ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យ Knight Frank ព្យាករណ៍ថា ការវិនិយោគអចលនទ្រព្យឆ្លងដែនទូទាំងតំបន់អាស៊ីប៉ាស៊ីហ្វិកនឹងកើនឡើង៥០ភាគរយក្នុងឆ្នាំ២០២៤ធៀបនឹងឆ្នាំមុន ដែលជំរុញដោយកំណើននៃការវិនិយោគលើមជ្ឈមណ្ឌលទិន្នន័យ។
ទីភ្នាក់ងារអចលនទ្រព្យបានអះអាងថា កំណើនដែលរំពឹងទុកនេះនឹងជំរុញការវិនិយោគដល់ទំហំទឹកប្រាក់ប្រហែល៤៨ពាន់លានដុល្លារ។ចំនួននេះជាកម្រិតខ្ពស់បំផុតក្នុងរយៈពេល២ឆ្នាំកន្លងមក។
ការវិនិយោគអចលនទ្រព្យឆ្លងដែននៅក្នុងតំបន់អាស៊ីប៉ាស៊ីហ្វិកបានកើនឡើង១៥,៧ភាគរយដល់ទំហំទឹកប្រាក់៣៦,៣ពាន់លានដុល្លារអាមេរិកក្នុងរយៈពេល៩ខែដំបូងនៃឆ្នាំ២០២៤។
យោងតាមក្រុមហ៊ុន Knight Frank បានឱ្យដឹងថា នៅទូទាំងពិភពលោក ការវិនិយោគអចលនទ្រព្យឆ្លងដែនបានធ្លាក់ចុះ១,៣ភាគរយ មកនៅត្រឹម៩៥,១ពាន់លានដុល្លារអាមេរិក ក្នុងរយៈពេល៩ខែដំបូងដូចគ្នានៃឆ្នាំនេះ បើធៀបនឹងឆ្នាំមុន។
លោក Neil Brookes ប្រធានផ្នែកទីផ្សារមូលធនសកលនៅក្រុមហ៊ុន Knight Frank បានអះអាងថា “ការកាត់បន្ថយអត្រាការប្រាក់នៅខែកញ្ញារបស់សហរដ្ឋអាមេរិកជាកត្តាជំរុញមួយ ដោយកាត់បន្ថយការចំណាយលើការខ្ចីប្រាក់ និងធ្វើឱ្យការទិញអចលនទ្រព្យកាន់តែមានភាពទាក់ទាញ”។
កាលពីខែមុន ធនាគារកណ្តាលអាមេរិក(Fed) បានសម្រេចកាត់បន្ថយអត្រាការប្រាក់ចំនួន០,៥ភាគរយ ជាលើកដំបូងក្នុងរយៈពេល៤ឆ្នាំ ក្រោយពីអត្រាអតិផរណារបស់សហរដ្ឋអាមេរិកសម្រេចបានស្ថិរភាពល្អប្រសើរវិញ។
លោកបានមានប្រសាសន៍ឱ្យដឹងបន្តថា “តំបន់អាស៊ីប៉ាស៊ីហ្វិកកំពុងទទួលរងឥទ្ធិពលវិជ្ជមានពីសញ្ញាសុទិដ្ឋិនិយមជាសកលនេះ ហើយយើងកំពុងមើលឃើញការកើនឡើងនៃទំនុកចិត្តរបស់វិនិយោគិននៅទូទាំងទីផ្សារក្នុងតំបន់របស់យើង”។
ទីភ្នាក់ងារ Knight Frank បានអះអាងថា ការវិនិយោគលើមជ្ឈមណ្ឌលទិន្នន័យបានចូលរួមចំណែកចំនួន៤៦ភាគរយនៃការវិនិយោគអចលនទ្រព្យឆ្លងដែនសរុបនៅក្នុងត្រីមាសទី៣ ខណៈក្រុមអ្នកវិនិយោគបានសម្លឹងឃើញសក្តានុពលពីភាពជឿនលឿនក្នុងវិស័យបញ្ញាសិប្បនិម្មិត (AI) និងកំណើននៃការផ្ទុកទិន្នន័យនៅទូទាំងតំបន់អាសុីប៉ាសុីហ្វិក។
តួយ៉ាង កាលពីខែកញ្ញា ក្រុមហ៊ុន Blackstone និងក្រុមហ៊ុន Canada Pension Plan Investment Board បានទិញយកមជ្ឈមណ្ឌលទិន្នន័យ AirTrunk នៅតំបន់អាស៊ីប៉ាស៊ីហ្វិកក្នុងតម្លៃ១៦ពាន់លានដុល្លារអាមេរិក។នេះជាកិច្ចព្រមព្រៀងដ៏ធំបំផុតមិនធ្លាប់មានពីមុនមក។
ប្រសិនបើមិនរាប់បញ្ចូលកិច្ចព្រមព្រៀងខាងលើ វិស័យមជ្ឈមណ្ឌលទិន្នន័យទូទាំងតំបន់បានទាក់ទាញការវិនិយោគក្នុងទំហំទឹកប្រាក់ចំនួន៥៤៤លានដុល្លារអាមេរិក កើនឡើង៣៦,៣ភាគរយធៀបនឹងឆ្នាំមុន។នេះបើយោងតាមក្រុមហ៊ុន Knight Frankដដែល៕ប្រភព: SCMP៕
