ដោយៈវឌ្ឈនៈ
ប្រទេសចិនៈ ក្រុងសៀងហៃ ប្រទេសចិន បានជាប់ចំណាត់ថ្នាក់កំពូលក្នុងចំណោមទីក្រុងជម្រើសទាំង២៥ នៅទូទាំងពិភពលោក ដែលក្លាយជាទីក្រុងមានទំនិញថ្លៃបំផុតក្នុងពិភពលោក និងជាទីតាំងសម្រាប់តែអ្នកមានទ្រព្យស្ដុកស្ដម្ភរស់នៅ។
ក្រុងហុងកុង ដែលកាលពីឆ្នាំមុនបានជាប់ចំណាត់ថ្នាក់លេខ១ បានធ្លាក់ដល់ចំណាត់ថ្នាក់លេខ៣ នៅក្នុងឆ្នាំ២០២១នេះ។ ចំណែកឯក្រុងតូក្យូ ប្រទេសជប៉ុនរក្សាចំណាត់ថ្នាក់លេខ២ដដែល។
ម៉ូណាកូ ដែលជាប្រទេសមានទ្រព្យស្តុកស្តម្ភតូចមួយ នៅអឺរ៉ុបខាងលិច បានជាប់ចំណាត់ថ្នាក់លេខ៤ ហើយក្រុងតៃប៉ិ នៃកោះតៃវ៉ាន់ ជាប់ចំណាត់ថ្នាក់លេខ៥ ។
យោងតាមរបាយការណ៍ថ្មីមួយមានឈ្មោះថា “របាយការណ៍ស្តីពីទ្រព្យសម្បត្តិ និងបែបបទរស់នៅបែបស៊ីវិល័យ ទូទាំងពិភពលោកប្រចាំឆ្នាំ២០២១” (Global Wealth and Lifestyle Report 2021) របស់ធនាគារស្វ៊ីស Bank Julius Baer បង្ហាញអាស៊ី នៅតែបន្តក្លាយជាតំបន់ ដែលមានទំនិញថ្លៃបំផុតក្នុងពិភពលោក បើទោះបីជាផ្ទុះវិបត្តិកូវីដ-១៩ យ៉ាងណាក្ដី។
យោងតាមរបាយការណ៍ប្រចាំឆ្នាំនេះឱ្យដឹងថា ទីក្រុងចំនួន៤ ក្នុងចំណោមទីក្រុងមានទំនិញថ្លៃបំផុតទាំង៥ សម្រាប់ពលរដ្ឋដែលមានទ្រព្យសម្បត្តិ ចាប់ពី១លានដុល្លារឡើងទៅនៅពេលនេះ សុទ្ធតែស្ថិតនៅក្នុងតំបន់អាស៊ី។ ចំណែកអឺរ៉ុប និងតំបន់មជ្ឈិមបូព៌ា ឈរនៅចំណាត់ថ្នាក់លេខ២ ។
ទន្ទឹមនេះ ទ្វីបអាមេរិក ដែលរងគ្រោះធ្ងន់ធ្ងរ ដោយសារការឆ្លងរាតត្បាតវីរុសកូវីដ-១៩ បានក្លាយជាតំបន់ ដែលមានទំនិញថោកជាងគេបំផុត ដោយសាររូបិយប័ណ្ណដុល្លារអាមេរិក និងដុល្លារកាណាដា ធ្លាក់ថ្លៃទល់នឹងរូបិយប័ណ្ណសំខាន់ៗ ផ្សេងទៀតទូទាំងពិភពលោក។
របាយការណ៍នេះបញ្ជាក់ថា ការដាក់ចំណាត់ថ្នាក់នេះ គឺធ្វើឡើងផ្អែកទៅលើតម្លៃទំនិញប្រណីតៗមួយចំនួន នៅក្នុងទីក្រុងជម្រើសទាំង២៥ទូទាំងពិភពលោក៕
