ដោយៈសាវុធ
បាងកកៈ ក្រមហ៊ុនបដិសណ្ឋារកិច្ច Collective Hospitality (CH) ដែលជាម្ចាស់ និងប្រតិបត្តិករនៃសណ្ឋាគារ Slumber Party Hostels (SHG) Path និង Socialtel បានទទួលបានជោគជ័យ ក្នុងការទិញយកក្រុមហ៊ុន Bodega Hostels ដើម្បីក្លាយជាក្រុមហ៊ុនសណ្ឋាគារធំជាងគេនៅអាស៊ីអាគ្នេយ៍ និងធំជាងគេលំដាប់ទី៤ លើពិភពលោក ដោយមានសណ្ឋាគារចំនួន២៥កន្លែង នៅទូទាំងប្រទេសថៃ ឥណ្ឌូនេស៊ី និងកម្ពុជា។
លោក Edmund Lowman ស្ថាបនិកនៃសណ្ឋាគារ SHG និងជានាយកប្រតិបត្តិនៃក្រុមហ៊ុនបដិសណ្ឋារកិច្ច Collective Hospitality បានថ្លែងថា “ការទិញយកនេះ គឺជាសកម្មភាពយុទ្ធសាស្ត្រមួយ ដែលមានគោលបំណងបង្កើន ចំណែកទីផ្សាររបស់យើង និងពង្រីកកម្លាំងជំនាញ មកកាន់ក្រុមហ៊ុនរបស់យើង” ។ នេះបើយោងតាមការចេញផ្សាយរបស់កាសែតបាងកកប៉ុស្តិ៍ នៅថ្ងៃទី២៣ ខែមេសា ឆ្នាំ២០២១ ។
វិបត្តិជំងឺកូវីដ១៩ បានធ្វើឱ្យពិភពលោក ស្ថិតក្នុងភាពជាប់គាំង ខណៈឧស្សាហកម្មទេសចរណ៍ពិភពលោក ជួបបញ្ហានេះអស់ក្នុងរយៈពេល១២ខែកន្លងមកនេះ។ ទោះយ៉ាងណា ក្រុមហ៊ុនបដិសណ្ឋារកិច្ច Collective Hospitality បានរកឃើញនូវការពង្រីកឱកាសអាជីវកម្មសំខាន់ៗ អំឡុងពេលវិបត្តិនេះ។
ក្រុមហ៊ុនបានរំពឹងថា គំរូអាជីវកម្ម ដែលផ្តោតលើភាពខ្លាំង និងបទពិសោធន៍របស់ខ្លួននឹងទទួលបានជោគជ័យ ក្នុងការប្រកួតប្រជែង នៅពេលវិបត្តិកូវីដ១៩ ។
លោក Lowman បានមានប្រសាសន៍ថា “ការអនុវត្តគំរូអាជីវកម្មរបស់យើងនឹងបន្ថែមតម្លៃដល់ទ្រព្យសម្បត្តិដែលទទួលបានថ្មីៗ តាមរយៈការធ្វើពិពិធកម្ម នៃប្រាក់ចំណូ លការអភិវឌ្ឍ នៃវត្តមានយីហោ និងការគាំទ្រជាយុទ្ធសាស្ត្រកណ្តាល” ។ លោកបានថ្លែងថា “នៅពេលការចែកចាយវ៉ាក់សាំងបានគ្រប់គ្រាន់ វិស័យទេសចរណ៍មានការស្ទុះងើបឡើងវិញយ៉ាងឆាប់រហ័ស” ។
សម្រាប់ទ្វីបអាស៊ី ការងើបឡើងវិញជាបណ្តើរៗ និងការត្រឡប់មកសភាពដើមវិញ ត្រូវបានរំពឹងថា នឹងកើតឡើងក្នុងរយៈពេល៣-៥ឆ្នាំខាងមុខនេះ។
ទោះបីជាសេដ្ឋកិច្ចកំពុងជួបការលំបាកក៏ដោយ ក្រុមហ៊ុន SHG នៅតែអាចបន្តរីកចម្រើន ដោយក្រុមហ៊ុនប្រកាសជាផ្លូវការ នូវការបញ្ចប់នូវការបញ្ចប់ការសាងសង់ នូវសណ្ឋាការ Socialtel របស់ខ្លួន៕
