ដោយ: គង់ លាងហួរ
អន្តរជាតិ: យោងតាមរបាយការណ៍របស់ក្រុមហ៊ុនប្រឹក្សាអចលនទ្រព្យ DKRA Group បានឱ្យដឹងថា អាផាតមុិនថ្មីប្រហែល១.០៦០យូនីតត្រូវបានលក់ចេញនៅទីក្រុងដាណាង Da Nang ប្រទេសវៀតណាមក្នុងត្រីមាសទី៣ ឆ្នាំនេះ កើនឡើង២,៨ដងធៀបនឹងឆ្នាំមុន។
គម្រោងថ្មីចំនួន១៥ ដែលមានអាផាតមុិនចំនួន២.៣០០យូនីតត្រូវបានចាក់បញ្ចូលទៅក្នុងទីផ្សារក្នុងអំឡុងខែកក្កដាដល់ខែកញ្ញា ឆ្នាំ២០២៤ កើនឡើន៣២%ធៀបនឹងឆ្នាំមុន។
ការណ៍នេះមានន័យថា អាផាតមុិនថ្មី ដែលត្រូវបានលក់ចេញដាច់ចំនួន១.០៦០យូនីត មានចំណែកស្មើនឹងចំនួន៤៧%នៃការផ្គត់ផ្គង់ថ្មីសរុបនៅក្នុងត្រីមាសទី៣ ខណៈប្រតិបត្តិការទិញភាគច្រើនស្ថិតនៅស្រុក Son Tra ។
ដោយឡែក ក្រុមហ៊ុនប្រឹក្សាអចលនទ្រព្យ Avison Young Vietnam បានរាយការណ៍ថា តម្លៃអាផាតមុិននៅក្នុងទីផ្សារបឋមនៅទីក្រុងដាណាងនៅតែមានស្ថិរភាពក្នុងកំឡុងត្រីមាសទី៣ ដោយមានតម្លៃចន្លោះពី៣.០០០ដុល្លារទៅ៣.៥០០ដុល្លារក្នុងមួយម៉ែត្រការ៉េ។
ទំនុកចិត្តរបស់អ្នកទិញនៅលើទីផ្សារមានភាពប្រសើរឡើង ទោះបីជាពួកគេនៅតែមានការព្រួយបារម្ភអំពីស្ថានភាពផ្លូវច្បាប់នៃគម្រោងដែលកំពុងស្ថិតក្រោមដំណើរការសាងសង់មួយចំនួនយ៉ាងណាក្តី។
លោក Ha Nghiem អគ្គនាយកនៃវេទិកាជួញដូរអចលនទ្រព្យ Batdongsan នៅការិយាល័យប្រចាំទីក្រុង Da Nang បានលើកឡើងថា មនុស្សកាន់តែច្រើនកំពុងទិញអាផាតមិនថ្មីដើម្បីរស់នៅផ្ទាល់ខ្លួន ខណៈអតិថិជនមួយចំនួនទៀតបានជួលបន្តទៅឱ្យអ្នកដទៃ។
លោក David Jackson នាយកប្រតិបត្តិនៃក្រុមហ៊ុន Avison Young Vietnam បានអះអាងថា ទីផ្សារកំពុងទាក់ទាញអ្នកទិញ ដែលកំពុងស្វែងរកផ្ទះទីពីរ សម្រាប់ធ្វើជាលំនៅដ្ឋានរយៈពេលវែង ឬផ្ទះវិស្សមកាល។
ទីក្រុងដាណាងជាទីក្រុងធំជាងគេបំផុតទី៣ នៅក្នុងប្រទេសវៀតណាម និងជាតំបន់ទេសចរណ៍ដ៏សំខាន់មួយស្ថិតនៅភាគកណ្តាលនៃប្រទេសវៀតណាម៕ប្រភព: Vnexpress៕
