ដោយ: គង់ លាងហួរ
អន្តរជាតិ: ក្រុមអ្នកជំនាញបានជំរុញឱ្យរដ្ឋាភិបាលរបស់ប្រទេសហ្វីលីពីន លុបចោលការរឹតបន្តឹងលើការផ្ទេរកម្មសិទ្ធិដីទៅឱ្យជនបរទេស ដើម្បីទាក់ទាញការវិនិយោគ។ នេះបើយោងតាមសារពត៌មាន Business World Online។
សភាពាណិជ្ជកម្មកូរ៉េខាងត្បូង (KCCP) បានលើកឡើងថា ការលុបចោលការរឹតបន្តឹង កម្មសិទ្ធិបរទេសលើដីធ្លី នឹងជួយទាក់ទាញអ្នកវិនិយោគកូរ៉េខាងត្បូង កាន់តែច្រើនមកកាន់ប្រទេសហ្វីលីពីន។
លោក Joseph Um ប្រធានសភាពាណិជ្ជកម្មកូរ៉េខាងត្បូង (KCCP) បានថ្លែងប្រាប់សារពត៌មាន BusinessWorld ថា ក្រុមហ៊ុនកូរ៉េខាងត្បូង កំពុងធ្វើការប្រៀបធៀប នូវឱកាសវិនិយោគនានានៅក្នុងតំបន់ ជាពិសេសបរិបទនៃលក្ខខណ្ឌវិនិយោគ នៅក្នុងប្រទេសវៀតណាម ថៃ និងបណ្តាប្រទេសអាស៊ានផ្សេងទៀត។
លោកបានបន្ថែមថា “ខ្ញុំគិតថា ហ្វីលីពីននៅតែត្រូវបើកចំហឱ្យជនបរទេស មានសិទ្ធិក្នុងការកាន់កាប់ដីធ្លី”។ លោកបានអះអាងថា “ប្រទេសហ្វីលីពីននឹងទទួលបានផលប្រយោជន៍ ពីការធ្វើសេរីភាវូបនីយកម្មលើច្បាប់កម្មសិទ្ធិដីធ្លី”។
យោងមាត្រា១២ នៃរដ្ឋធម្មនុញ្ញរបស់ប្រទេសហ្វីលីពីនបានកំណត់កម្មសិទ្ធិរបស់ជនបរទេស លើការកាន់កាប់ដីធ្លីត្រឹមតែ៤០ភាគរយប៉ុណ្ណោះ ខណៈចំណែកដែលនៅសល់ចំនួន៦០ភាគរយ ត្រូវបានទុកសម្រាប់តែប្រជាពលរដ្ឋហ្វីលីពីនប៉ុណ្ណោះ។
រីឯច្បាប់សាធារណៈលេខ៧៦៥២ ឬច្បាប់ភតិសន្យារបស់វិនិយោគិន អនុញ្ញាតឱ្យអ្នកវិនិយោគបរទេស អាចជួលដីឯកជន នៅប្រទេសហ្វីលីពីន ដរាបណាកិច្ចសន្យាជួលមានរយៈពេលសរុបមិនលើសពី៥០ឆ្នាំ និងអាចបន្តសពុលភាពជាថ្មីម្តងទៀតក្នុងរយៈពេលមិនលើសពី២៥ឆ្នាំ៕ ប្រភព: Business World Online៕
