ដោយៈ សុខុម
រីយ៉ាដ: ប្រទេសអារ៉ាប៊ីសាអូឌីត កំពុងសម្រុកសកម្មភាពសាងសង់សណ្ឋាគារឈានមុខគេបង្អស់ ប្រចាំតំបន់មជ្ឈិមបូព៌ា និងទ្វីបអាហ្រ្វិក ជាមួយនឹងបន្ទប់ជាង៤០.០០០បន្ទប់ កំពុងស្ថិតក្រោមការសាងសង់គិតត្រឹមខែមីនា។
ទិន្នន័យចុងក្រោយពីក្រុមហ៊ុនឃ្លាំមើល ឧស្សាហកម្មសណ្ឋាគារ STR បានបង្ហាញថា ជាមួយនឹងបន្ទប់សណ្ឋាគារ ចំនួន៤២.០៣៣ ប្រទេសអារ៉ាប៊ីសាអូឌីត គ្របដណ្ដប់រហូតដល់ទៅ៣៥,១%នៃបន្ទប់សណ្ឋាគារសរុប១១៩.៥០៥បន្ទប់ ដែលកំពុងសាងសង់នៅក្នុងតំបន់។ នេះបើយោងតាមសារព័ត៌មាន Arab News ចុះផ្សាយនៅថ្ងៃច័ន្ទ ទី២៤ ខែមេសា នេះ។
តួលេខនេះ ធ្វើឱ្យប្រទេសអារ៉ាប៊ីសាអូឌីត តាមប្រកិតពីក្រោយពីប្រទេសចិន ដែលបច្ចុប្បន្នមានបន្ទប់សណ្ឋាគារ ចំនួន២៩៩.៤៥៨បន្ទប់ស្ថិតក្រោមការសាងសង់ និងសហរដ្ឋអាមេរិក ដែលបច្ចុប្បន្នមានបន្ទប់សណ្ឋាគារ ចំនួន១៥៤.២៨៤បន្ទប់ ដែលស្ថិតក្រោមការសាងសង់។
របាយការណ៍ដដែលបង្ហាញថា មានតែមជ្ឈិមបូព៌ា និងអាហ្រ្វិក ប៉ុណ្ណោះ ដែលទទួលបានកំណើនចំនួនបន្ទប់ សណ្ឋាគារសរុបក្រោមកិច្ចសន្យា៦,៤% ឈានដល់២៤៩.១៥០បន្ទប់ ក្នុងខែមីនា ឆ្នាំ២០២៣ បើធៀបនឹងរយៈពេលដូចគ្នាកាលពីឆ្នាំមុន។
តំបន់នេះមានបន្ទប់ចំនួន៨៤.១១៦ ស្ថិតក្នុងផែនការ និងបន្ទប់ចំនួន៤៥.៥២៩ ស្ថិតក្នុងដំណាក់កាលផែនការចុងក្រោយ។
ទន្ទឹមនេះ ប្រទេសអារ៉ាប់រួមអេមីរ៉ាត ក៏បានដើរតួនាទីយ៉ាងសំខាន់ដែរ ក្នុងកំណើនវិស័យសណ្ឋាគារក្នុងតំបន់ ដោយមានបន្ទប់សណ្ឋាគារចំនួន២២.៣២៥ ស្ថិតក្រោមការសាងសង់ ដែលគ្របដណ្ដប់១៨,៦%នៃចំនួនសរុប។
ប្រទេសអារ៉ាប់រួមអេមីរ៉ាត មានចំនួនបន្ទប់ដែលកំពុងសាងសង់ខ្ពស់បំផុតទី៣ ក្នុងពិភពលោក ដោយវ៉ាដាច់ប្រទេសធំៗឈានមុខគេនៅអឺរ៉ុប រួមមានប្រទេសអាល្លឺម៉ង់ និងប្រទេសអង់គ្លេស៕ Arab News៕
