ដោយៈវឌ្ឈនា
កំពង់ធំៈ ក្រុមហ៊ុនកូរ៉េ I LAON D&C Co., LTD. ដ៏ធំមួយបានចាប់ដៃគូជាមួយក្រុមហ៊ុនខ្មែរ KASING CO.,LTD.គ្រោងបោះទុនប្រមាណ៣០លានដុល្លារអាមេរិក សម្រាប់ បង្កើតកសិទេសចរណ៍លើផ្ទៃដីជាង៥០០ហិចតា នៅស្រុកប្រាសាទសំបូរ ខេត្តកំពង់ធំដើម្បីលើកកម្ពស់វិស័យកសិកម្មបែបទេសចរណ៍ និងចូលរួមអភិវឌ្ឍសេដ្ឋកិច្ច សង្គម ប្រកបដោយចីរភាព។
លោកហង្ស សុធី ប្រធានក្រុមប្រឹក្សាភិបាលក្រុមហ៊ុនKASING CO,.LTD. ឱ្យដឹងកាលពីពេលថ្មីៗនេះថា គម្រោងបង្កើតតំបន់កសិទេសចរណ៍ថ្មីនេះ ត្រូវបានធ្វើឡើងជាលក្ខណៈទេសចរណ៍បែបកសិកម្ម ដែលអាចនឹងមានការរៀបចំ ជាដំណើរកម្សាន្តនៅដើមឆ្នាំ២០២១ ក្នុងការនាំទេសចរក្នុងស្រុកទៅកម្សាន្ត និងចូលទៅមើលដល់ក្នុងចម្ការផ្សេងៗ របស់ពលរដ្ឋក៏ដូចជាសហគមន៍ផងដែរ។
លោកបន្តថា “ភ្ញៀវទេសចរណ៍នៅក្នុងប្រទេសកម្ពុជា ក៏អាចមកលេងកម្សាន្តនៅក្នុងតំបន់កសិទេសចរណ៍ ហើយភ្ជាប់ជាមួយការចូលទៅទស្សនាចម្ការ របស់ប្រជាជនដែលរស់នៅតំបន់នោះថែមទៀត ហើយអ្នកទេសចរអាចទិញផ្ទាល់ នូវផលិតផលកសិកម្មរបស់ប្រជាពលរដ្ឋនៅក្នុងតំបន់នេះបានផងដែរ” ។
លោកសុធីបន្ថែមថា ក្រុមហ៊ុន I LAON D&C Co., LTD. គឺជាក្រុមហ៊ុនវិនិយោគិនដ៏ធំរប់សប្រទេសកូរ៉េ គ្រោងចំណាយថវិកា៣០លានដុល្លារ ក្នុងការសាងសង់រោងចក្រផលិតជី និងរោងចក្រកែច្នៃផ្លែស្វាយ ដែលការសាងសង់នឹងចាប់ផ្តើម នៅចុងឆ្នាំ២០២១ ។
លោកសុធី បញ្ជាក់ទៀតថា គោលបំណងសំខាន់ ក្នុងការកែច្នៃបង្កើតឲ្យមានតំបន់កសិទេសចរណ៍នេះ គឺដើម្បីឆ្លើយតប ទៅប្រជាពលរដ្ឋជាអ្នកទេសចរក្នុងស្រុក ដែលទៅលេងកម្សាន្តនៅតំបន់ប្រាសាទសំបូរព្រៃគុក តំបន់ភ្នំសន្ទុក ទឹកធ្លាក់ធ្នួសតាព្រហ្ម និងតំបន់ផ្សេងៗទៀតក្នុងខេត្តកំពង់ធំ ឆ្លងកាត់តំបន់កសិទេសចរណ៍ អាចចូលទិញផ្លែឈើ ឬបន្លែផ្សេងៗ ត្រឡប់ទៅផ្ទះវិញ។
គម្រោងដែលផ្តោតលើវិស័យកសិកម្ម និងកសិទេសចរណ៏នេះមានដាំដំណាំមួយចំនួនដូចជា ស្វាយ ដូង ពោត សណ្តែក និងបង្កើតរោងចក្រផលិតជី និងរោងចក្រកែឆ្នៃផ្លែស្វាយ បង្កើតតំបន់ទេសចរណ៍ ដើម្បីលើកស្ទួយវិស័យកសិកម្ម និងជំរុញឲ្យមានការកែឆ្នៃទិន្នផលកសិកម្មឱ្យទៅជា ផលិតផលសម្រេច ដើម្បីផ្គត់ផ្គង់តម្រូវការក្នុងស្រុក និងអាចឈានទៅរកការនាំចេញទៅក្រៅប្រទេស ព្រមទាំងជួយបង្កើនការងារដល់ប្រជាពលរដ្ឋក្នុងតំបន់ បញ្ចៀសការធ្វើចំណាកស្រុកផងដែរ។
លោកសុខ លូ អភិបាលខេត្តកំពង់ធំ ធ្លាប់បានមានប្រសាសន៍បានស្វាគមន៍រាល់គម្រោងវិនិយោគទាំងអស់ មិនថាវិស័យទេសចរណ៍ កសិកម្ម និងគម្រោងផ្សេងៗទៀតនោះទេ ឱ្យតែផ្តល់ផលប្រយោជន៍ ដល់ប្រជាពលរដ្ឋនៅក្នុងមូលដ្ឋាន និងលើកកម្ពស់សេដ្ឋកិច្ចជាតិ។
លោកបន្តថា “ខេត្តកំពង់កាលពីមុន ភ្ញៀវទេសចរណ៍ហួសមកហួស ប៉ុន្តែបច្ចុប្បន្ននេះមិនដូច្នោះឡើយ ខេត្តមានតំបន់ទេសចរណ៍ច្រើន និងមានសក្តានុពលខ្ពស់លើការវិនិយោគផងដែរ” ៕
