ដោយគង់ សូរិយា
ភ្នំពេញៈ មន្រ្តីជាន់ខ្ពស់ធនាគារជាតិនៃកម្ពុជាបានថ្លែងថា ក្នុងចំណោមប្រជាជនពេញវ័យកម្ពុជាប្រមាណ១០លាននាក់ មានយុវវ័យប្រមាណ២៩ភាគរយមិនទាន់់ទទួលបានសេវាកម្មហិរញ្ញវត្ថុនៅឡើយ។
អគ្គនាយកបច្ចេកទេសធនាគារជាតិនៃកម្ពុជា លោកស្រីជា សិរីបានលើកឡើងកាលពីពេលថ្មីៗនេះថា ក្នុងចំណោមប្រជាជនពេញវ័យរបស់កម្ពុជា ប្រមាណ១០លាននាក់មានយុវវ័យប្រមាណ២៩ភាគរយ មិនទាន់ទទួលបានសេវាហិរញ្ញវត្ថុនៅឡើយ។
លោកស្រីថា “ប្រជាពលរដ្ឋពេញវ័យ ទោះបីមានសេវាហិរញ្ញវត្ថុណាមួយ(ប្រាក់សន្សំឬប្រាក់កម្ចី)ក៏ដោយនៅតាមគ្រឹះស្ថានផ្លូវការ ក៏ធនាគាររាប់បញ្ចូលថាមានឬទទួលបានសេវាហិរញ្ញវត្ថុប្រើប្រាស់ដែរ”។
លោកស្រីបានបន្តថា អ្វីដែលជាសក្តានុពលនៅកម្ពុជា ប្រជាជនពេញវ័យដែលមានអាយុពី១៥ឆ្នាំ ទៅ៣០ឆ្នាំមានចំនួនដល់៤៣ភាគរយ នៃប្រជាជនពេញវ័យសរុប។អីចឹងមានន័យគ្រឹះស្ថានមីក្រូហិរញ្ញវត្ថុ នៅមានឱកាសជំរុញសេវាហិរញ្ញវត្ថុ ទៅដល់យុវជនពេញវ័យទាំងនោះគឺនៅមានឱកាសច្រើន៕
