ដោយៈសុខុម
ក្រុងឡុងដ៏ៈ ប្រទេសអង់គ្លេស នឹងផ្អាកការយកពន្ធបែបសងសឹក លើទំនិញអាមេរិក ដែលផ្ដើមចេញពីជម្លោះពាណិជ្ជកម្ម ជុំវិញការឧបត្ថម្ភធនលើក្រុមហ៊ុនផលិតយន្តហោះតាំងពីថ្ងៃទី១ ខែមករា ដើមឆ្នាំ២០២០ ។
យោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃទី៩ ធ្នូកន្លងមកបានឲ្យ ដឹងថា ចំណាត់ការនេះត្រូវគេមើលឃើញថា ជាការព្យាយាមបន្ធូរភាពតានតឹងក្នុងជម្លោះពាណិជ្ជកម្មអន្តរជាតិដ៏គ្រោះថ្នាក់។
សេចក្ដីសម្រេចនេះ បង្ហាញពីការចាប់ផ្តើមដកខ្លួនរបស់អង់គ្លេស ចេញពីគោលនយោបាយពាណិជ្ជកម្មរបស់សហភាពអឺរ៉ុប ដែលចូលជាធរមានក្នុងថ្ងៃដែលការចាកចេញរបស់អង់គ្លេស ពីវិធាន និងនិយ័តកម្មនានារបស់សហភាពអឺរ៉ុបជាស្ថាពរ។ ហើយ នេះ ក៏ជាសញ្ញាបង្ហាញពីមហិច្ឆតារបស់អង់គ្លេស ដែលចង់ពង្រឹងទំនាក់ទំនងកាន់ជាស្អិត រមួតជាមួយសហរដ្ឋអាមេរិកផងដែរ។
សង្គ្រាមពន្ធ ដែលមានទំហំច្រើនពាន់លានដុល្លាររវាងសហរដ្ឋអាមេរិក និងសហភាពអឺរ៉ុប ទាក់ទងទៅនឹងជម្លោះដ៏អូសបន្លាយមួយ ជុំវិញការឧបត្ថម្ភធនរបស់រដ្ឋសម្រាប់ក្រុមហ៊ុនផលិតយន្តហោះ Airbus និង Boeing។
រដ្ឋមន្ត្រីពាណិជ្ជកម្មអង់គ្លេស លោកស្រី លីស ទ្រូស (Liz Truss) បានលើកឡើងតាមរយៈសេចក្ដីថ្លែងការណ៍ថា “ទីបំផុតយើងចង់បន្ធូរភាពតានតឹងក្នុងជម្លោះ ហើយវិលមករកតុចរចា ដើម្បីពង្រឹងទំនាក់ទំនងពាណិជ្ជកម្មរបស់ពួកយើង ឱ្យកាន់តែស៊ីជម្រៅជាមួយសហរដ្ឋអាមេរិក” ។
ទោះជាយ៉ាងណា ភ្លាមៗគេមិនអាចទាក់ទង សុំការបំភ្លឺពីរដ្ឋាភិបាលអាមេរិក និងសហភាពអឺរ៉ុប បានទេជុំវិញបញ្ហានេះ។
ទោះបីជាអង់គ្លេស បានចាកចេញពីសហភាពអឺរ៉ុប ជាផ្លូវការតាំងខែមករាក្ដី ក៏ក្រោមលក្ខខណ្ឌ នៃដំណាក់កាលអន្តរកាលរយៈពេលពេល១១ខែ អង់គ្លេសបានចូលរួមជាមួយសហភាពអឺរ៉ុប កាលពីខែវិច្ឆិកា នៅក្នុងការអនុវត្តការយកពន្ធ៤ពាន់លានដុល្លារ លើទំនិញសហរដ្ឋអាមេរិក។
វិធានការនេះ ត្រូវបានអង្គការពាណិជ្ជកម្មពិភពលោក (WTO) អនុញ្ញាត ក្រោយពីមានសេចក្ដីសម្រេចមួយរបស់ WTO ក្នុងឆ្នាំ២០១៩ អនុម័តលើការយកពន្ធ ៧,៥ ពាន់លានដុល្លាររបស់សហរដ្ឋអាមេរិក លើទំនិញរបស់សហភាពអឺរ៉ុប។
ទោះជាយ៉ាងណា អង់គ្លេសនិយាយថា ខ្លួននឹងផ្អាកការយកពន្ធរបស់ខ្លួន ដើម្បីព្យាយាមបញ្ចុះបញ្ចូលឱ្យសហរដ្ឋអាមេរិក ឈានដល់ការចរចាផ្សះផ្សាបញ្ចប់ជម្លោះ៕
