NATO ទទួលស្គាល់ថា ខ្លួនត្រូវបង្កើនការត្រៀមខ្លួន និងពង្រឹងសមត្ថភាពសព្វាវុធបន្ថែមទៀតដើម្បីទប់ជាមួយរុស្ស៊ី

ដោយ៖ សុខុម

ក្រុងឡាអេ: ប្រមុខអង្គការបក្សសម្ព័ន្ធមិត្តយោធា NATO បាននិយាយ កាលពីថ្ងៃអង្គារ ទី១៤ ខែមិថុនាថា អង្គការ NATO ត្រូវបង្កើន “ការត្រៀមខ្លួនកាន់តែខ្ពស់” និងពង្រឹងសមត្ថភាពរបស់ខ្លួនផ្នែកសព្វាវុធ នៅតាមព្រំដែនភាគខាងកើតរបស់ខ្លួន បន្ទាប់ពីរុស្ស៊ីបញ្ឆេះសង្គ្រាមចូលឈ្លានពានអ៊ុយក្រែន។

អគ្គលេខាធិការអង្គការ NATO លោក Jens Stoltenberg បានថ្លែងបែបនេះ បន្ទាប់ពីកិច្ចពិភាក្សាក្រៅផ្លូវការនៅក្នុងប្រទេសហូឡង់ ជាមួយនាយករដ្ឋមន្ត្រីហូឡង់ Mark Rutte និងមេដឹកនាំនៃប្រទេសដាណឺម៉ាក ប៉ូឡូញ ឡាតវី រូម៉ានី ព័រទុយហ្គាល់ និងបែលហ្ស៊ិក នៅមុនកិច្ចប្រជុំកំពូលរបស់អង្គការ NATO នៅទីក្រុង Madrid ប្រទេសអេស្ប៉ាញ នៅចុងខែនេះ។ នេះបើយោងតាមសារព័ត៌មាន Reuters ចុះផ្សាយនៅថ្ងៃពុធ ទី១៥ ខែមិថុនា នេះ។

ឆ្លើយតបទៅនឹងការអំពាវនាវរបស់ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃអង្គារសប្ដាហ៍នេះ ដែលបានស្នើសុំអាវុធបាញ់រយៈចម្ងាយឆ្ងាយបន្ថែមទៀត លោក Jens Stoltenberg និយាយថា លោកបានយល់ស្របថា ទីក្រុងគៀវ (អ៊ុយក្រែន) គួរតែទទួលបានការផ្គត់ផ្គង់អាវុធធុនធ្ងន់បន្ថែមទៀត ប៉ុន្តែមិនបានផ្តល់ព័ត៌មានលម្អិតនោះទេ។

នៅពេលសួរអំពីសំណើរបស់ប្រទេសស៊ុយអែត និងហ្វាំងឡង់ ដែលសុំចូលជាសមាជិកអង្គការ NATO លោក Jens Stoltenberg  បានឆ្លើយថា លោកកំពុងស្វែងរក “ផ្លូវបោះជំហានឆ្ពោះទៅមុខ ដែលមានការរួបរួមសាមគ្គី” ដើម្បីដោះស្រាយការប្រឆាំងជំទាស់ពីប្រទេសតួកគី ដែលមានកំហឹងចំពោះស៊ុយអែត ដែលបានគាំទ្រពួកសកម្មប្រយុទ្ធឃឺដ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ទន្ទឹមនេះ លោក Jens Stoltenberg បានគូសបញ្ជាក់ថា អង្គការ NATO នឹងពង្រឹងសម្ព័ន្ធមិត្តបន្ថែមទៀតផងដែរ នៅពេលប្រទេសជាសមាជិកទាំង៣០នឹងត្រូវកោះប្រជុំនៅក្នុងទីក្រុង Madrid ប្រទេសអេស្ប៉ាញ នៅថ្ងៃទី២៩-៣០ ខែមិថុនា៕

LEAVE A REPLY

Please enter your comment!
Please enter your name here