ដោយៈសាវុធ
ភ្នំពេញៈ មានតែក្រុមហ៊ុនមូលបត្រ ដែលមានអាជ្ញាបណ្ណ និងជាសមាជិករបស់ផ.ម.ក.ប៉ុណ្ណោះ ដែលអនុញ្ញាតឱ្យមានប្រព័ន្ធកុំព្យូទ័រ តភ្ជាប់ជាមួយនឹងផ.ម.ក.។ រាល់វិនិយោគិនទាំងអស់ ត្រូវបើកគណនីជួញដូរនៅក្រុមហ៊ុនមូលបត្រ ជាសមាជិករបស់ ផ.ម.ក. និងដាក់បញ្ជាតាមរយៈសមាជិកនោះ។
ដោយមានឈ្មួញជើងសាមូលបត្រនៅក្បែរលោកអ្នក លោកអ្នកអាចស្នើសុំការប្រឹក្សាវិនិយោគ និងសេវាកម្មផ្ទាល់ខ្លួនផ្សេងៗទៀតពីពួកគេ។
យ៉ាងណាមិញ នៅពេលលោក អ្នកអាចដាក់បញ្ជាជួញដូរដោយខ្លួនឯង តាមរយៈប្រព័ន្ធជួញដូរចល័ត (MTS) ទៅកាន់ប្រព័ន្ធជួញដូររបស់ផ.ម.ក. បញ្ជាទាំងនោះនឹងត្រូវឆ្លងកាត់តាមប្រព័ន្ធជួញដូរ របស់ឈ្មួញជើងសាមូលបត្រជាមុនសិន មុននឹងទៅដល់ប្រព័ន្ធជួញដូររបស់ផ.ម.ក.។
បច្ចុប្បន្នក្រុមហ៊ុនចុះបញ្ជី ជាឈ្មួញជើងសារមានចំនួន១៣នៅកម្ពុជា ដោយក្នុងចំណោមក្រុមហ៊ុនទាំងនោះក្រុមហ៊ុន៧ ចុះបញ្ជីភាគហ៊ុន និងក្រុមហ៊ុន៦ ចុះបញ្ជីសញ្ញាបណ្ណសាជីវកម្ម។ បញ្ជីរាយនាមក្រុមហ៊ុនទាំងនោះ (List of CSX’s Members) ព្រមជាមួយព័ត៌មានទំនាក់ទំនងលម្អិតផ្សេងទៀត អាចស្វែងរកបាននៅលើគេហទំព័ររបស់ផ.ម.ក.។
ជាការពិត លោកអ្នកគួរជ្រើសរើសក្រុមហ៊ុន ឈ្មួញជើងសាមូលបត្រណាមួយ ដោយផ្អែកលើលក្ខណៈសម្បត្តិ ដែលពួកគេមាន ដូចជា ភាពចម្រុះនៃសេវាកម្ម ដែលក្រុមហ៊ុនផ្តល់ឱ្យ គុណភាពសេវាបម្រើអតិថិជន និងអត្រាកម្រៃជើងសាជាដើម៕