ពលរដ្ឋដថៃកំពុងផុងក្នុងវិបត្តិបំណុល ខណៈវិបត្តិកូវីដ១៩បន្ថែមបន្ទុកកាន់តែធ្ងន់

ដោយៈ សុខុម

បាងកក: ស្ត្រីជាកសិករជនជាតិថៃម្នាក់ឈ្មោះ Jamras Kongchai និងប្រជាពលរដ្ឋថៃជាច្រើនទៀត កំពុងជួបការលំបាកយ៉ាងខ្លាំង នៅក្នុងសងបំណុលរបស់ខ្លួន ចំនួន១៦,០៨២ដុល្លារអាមេរិក ព្រោះប្រាក់ចំណូលបានមកពីការលក់ដំណាំ របស់អ្នកស្រីមិនគ្រប់នឹងបំណុលឡើយ។

ដោយសារតែសងបំណុលមិនគ្រប់ អ្នកស្រីបានចូលធ្វើការនៅក្រុមហ៊ុនសំណង់តូចមួយ ដើម្បីបានចំណូលបន្ថែមក្នុងមួយថ្ងៃ១០ដុល្លារ ប៉ុន្តែជាអកុសលការផ្ទុះការឆ្លងរាតត្បាតវីរុសកូវីដ១៩ បានធ្វើឱ្យក្រុមហ៊ុន ដែលអ្នកស្រីធ្វើការត្រូវបិទទ្វារទៀត។

កាលពីខែមុន ស្ត្រីមេមាយកូន២ វ័យ៥១ឆ្នាំរូបនេះ បានធ្វើដំណើរមកពីខេត្តភាគខាងជើងកំផែងផែត (Kamphaeng Phet) មកកាន់ក្រុងបាងកក ដើម្បីចូលរួមការតវ៉ាជាមួយក្រុមប្រជាកសិករធ្វើដំណាំស្រូវ ដែលជំពាក់បំណុលរុំកោះ ដោយស្នើសុំឱ្យរដ្ឋាភិបាលជួយកាត់បន្ថយន្ទុកបំណុលរបស់ពួកគាត់។

អ្នកស្រីបាននិយាយយ៉ាងកម្សត់ថា “ខ្ញុំជំពាក់បំណុលវ័ណ្ដកហើយ មិនដឹងធ្វើបែបណាទេ”។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

អ្នកស្រីនិយាយថា អ្នកស្រីសងបានតែការប្រាក់មួយចំនួនប៉ុណ្ណោះ ចាប់តាំងពីឆ្នាំ២០១៣មក។ ហើយឆ្នាំនេះគាត់ត្រូវបង់ការប្រាក់១.២៨០ដុល្លារ ប៉ុន្តែអ្នកស្រីគ្មានលុយនោះទេ។ អ្នកស្រីថា “ខ្ញុំសង្ឃឹមថានឹងទទួលបានជំនួយខ្លះ”។

ការតវ៉ាបែបនេះបានដាក់សម្ពាធបន្ថែមទៀត ទៅលើរដ្ឋាភិបាលថៃ ដែលកំពុងខ្នះ​ខ្នែងទប់ទល់បាតុកម្មគាំទ្រលទ្ធិប្រជាធិបតេយ្យ និងដែលកំពុងប្រឹងប្រែងស្តារសេដ្ឋកិច្ច ពីវិបត្តិឆ្លងរាតត្បាតវីរុសកូវីដ១៩។

គ្រួសារពលរដ្ឋថៃ ស្ថិតក្នុងចំណោមអ្នកជាប់បំណុលច្រើនបំផុតនៅអាស៊ី ដែលមានបំណុល៤៤៧ពាន់លានដុល្លារអាមេរិក ស្មើនឹង៨៩,៣%នៃផលិតផលក្នុងស្រុកសរុប (GDP) គិតត្រឹមខែធ្នូ ឆ្នាំ២០២០។ តួលេខនេះ បានកើនឡើងខ្លាំងបើធៀបនឹង៧៨,១%ក្នុងឆ្នាំ២០១៧។ ពួកគាត់កំពុងតែជួបការលំបាកកាន់តែខ្លាំងនៅក្នុងការសង។

កម្រិតបំណុលគ្រួសារពលរដ្ឋថៃ គឺខ្ពស់បំផុត ចាប់តាំងពីធនាគារកណ្តាលប្រទេសនេះ បានចាប់ផ្តើមកត់ត្រាក្នុងឆ្នាំ២០០៣មក។

បំណុលខ្ពស់ក៏បង្កជាហានិភ័យ ដល់ស្ថិរភាពហិរញ្ញវត្ថុផងដែរ ហើយរារាំងការចំណាយរបស់អ្នកប្រើប្រាស់ នៅក្នុងសេដ្ឋកិច្ចធំបំផុតទី២ នៅអាស៊ីអាគ្នេយ៍មួយនេះ ដោយរារាំងការងើបឡើងពីវិបត្តិកូវីដ-១៩។

នៅក្នុងឆ្នាំ២០២០ សេដ្ឋកិច្ចមួយនេះ បានដាំក្បាលចុះខ្លាំងបំផុតក្នុងរយៈពេលជាងពីរទសវត្សរ៍ នៅពេលការនាំចេញបានធ្លាក់ចុះ ហើយវិស័យទេសចរណ៍ដែលជាវិស័យដ៏សំខាន់របស់ថៃ បានបាត់ភ្ញៀវទេសចរបរទេសអស់ ដោយសារការបិទព្រំដែន និងជើងហោះហើរដើម្បីទប់ស្កាត់ការឆ្លងរាតត្បាតវីរុសកូវីដ-១៩។

ធនាគារកណ្តាលរបស់ថៃ បាននិយាយកាលពីខែមុនថា ការផ្ទុះការឆ្លងរាតត្បាតវីរុសកូវីដ១៩ រលកថ្មីបានបន្ថែមសម្ពាធលើអាជីវកម្ម និងគ្រួសារមួយចំនួនកាន់តែធ្ងន់ ដោ​យធនាគារនេះ កាត់បន្ថយទស្សនវិស័យកំណើន GDP សម្រាប់ឆ្នាំ២០២១ ពី៣,២% មកនៅត្រឹម៣% ហើយគូសបញ្ជាក់ថា ទម្រាំតែសេដ្ឋកិច្ចថៃ អាចវិលទៅរកកម្រិតមុនពេលឆ្លងរាតត្បាតវីរុសកូវីដ១៩វិញ យ៉ាងហោចណាស់ក៏នៅពាក់កណ្តាលឆ្នាំ២០២២ដែរ។

លោក Yunyong Thaicharoen អ្នកជំនាញសេដ្ឋកិច្ចជាន់ខ្ពស់នៅធនាគារពាណិជ្ជសៀម Siam Commercial Bank បានលើកឡើងថា “សូម្បីនៅមុនពេលផ្ទុះវិបត្តិកូវីដ-១៩ ក៏បំណុលរបស់យើងគិតជាGDP បានឡើងខ្ពស់បំផុតរួចទៅហើយ ក្នុងចំណោមទីផ្សារកំពុងអភិវឌ្ឍន៍ខ្លាំង (emerging market)”។

លោកបានលើកឡើងទៀតថា “វាលើសពីកម្រិតមួយ ដែលជះផលប៉ះពាល់ខ្លាំងទៅលើGDP និងការចំណាយគ្រួសារ” ហើយថាអនុបាតបំណុលអាចឡើងដល់៩០% ទៅ៩១% នៃ GDP ក្នុងត្រីមាសទី១ដើមឆ្នាំនេះ”។

រដ្ឋាភិបាលថៃបានសន្យាផ្តល់ជំនួយសង្គ្រោះ៣២ពាន់លានដុល្លារ ដើម្បីបន្ធូរបន្ថយផលប៉ះពាល់ នៃការផ្ទុះវិបត្តិកូវីដ-១៩ ប៉ុន្តែពលរដ្ឋខ្លះត្អូញត្អែរថា ជំនួយធ្លាក់ដល់ដៃពល​រដ្ឋថៃយឺតយ៉ាវណាស់។ តួយ៉ាងកាលពីឆ្នាំមុន ស្ត្រីម្នាក់បានយកថ្នាំកណ្តុរគំរាមផឹកសម្លាប់ខ្លួននៅខាងក្រៅក្រសួងហិរញ្ញវត្ថុ នៅក្នុងការតវ៉ាប្រឆាំងនឹងការឆ្លើយតបយឺតយ៉ាវនេះ។

ជាសំណាងល្អ ស្ត្រីរូបនោះមិនបានបាត់បង់ជីវិតនោះទេ ហើយរដ្ឋអំណាចបានសន្យាថា នឹងបើកលុយជំនួយនោះឱ្យគាត់នៅប៉ុន្មានថ្ងៃក្រោយ៕ ប្រភពៈ CNA៕

LEAVE A REPLY

Please enter your comment!
Please enter your name here