វៀតណាម ទទួលបានរំហូរ FDI ជាង ២ពាន់លានដុល្លារអាមេរិក្នុងដើមខែមករាឆ្នាំនេះ

ដោយៈសុខុម

ហាណូយ: គ្រាន់តែនៅខែមករា ដើមឆ្នាំ២០២២ នេះ ប្រទេសវៀតណាម ទទួលបានរំហូរវិនិយោគផ្ទាល់ពីបរទេស (FDI) រហូតដល់ទៅជាង២,១ពាន់លានដុល្លារអាមេរិក ដោយកើនឡើង៤,២% ហើយនេះជាសញ្ញាដ៏ល្អ សម្រាប់ការទាក់ទាញការវិនិយោគរបស់ប្រទេសនេះ។ នេះបើយោងតាមរបាយការណ៍ចុងក្រោយ របស់ទីភ្នាក់ងារវិនិយោគបរទេស (FIA)។

ក្រោយស្ទុះងើបឡើងវិញពីវិបត្តិកូវីដ-១៩ នៅចុងឆ្នាំ២០២១ក្រុមហ៊ុនសហគ្រាសជាច្រើន ដែលទទួលបានការវិនិយោគពីបរទេស ចាប់ផ្ដើមរក្សាបាននូវស្ថិរភាព និងបានពង្រីកអាជីវកម្ម ហើយបង្កើនសកម្មភាពផលិតកម្មរបស់ខ្លួន។

ទីភ្នាក់ងារវិនិយោគបរទេស (FIA) បានលើកឡើងតាមរយៈរបាយការណ៍របស់ខ្លួនថា ការបញ្ចេញការវិនិយោគផ្ទាល់ពីបរទេស (FDI) ក៏ទទួលបានកំណើន៦,៨%ដែរ ឈានដល់ជាង១,៦១ពាន់លានដុល្លារអាមេរិក អំឡុងខែទី១ ដើមឆ្នាំនេះ។

យោងតាមរបាយការណ៍នេះបង្ហាញថា គម្រោងវិនិយោគបរទេសថ្មីៗរហូតដល់ទៅ១០៣គម្រោង ត្រូវបានផ្តល់អាជ្ញាប័ណ្ណ ជាមួយនឹងដើមទុនចុះបញ្ជីសរុប ជិត៣៨៨លានដុល្លារអាមេរិក ពោលគឺខ្ពស់ជាង២,២ដងបើធៀបនឹងខែមករា ដើមឆ្នាំ២០២១ បើគិតពីចំនួនគម្រោង ប៉ុន្តែធ្លាក់ចុះ៧១%បើគិតពីទំហំតម្លៃគម្រោង។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ទីភ្នាក់ងារវិនិយោគបរទេស (FIA) និយាយថា ទោះបីជាដើមទុនវិនិយោគដែលបានចុះបញ្ជីមានការថយចុះ បើធៀបនឹងរយៈពេលដូចគ្នាកាលពីឆ្នាំមុន ដោយសារកង្វះគម្រោងខ្នាតធំយ៉ាងណាក្ដី ក៏ការកំណើននៃចំនួនគម្រោងវិនិយោគថ្មីៗ បានបង្ហាញពីទំនុកចិត្តរបស់វិនិយោគិនបរទេស មកលើបរិយាកាសវិនិយោគនៅក្នុងប្រទេសវៀតណាម។

តាមការរំពឹងទុក ការពង្រីកអាជីវកម្ម របស់ក្រុមហ៊ុនបរទេសជាច្រើនទៀត ក្នុងប្រទេសដែលជាសមាជិកអាស៊ាន មួយនេះរួមទាំងក្រុមហ៊ុនកូរ៉េ Samsung ក្រុមហ៊ុនជប៉ុន JAPEX និងក្រុមហ៊ុនឥណ្ឌា Sri Avantika Contractor ផងដែរនោះនឹងនាំមក នូវឱកាសជាច្រើនផ្សេងទៀត សម្រាប់វៀតណាម នៅក្នុងការទាក់ទាញវិនិយោគផ្ទាល់ពីបរទេស (FDI)៕ Vietnam News៕

LEAVE A REPLY

Please enter your comment!
Please enter your name here