ដោយ: សហសេវិក
អន្តរជាតិ: ប្រទេសកូរ៉េខាងត្បូងគ្រោងកែសម្រួលពន្ធលើអចលនទ្រព្យ ក្នុងគោលបំណងដាក់ពន្ធខ្ពស់ជាងមុនលើម្ចាស់ផ្ទះដែលមានទ្រព្យសម្បត្តិស្តុកស្តម្ភ ដើម្បីស្តារស្ថិរភាពទីផ្សារលំនៅឋាន។
ការប្រកាសនេះបានកើតឡើងបន្ទាប់ពីកិច្ចប្រជុំបិទទ្វារមួយរបស់លោកប្រធានាធិបតី Lee Jae Myung ដែលក្នុងនោះទីផ្សារភាគហ៊ុន និងអចលនទ្រព្យក្នុងស្រុកត្រូវបានលើកមកពិភាក្សា ខណៈរដ្ឋាភិបាលព្យាយាមបន្ថយការមិនពេញចិត្តរបស់សាធារណជនចំពោះតម្លៃផ្ទះខ្ពស់ និងការប្រែប្រួលខ្លាំងនៃទីផ្សារភាគហ៊ុន។
លោក Koo Yun-cheol រដ្ឋមន្ត្រីក្រសួងហិរញ្ញវត្ថុ បានអះអាងថា «យើងនឹងកែទម្រង់ពន្ធលើអចលនទ្រព្យតាមវិធីសមហេតុផល ដើម្បីបង្កើតទីផ្សារលំនៅឋានដែលផ្តោតលើការរស់នៅ ក្រោមគោលការណ៍ «ផ្ទះគឺជាកន្លែងសម្រាប់រស់នៅ មិនមែនសម្រាប់ទិញនោះទេ»។
លោក Koo បានលើកឡើងថា «សម្រាប់គ្រួសារដែលមានផ្ទះតែមួយខ្នង បន្ទុកពន្ធនឹងថយចុះ ប្រសិនបើផ្ទះរបស់ពួកគេមានតម្លៃក្រោម ៣ ពាន់លានវ៉ុន (២,១ លានដុល្លារអាមេរិក)។
ស្របពេលមានក្តីបារម្ភអំពីការហក់ឡើងនៃប្រាក់ចំណូលក្នុងឧស្សាហកម្មបន្ទះឈីប ដែលនាំឱ្យមានអតិផរណាខ្ពស់ និងការហក់ឡើងនៃតម្លៃផ្ទះ ធនាគារកណ្តាលកូរ៉េបានដំឡើងអត្រាការប្រាក់កាលពីខែមុន។
នេះជាការដំឡើងអត្រាការប្រាក់ជាលើកដំបូងក្នុងរយៈពេលបីឆ្នាំកន្លះ ហើយធនាគារកណ្តាលកូរ៉េខាងត្បូងបានផ្តល់សញ្ញាថា នឹងមានការដំឡើងអត្រាការប្រាក់បន្ថែមទៀតនាពេលខាងមុខ៕
