ដោយៈគង់ ម៉ាលីនណា
ភ្នំពេញៈ អគ្គនាយកគណកម្មការមូលបត្រកម្ពុជា លោកស៊ូ សុជាតិបានថ្លែងថា បន្ទាប់ពីវិបត្តិនៃការរីករាលដាលជំងឺកូវីដ១៩ ទីផ្សារមូលបត្រ គឺជាជម្រើសដ៏ល្អប្រសើរមួយសម្រាប់ម្ចាស់សហគ្រាស និងម្ចាស់អាជីវកម្មនៅកម្ពុជា ក្នុងការប្រមូលដើមទុនរយៈពេលវែង សម្រាប់ពង្រីកអាជីវកម្មរបស់ខ្លួន។
លោកបន្តថា ការប្រមូលដើមទុនតាមរយៈទីផ្សារមូលបត្រ បានផ្តល់នូវអត្ថប្រយោជន៍ដ៏ច្រើនលើសលប់ផ្សេងទៀតក្រៅពីដើមទុន ដូចជា ការបង្ហាញពីតម្លាភាព និងទំនុកចិត្តសម្រាប់ក្រុមហ៊ុន ដែលជាតម្លៃគោលមួយក្នុងការជំរុញនូវនិរន្តរភាព អាជីវកម្មរបស់សហគ្រាស។
ការធានាបាននូវការអភិវឌ្ឍទីផ្សារមូលបត្រ ប្រកបដោយប្រសិទ្ធភាព តម្លាភាព គណនេយ្យភាព និងសណ្តាប់ធ្នាប់ គឺជាបេសកកម្មរបស់ គ.ម.ក.។ អាស្រ័យហេតុនេះ ដើម្បីដើរឱ្យស្របតាមបេសកកម្ម និងចក្ខុវិស័យរបស់ខ្លួន ការជំរុញឱ្យមានក្រុមហ៊ុនចុះបញ្ជី និងការជំរុញនូវសន្ទនីយភាពទីផ្សារ គឺតែងតែជាការងារគោលរបស់ គ.ម.ក. ដែលជាអាជ្ញាធរក្នុងវិស័យមូលបត្រ។ ទន្ទឹមនឹងនេះ ការធ្វើពិពិធកម្មផលិតផលហិរញ្ញវត្ថុនៅក្នុងទីផ្សារក៏ជាគោលដៅយុទ្ធសាស្ត្រឈានមុខផងដែរ។
នៅក្នុងឆ្នាំ ២០២១ យើងរំពឹងថានឹងមានក្រុមហ៊ុនចុះបញ្ជី នៅក្រុមហ៊ុនផ្សារមូលបត្រកម្ពុជា យ៉ាងហោចណាស់២បន្ថែមទៀត ហើយការជួញដូរ មូលបត្រក៏នឹងមានភាពមមាញឹក និងកើនឡើងផងដែរ។
ចំពោះការជួញដូរមូលបត្រវិញទៀតសោត វិនិយោគិន ក៏ដូចជាសាធារណជនអាចនឹងពិចារណាក្នុងការរក្សាសាច់ប្រាក់មួយចំនួន សម្រាប់វិនិយោគក្នុងទីផ្សារមូលបត្រ។ នាពេលថ្មីៗនេះ ក្រុមហ៊ុនផ្សារមូលបត្រកម្ពុជា ក៏បានធ្វើការជូនដំណឹងអំពីការជួញដូរតាមរយៈប្រព័ន្ធជួញដូរចល័ត (Mobile Trading System-MTS) ដោយមិនគិតថ្លៃសេវារហូតដល់ចុងឆ្នាំ២០២១ផងដែរ ដែលការណ៍នេះជាកត្តាវិជ្ជមានមួយ ដែលផ្តល់នូវភាពងាយស្រួលសម្រាប់វិនិយោគិន ក្នុងការដាក់បញ្ជាជួញដូរមូលបត្រ ជាមួយនឹងថ្លៃចំណាយទាបជាងមុន។
លោកស៊ូ សុជាតិបានបន្តថា ទន្ទឹមនឹងនេះផងដែរ ក្នុងឆ្នាំ ២០២១ យើងក៏នឹងដាក់ឱ្យដំណើរការផលិតផលហិរញ្ញវត្ថុហៅថា គម្រោងវិនិយោគរួម ដែលតាមរយៈវត្តមាននៃផលិតផលនេះ នឹងជំរុញឱ្យសកម្មភាពជួញដូរ នៅក្នុងទីផ្សារមូលបត្រកម្ពុជា ក៏ដូចជាជំរុញនូវប្រសិទ្ធភាព នៃការប្រមូលសាច់ប្រាក់ ដែលនៅសេសសល់នៅក្នុងសេដ្ឋកិច្ចឱ្យមានដំណើរការរស់រវើកផងដែរ។ ការលើកកម្ពស់ការយល់ដឹង តាមរយៈការបណ្តុះបណ្តាល និងផ្សព្វផ្សាយ និងការពង្រឹងទំនុកចិត្តនៅក្នុងទីផ្សារ តាមរយៈការពង្រឹងនូវការអនុវត្តច្បាប់ និងលើកកម្ពស់ស្តង់ដាវិជ្ជាជីវៈជំនាញ នៅក្នុងទីផ្សារមូលបត្រក៏ជាការងារអាទិភាពជាយុទ្ធសាស្ត្រសម្រាប់ គ.ម.ក. ក្នុងឆ្នាំ ២០២១ ផងដែរ។
ក្នុងឆ្នាំ ២០២១ យើងរំពឹងដាក់ឱ្យដំណើរការនូវយន្តការនៃការខ្ចី និងឱ្យខ្ចីមូលបត្រ ដោយខណៈពេលនេះ យើងបាននិងកំពុងសិក្សាពីយន្តការនេះ។ ចំពោះទីផ្សារមូលបត្រអនាគត គ.ម.ក. អាចរំពឹងថា នឹងរៀបចំបទប្បញ្ញតិ្តពាក់ព័ន្ធចប់សព្វគ្រប់ ព្រមទាំងពិនិត្យលទ្ធភាពក្នុងការអនុម័តនាឆ្នាំ ២០២១ ផងដែរ៕
