ដោយ: គង់ លាងហួរ
សេអ៊ូល: ក្រុមហ៊ុនប្រឹក្សាអចលនទ្រព្យ JLL អះអាងថា ការធ្លាក់ចុះនៃចំនួនបន្ទប់សណ្ឋាគារថ្មីនៅទីក្រុងសេអ៊ូលរបស់ប្រទេសកូរ៉េខាងត្បូងក្នុងឆ្នាំ២០២១ និងឆ្នាំ២០២២ គួបផ្សំនឹងការផ្គត់ផ្គង់នៅមានកម្រិតនាពេលអនាគត នឹងជំរុញឱ្យមានសក្ដានុពលនៃតម្រូវការផ្គត់ផ្គង់ក្នុងរយៈពេលខ្លីដល់រយៈពេលមធ្យម។
យោងតាមរបាយការណ៍សិក្សាស្រាវជ្រាវរបស់ក្រុមហ៊ុនប្រឹក្សាអចលនទ្រព្យ JLL បានបង្ហាញថា ការផ្គត់ផ្គង់នាពេលអនាគតត្រូវបានផ្តោតលើការសាងសង់សណ្ឋាគារប្រណីត ដែលសណ្ឋាគារជាង ៤.០០០បន្ទប់គ្រោងនឹងបើកដំណើរការនៅត្រឹមឆ្នាំ២០៣០ខាងមុខ។
គម្រោងសំខាន់ៗដូចជា សណ្ឋាគារ Mercure Hotel ដែលមាន៤០០បន្ទប់ និងសណ្ឋាគារ Pullman Gwangjin ដែលមាន១៨២បន្ទប់ គ្រោងបើកដំណើរការក្នុងឆ្នាំ២០២៥ ខណៈសណ្ឋាគារ Maison Delano ដែលមាន៨៣បន្ទប់ និងសណ្ឋាគារ Rosewood ដែលមាន២៥០បន្ទប់ គ្រោងនឹងបើកដំណើរការនៅចុងឆ្នាំ២០២៧។
ការស្ទុះងើបឡើងវិញនៃវិស័យសណ្ឋាគារនៅក្នុងទីក្រុងសេអ៊ូលកំពុងមានសន្ទុះកើនឡើង។ ជាពិសេស ទីផ្សារសណ្ឋាគារប្រណីតបន្តឈានឡើងដល់កម្រិតខ្ពស់បំផុតថ្មីមួយ ដែលបង្ហាញពីដំណើរការទីផ្សារដ៏រឹងមាំ។
ចំនួនភ្ញៀវទេសចរណ៍អន្តរជាតិត្រូវបានគេរំពឹងថា នឹងកើនឡើងលើសកម្រិតមុនផ្ទុះជំងឺរាតត្បាត ដោយសារការកើនឡើងនៃតម្រូវការពីភ្ញៀវទេសចរណ៍ចិន។ សណ្ឋាគារផ្នែកប្រណីត និងខ្នាតមធ្យម រំពឹងថា,នឹងមានកំណើនដ៏រឹងមាំ ទោះបីជាកត្តាសេដ្ឋកិច្ចពិភពលោកមិនអំណោយផលយ៉ាងណាក្តី។
ការវិនិយោគលើសណ្ឋាគារក៏ស្ទុះងើបឡើងវិញផងដែរ ស្របពេលដែលអ្នកវិនិយោគអន្តរជាតិបន្តស្វែងរកឱកាសវិនិយោគតម្លៃបន្ថែមក្នុងទីក្រុងសេអ៊ូល ហើយការចាប់អារម្មណ៍យ៉ាងខ្លាំងចំពោះទីផ្សាររបស់ទីក្រុងសេអ៊ូលជួយពង្រឹងនូវទស្សនវិស័យវិជ្ជមានសម្រាប់វិស័យនេះ៕ប្រភព: Real Estate New Asia៕
