ដោយ៖ លក្ខិណា
ភ្នំពេញ៖ ដើម្បីស្ដារសេដ្ឋកិច្ចក្រោយវិបត្តិកូវីដ១៩ឡើងវិញ សហភាពអឺរ៉ុបដែលជាដៃគូអភិវឌ្ឍន៍សំខាន់របស់កម្ពុជា បានពិភាក្សាពីរបៀបធ្វើការងារឱ្យកាន់តែមានប្រសិទ្ធភាពនៅកម្ពុជា ក្នុងគោលបំណងពន្លឿនវឌ្ឍនភាព អភិវឌ្ឍន៍សេដ្ឋកិច្ច និងលើកកម្ពស់ជីវភាពរដ្ឋឡើងវិញក្រោយវិបត្តិកូវីដ១៩។
លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា បានមានប្រសាសន៍នៅថ្ងៃទី៣ ខែកុម្ភៈថា ដើម្បីសម្រេចគោលដៅនៃការអភិវឌ្ឍ អឺរ៉ុបចាំបាច់ត្រូវធ្វើការកែលម្អរបៀបរបបធ្វើការងាររបស់ខ្លួន ហើយនេះគឺជាគោលបំណងនៃកិច្ចពិគ្រោះយោបល់រវាងសហភាពអឺរ៉ុប និងអង្គការសហប្រជាជាតិ។
លោកស្រីបន្តថា “គ្រប់ប្រទេសទាំងអស់ត្រូវយកធនធានមកប្រើប្រាស់សម្រាប់ការស្ដារឡើងវិញក្រោយជំងឺកូវីដ-១៩ ។ ប៉ុន្តែយើងមិនអាចត្រឡប់ទៅរករបៀបធ្វើការងារបែបគំរូចាស់នោះឡើយ ។ ប្រទេសនានាចាំបាច់ត្រូវចាប់ផ្ដើមជំរុញកំណើនសេដ្ឋកិច្ចឡើងវិញ ប៉ុន្តែវិស័យអភិវឌ្ឍន៍មានវិសាលភាពធំជាងនេះឆ្ងាយ”។
លោកស្រីបានបន្តទៀតថា ការអភិវឌ្ឍ សំដៅលើការបង្កើតឱកាសសម្រាប់មនុស្ស ធ្វើឱ្យជីវិតរបស់ពួកគេកាន់តែមានភាពសម្បូរបែប ព្រមទាំងពង្រីកការអនុវត្តសិទ្ធិរបស់ពួកគេ។ ដូច្នេះ យើងចាំបាច់ត្រូវរិះរកវិធី ដើម្បីឱ្យការអនុវត្តការងារទាំងនេះកាន់តែមានប្រសិទ្ធភាព និងស្វែងរកវិធីដើម្បីឱ្យយើងអាចសម្រេចលទ្ធផលបានកាន់តែប្រសើរ។
លោកស្រី Pauline Tamesis ប្រធានអង្គការសហប្រជាជាតិប្រចាំប្រទេសកម្ពុជា បានកត់សម្គាល់ថា ភាពជាដៃគូស៊ីជម្រៅ មានសារៈសំខាន់ ជាពិសេស នៅក្នុងកាលៈទេសៈនាពេលនេះ ដែលវិសមភាពកំពុងមានការកើនឡើង និងនៅក្នុងកាលៈទេសៈនៃការស្ដារឡើងវិញពីជំងឺកូវីដ-១៩ ដែលចាំបាច់ត្រូវមានការពង្រឹងសាមគ្គីភាព និងការប្រកាន់យកស្មារតីពហុនិយម។
លោកស្រីបានថ្លែងថា សហភាពអឺរ៉ុប និងអង្គការសហប្រជាជាតិមានគុណតម្លៃរួមដូចគ្នា ហើយយើងប្ដេជ្ញាចិត្តលើកកម្ពស់ការគោរពសិទ្ធិមនុស្ស ការអភិវឌ្ឍដោយចីរភាព និងការធានាឱ្យមានការផ្ដល់ភាពអង់អាច និងការការពារមនុស្សជាតិ ព្រមទាំងភពផែនដីទាំងមូល។
សហភាពអឺរ៉ុប និងរដ្ឋជាសមាជិករបស់សហភាពអឺរ៉ុប រួមគ្នា គឺជាដៃគូធំជាងគេទី ២ របស់កម្ពុជា បើគិតជាចំនួនថវិកាជំនួយសម្រាប់ការអភិវឌ្ឍ ដោយមានអង្គការសហប្រជាជាតិ ដើរតួនាទីជាទីភ្នាក់ងារអនុវត្តន៍ជាដរាបមក។
គម្រោងដែលសហភាពអឺរ៉ុប និងទីភ្នាក់ងារសហប្រជាជាតិជាដៃគូកំពុងអនុវត្តនៅកម្ពុជា មានទឹកប្រាក់ជាង១០០លានដុល្លារ ហើយជាគម្រោងដែលមានការចូលរួមពីពលរដ្ឋកម្ពុជានៅគ្រប់ស្រទាប់វណ្ណៈក្នុងវិស័យ ជាច្រើន ដូចជា អប់រំ កសិកម្ម និងការគ្រប់គ្រងធនធានធម្មជាតិ អភិបាលកិច្ច សិទ្ធិមនុស្ស សេវាគាំពារសង្គម ការគ្រប់គ្រងហិរញ្ញវត្ថុសាធារណៈ ការអភិវឌ្ឍវិស័យឯកជន និងការប្រែប្រួលអាកាសធាតុ៕