ដោយៈសុខុម
អង់គ្លេសៈ បំណុលរបស់រដ្ឋាភិបាលអង់គ្លេស បានកើនឡើងខ្ពស់បំផុតមិនធ្លាប់មានក្នុងខែវិច្ឆិកា ឆ្នាំ២០២០ ខណៈរដ្ឋាភិបាលប្រទេសនេះ នៅតែបន្តជួយទ្រទ្រង់សេដ្ឋកិច្ច អំឡុងពេលឆ្លងរាតត្បាតមេរោគកូវីដ-១៩ ។ នេះបើយោងតាមសារព័ត៌មាន BBC ចុះផ្សាយកាលពីថ្ងៃទី២២ ធ្នូកន្លងមកនេះ។
ការិយាល័យជាតិស្ថិតិ (Office for National Statistics) របស់អង់គ្លេសបានបង្ហាញរបាយការណ៍របស់ខ្លួនថា បំណុលរបស់រដ្ឋាភិបាល បានកើនឡើងរហូតដល់ ៣១,៦ពាន់លានផោន (៤២,៣ ពាន់លានដុល្លារអាមេរិក) កាលពីខែមុន ដែលជាតួលេខខ្ពស់បំផុតមិនធ្លាប់មាន។ វាក៏ជាតួលេខប្រចាំខែខ្ពស់បំផុតទី៣ ផងដែរ បើគិតចាប់តាំងពីឆ្នាំ១៩៩៣មក។
តួលេខដ៏ខ្ពស់នេះ ឆ្លុះបញ្ចាំងពីគម្លាតចំណូល-ចំណាយរបស់រដ្ឋាភិបាល ដែលមានន័យថា ចំណាយធំជាងចំណូល។
ការិយាល័យជាតិស្ថិតិបានបញ្ជាក់ថា ចាប់តាំងពីឆ្នាំសារពើពន្ធនេះចាប់ផ្ដើមក្នុងខែមេសាមក បំណុលរបស់រដ្ឋាភិបាល បានកើនឡើងរហូតដល់ ២៤០,៩ពាន់លានផោន (៣២២ ពាន់លានដុល្លារអាមេរិក) ដែលខ្ពស់ជាងមួយឆ្នាំមុនចំនួន១៨៨,៦ ពាន់លានផោន (២៥២ ពាន់លានដុល្លាអាមេរិក)។
តាមការរំពឹងថា កញ្ចប់ថវិកាជាតិ នឹងត្រូវអនុម័តនៅក្នុងសរទរដូវ (រដូវស្លឹកឈើជ្រុះ) ឆ្នាំនេះ ប៉ុន្តែត្រូវបានពន្យារពេល ដោយសារការឆ្លងរាតត្បាតវីរុសកូវីដ-១៩ ហើយនឹងលើកទៅធ្វើនៅថ្ងៃទី៣ មីនា ឆ្នាំ២០២១ ខាងមុខជំនួសវិញ។
ការិយាល័យទទួលខុសត្រូវផ្នែកថវិកា (Office for Budget Responsibility) ហៅកាត់ OBR ដែលជាស្ថាប័នឯករាជ្យបានប៉ាន់ប្រមាណថា បំណុលអាចកើនឡើងដល់ ៣៧២,២ ពាន់លានផោន (៤៩៧ ពាន់លានដុល្លារអាមេរិក) ត្រឹមដំណាច់ឆ្នាំសារពើពន្ធក្នុងខែមីនា ឆ្នាំ២០២១ ។
ទោះជាយ៉ាងណា រដ្ឋមន្ត្រីហិរញ្ញវត្ថុអង់គ្លេស លោក Rishi Sunak បានបញ្ជាក់ជំហរយ៉ាងច្បាស់ កាលពីថ្ងៃអង្គារ ទី២២ ធ្នូនេះថា “លោកនឹងមិនចាត់វិធានការណាមួយបែបតក់ក្រហល់ឡើយ” ។
លោកបានបន្ថែមថា “នៅពេលសេដ្ឋកិច្ចរបស់យើងងើបឡើងវិញ វាជារឿងត្រឹមត្រូវ ដែលយើងគួរចាត់វិធានការចាំបាច់ ដើម្បីដាក់ហិរញ្ញវត្ថុសាធារណៈឱ្យស្ថិតក្នុងជំហរមួយ ដែលមាននិរន្តរភាពជាងនេះ ដើម្បីឱ្យយើងអាចឆ្លើយតបបាន ទៅនឹងវិបត្តិក្នុងពេលអនាគតដូចដែលយើងបានធ្វើនៅឆ្នាំនេះ” ៕