ដោយៈ ម៉ាណេត
ភ្នំពេញៈ អ្នកជំនាញអចលនទ្រព្យបានឱ្យដឹងថា ស្ថិតវិបត្តិជំងឺកូវីដ១៩នេះ វិស័យអចលនទ្រព្យ នៅកម្ពុជាប្រឈមនឹងភាពថមថយ ដោយជៀសមិនផុតនោះទេ ប៉ុន្តែសកម្មភាពទិញលក់អចលនទ្រព្យមួយចំនួននៅតែកើតមាន។
ប្រធានសមាគមនអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានឱ្យដឹងកាលសប្តាហ៍កន្លងមកនេះថា វិស័យនេះ គឺមិនទាន់ឈានដល់បន្ទាត់ក្រហមនៅឡើយទេ ខណៈវិនិយោគិនក្នុងស្រុកនៅតែសំខាន់បំផុត ក្នុងការជំរុញកំណើនវិស័យអចលនទ្រព្យ និងសេដ្ឋកិច្ចកម្ពុជា។
ជាក់ស្ដែងសម្រាប់វិស័យអចលនទ្រព្យ ទោះបីស្ថិតក្នុងវិបត្តិកូវីដ១៩ ដែលធ្វើឲ្យវិនិយោគិនក្រៅស្រុកខកខាន មិនបានមកវិនិយោគកម្ពុជា ប៉ុន្ដែសកម្មភាពវិនិយោគិនក្នុងស្រុកនៅដំណើរការ។
លោកបានឱ្យដឹងថា “អ្នកវិនិយោគក្នុងស្រុកនៅតែដើរតួនាទីសំខាន់ ក្នុងការជំរុញកំណើនអចលនទ្រព្យ និងសេដ្ឋកិច្ចនៅកម្ពុជាបានមួយភាគធំ។ សម្រាប់វិបត្តិកូវីដ១៩នេះ ក៏ជាការផ្ដល់ឱកាស ក្នុងការរៀនសូត្រអំពីភាពប្រឈម ក្នុងវិបត្តិបញ្ហាលើពិភពលោកផងដែរ។ លោកបន្តថា “បន្ទាប់ពីឆ្លងកាត់វិបត្តិនេះ នឹងធ្វើឲ្យប្រជាជនកម្ពុជា មានភាពរឹងមាំ ចាស់ទុំ និងអាចដោះស្រាយនៅពេលមានវិបត្តិ នៅពេលក្រោយៗទៀត” ។
លោកច្រឹក សុខនីមបានបញ្ជាក់ថា អ្នកវិនិយោគនឹងចាប់ផ្ដើមធ្វើដំណើរ នៅពេលទទួលបានវ៉ាក់សាំងកូវីដ១៩ និងប្រទេសដែលត្រូវទៅវិនិយោគ មានវ៉ាក់សាំងដូចគ្នា។ បច្ចុប្បន្នទោះបីកម្ពុជា ទទួលបានវ៉ាក់សាំងកូវីដ១៩រួចរាល់ក្ដី ប៉ុន្ដែប្រទេសដទៃទៀតមិនទាន់ ទទួលបានពេញលេញ។
លោកបន្ដថា “ខ្ញុំមើលឃើញថា អចលនវត្ថុកម្ពុជា អាចប្រឈមនឹងការថមថយខ្លះ ដោយសារវិបត្តិកូវីដ១៩ ប៉ុន្ដែវិស័យនេះមិនទាន់ឈានដល់បន្ទាត់ក្រហម ឬការដួលរលំនោះទេ។
និយាយពីវិស័យអចលនទ្រព្យ មន្ដ្រីជាន់ខ្ពស់រាជរដ្ឋាភិបាល ក៏ធ្លាប់បានឲ្យដឹងថា វិស័យនេះ ជាជន្ទល់យ៉ាងរឹងមាំ ក្នុងការលើកស្ទួយសេដ្ឋកិច្ចជាតិ ក្នុងអំឡុងពេលនៃការរីករាលដាន នៃជំងឺកូវីដ១៩ផងដែរ៕
