ដោយៈលក្ខិណា
ភ្នំពេញៈ កាលពីមុន អ្នកជាប់ពន្ធមិនថាពន្ធអាជីវកម្មពន្ធផ្សេងៗទៀត នៅពេលបង់ពន្ធ ត្រូវធ្វើដំណើរទៅកាន់សាខាពន្ធដារណាមួយ ដើម្បីបង់ពន្ធទៅអគ្គនាយកដ្ឋាន ដែលមាននីតិវិធីស្មុគ្រស្មាញ និងប្រើពេលវេលាយូរ តែពេលនេះអគ្គនាយកដ្ឋានពន្ធដារបានសហការជាមួយធនាគារ ដើម្បីឱ្យអ្នកជាប់ពន្ធបង់ពន្ធតាមធនាគារវិញ ហើយអគ្គនាយក ដ្ឋានជាអ្នកយកទឹកប្រាក់នោះពីធនាគារវិញ។
ដំបូងឡើយមានធនាគារតែប្រមាណពីរ ឬបីប៉ុណ្ណោះ ដែលបានសហការជាមួយពន្ធដារតែមកដល់ពេលនេះ ធនាគារកាន់តែច្រើន បានចូលរួមសហការជាមួយពន្ធដារដើម្បីសម្រួលក្នុងការប្រមូលពន្ធ។
លោកគង់ វិបុលរដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា រហូតមកដល់ពេលនេះ អគ្គនាយកដ្ឋានពន្ធដារ បានសហការជាមួយធនាគារជាច្រើន ក្នុងប្រទេសកម្ពុជា ដើម្បីអនុញ្ញាតឱ្យអ្នកជាប់ពន្ធកាន់តែងាយស្រួល និងមិនកកស្ទះពេលដល់ខែបង់ពន្ធម្ដងៗ។
លោកបន្តថា “ពេលនេះពន្ធដារបានសហការជាមួយ ធនាគារចំនួន៧ហើយ ក្នុងនោះរួមមាន ធនាគារ វឌ្ឍនៈ ធនាគារកាណាឌីយ៉ា អេស៊ីលីដា ធនាគារ JTrust Royal ធនាគារកម្ពុជាសាធារណៈ ធនាគារស្ថាបនា និងសាខាពន្ធដារ ខេត្ត ខណ្ឌ/ស្រុក ទូទាំងប្រទេសផងដែរ”។លោកបន្តថា “មានធនាគារមួយចំនួនទៀត បានដាក់ពាក្យស្នើសុំសហការជាមួយពន្ធដារ តែខាងពន្ធដារកំពុងពិនិត្យមើលលទ្ធភាព និងលក្ខណៈសម្បត្តិក្នុងការផ្ដល់សេវាដល់អ្នកជាប់ពន្ធ”។
លោកគង់ វិបុលបានបន្ថែមថា អ្នកជាប់ពន្ធដែលជាអតិថិជន របស់ធនាគារមួយចំនួន ដែលបានសហការជាមួយពន្ធដារ ក៏កាន់តែងាយស្រួលថែមទៀត តាមរយៈការបង់ពន្ធតាមទូរសព្ទ ដោយមិនប្រើក្រដាសប្រាក់ ( E-Payment ) បានដោយមិនចាំបាច់ធ្វើដំណើរទៅកាន់បញ្ជរធនាគារ ឬការិយាល័យរបស់ធនាគារនោះទេ គ្រាន់តែទាញកម្មវិធីទូទាត់តាមApp អាចទូតទាត់ឬបង់ពន្ធមកកាន់ពន្ធដារបានហើយ ៕
