំនេះ ហើយថាតម្លៃអាចនឹងធ្លាក់ចុះប្រចាំត្រីមាស៕
