ដោយៈ គង់ សូរិយា
ភ្នំពេញៈ កម្ពុជា បានទទួលភ្ញៀវបរទេសប្រមាណ៥,៤លាននាក់នៅក្នុងឆ្នាំ២០២៣ កើនឡើងជិត ១៤០ភាគរយ បើធៀបនឹងឆ្នាំ២០២២ ក្នុងនោះភ្ញៀវមកពីប្រទេសចំនួន៤ ក្នុងតំបន់អាស៊ី បានគ្របដណ្តប់ជិត ៧០ភាគរយ នៃចំនួនភ្ញៀវបរទេសសរុប។
យោងតាមរបាយការណ៍ របស់ក្រសួងទេសចរណ៍បានបង្ហាញថា ក្នុងចំណោមភ្ញៀវទាំងអស់ គឺភ្ញៀវមកពីប្រទេសចំនួន៤បានគ្របដណ្តប់៦៨,៩ភាគរយនៃចំនួនភ្ញៀវសរុប ដោយក្នុងនោះភ្ញៀវមកពីប្រទេសថៃ មានចំនួនច្រើនជាងគេមានចំនួន១,៨២០,៤៦០ នាក់ ស្មើនឹង ៣៣,៤ភាគរយ នៃចំនួនភ្ញៀវបរទេសសរុប វៀតណាម១,០១៩, ៨១២ នាក់ ស្មើនឹង១៨,៧ ភាគរយ។ ចិន៥៤៧, ៧៩៨ នាក់ ស្មើនឹង ១០ភាគរយ និងភ្ញៀវទេសចរណ៍មកពីឡាវ៣៧២,២៨៥ នាក់ស្មើនឹង ៦,៨ ភាគរយ។
ក្រៅពីប្រទេសទាំង៤ខាងលើ ក៏មានភ្ញៀវមកពីប្រទេសជាច្រើនទៀតដូចជា អាមេរិក កូរ៉េ ឥណ្ឌូនេស៊ី បារាំង ចក្រភពអង់គ្លេស និងម៉ាឡេស៊ីជាដើម។
ប្រធានសមាគមមគ្គុទ្ទេសក៍ទេសចរអង្គរ (ខេត្តសៀមរាប) លោកខៀវ ធី បានមានប្រសាសន៍ថា ភ្ញៀវទេសចរបរទេសដែលធ្វើដំណើរមកកម្ពុជាក្នុងឆ្នាំ២០២៣ បានកើនឡើងគួរឱ្យកត់សម្គាល់ បើធៀបនឹងអំឡុងឆ្នាំ២០២០-២០២២ ដែលពិភពលោកស្ថិតក្រោមការគំរាមកំហែងខ្លាំងពីវិបត្តិកូវីដ១៩។
លោកបន្តថា “ភាគច្រើននៃភ្ញៀវបរទេស ចូលមកកម្ពុជានាអំឡុងពេល ៣-៤ ឆ្នាំចុងក្រោយ គឺជាប្រជាជននៅប្រទេសជិតខាង ឬក្នុងតំបន់អាស៊ី”។លោកបន្តថា មូលហេតុដែលភ្ញៀវភាគច្រើន ជាអ្នកនៅក្នុងតំបន់ គឺដោយសារកំណើនសេដ្ឋកិច្ចពិភពលោក មិនទាន់ល្អដែលជំរុញឱ្យអ្នកទេសចរ មិនចង់ធ្វើដំណើរទៅឆ្ងាយ និងចំណាយច្រើន។
លោកខៀវ ធីបានបន្ថែមថា ក្នុងឆ្នាំកន្លងមកយើងពិតជាឃើញមានកំណើនភ្ញៀវបរទេសច្រើន បើធៀបនឹងឆ្នាំ២០២២ ប៉ុន្តែភ្ញៀវដែលមកកម្សាន្តនៅកម្ពុជាភាគច្រើន គឺជាអ្នកមកពីប្រទេសជាប់ព្រំដែន ឬនៅក្នុងតំបន់តែប៉ុណ្ណោះ។
ប្រធានសមាគមមគ្គុទេសក៍ទេសចរណ៍ ភាសាចិនកម្ពុជាប្រចាំខេត្តសៀមរាប លោក អនហេង សុភ័ក្របានមានប្រសាសន៍ថា បើនិយាយពីចំនួនភ្ញៀវទេសចរបរទេស ពិសេសជនជាតិចិនក្នុងឆ្នាំ ២០២៣ គឺពិតជាកើនឡើងច្រើនធៀបនឹងឆ្នាំ ២០២២ ប៉ុន្តែបើធៀបមុនឆ្នាំ២០២០ គឺនៅមានកម្រិតតិចនៅឡើយ។
លោកបន្តថា “កំនើនភ្ញៀវបរទេស ដែលធ្វើដំណើរមកកម្សាន្តកម្ពុជា ក៏មានការប្រែប្រួល ទៅតាមស្ថានភាពសេដ្ឋកិច្ច និងជើងហោះហើរអន្តរជាតិផងដែរ”។លោកបន្តថា “ខ្ញុំពុំសូវស៊ីជម្រៅនឹងចំនួនភ្ញៀវទេសចរមកពីប្រទេសណាទេ ប៉ុន្តែបើសម្រាប់ភ្ញៀវទេសចរចិន គឺពិតជាកើនឡើងជាងឆ្នាំ២០២២ ហើយក៏សង្ឃឹមថា នៅក្នុងឆ្នាំ ២០២៤ នេះនឹងបន្តមានការកើនឡើងថែមទៀត”៕
