ដោយ: គង់ លាងហួរ
អន្តរជាតិ: តម្លៃផ្ទះនៅក្នុងទីក្រុង Yangon របស់ប្រទេសមីយ៉ាន់ម៉ា កំពុងកើនឡើងយ៉ាងគំហុក ស្របពេលអ្នកស្រុកជាច្រើនរស់នៅតំបន់ជនបទបានរត់ភៀសខ្លួនទៅកាន់ទីក្រុងដ៏ធំបំផុតមួយនេះ ដោយសារផលប៉ះពាល់នៃសង្រ្គាមស៊ីវិល។
ថ្មីៗនេះ ម្ចាស់ផ្ទះមួយរូបបានសាកសួរទៅកាន់អ្នកជំនួញជនជាតិឥណ្ឌាម្នាក់រស់នៅឯអគារប្រណីត StarCity នៅជាយក្រុង Yangon ថា “តើអ្នកនឹងពិចារណាបញ្ចប់កិច្ចសន្យាជួល ហើយចាកចេញពីទីនេះឬទេ?”។
អ្នកជំនួញឥណ្ឌារូបនោះបានបង្ហាញការភ្ញាក់ផ្អើលចំពោះសំណួរនេះ ព្រោះកិច្ចសន្យាជួលរបស់លោកមានរយៈពេល១ឆ្នាំ។ គិតមកទល់ពេលនេះ កិច្ចសន្យាមានសពុលភាពនៅសេសសល់ជិត៦ខែ។ ប៉ុន្តែ ម្ចាស់ផ្ទះមានបំណងលក់ផ្ទះនោះចេញភ្លាមៗ បន្ទាប់ពីអតិថិជនមួយរូបមកពីទីក្រុង Mandalay ស្ថិតនៅចំកណ្តាលប្រទេសមីយ៉ាន់ម៉ា បានស្នើសុំទិញយកក្នុងតម្លៃខ្ពស់។
ការប្រយុទ្ធគ្នារវាងរបបយោធាមីយ៉ាន់ម៉ា និងក្រុមបះបោរជនជាតិភាគតិចកំពុងរីករាលដាលទូទាំងប្រទេស។ ជាមួយគ្នានេះ លំហូរជនភៀសខ្លួនចេញពីទីក្រុងដែលមានការប្រយុទ្ធគ្នាកំពុងសម្រុកទៅកាន់ទីក្រុង Mandalay ជាទីក្រុងធំបំផុតទី២របស់ប្រទេសមីយ៉ាន់ម៉ា។
ផ្ទុយទៅវិញ ការណ៍នេះបានជំរុញឱ្យប្រជាជនមានដើមកំណើតនៅក្នុងទីក្រុង Mandalay កាន់តែច្រើនផ្លាស់ទីលំនៅទៅកាន់ទីក្រុង Yangon។
ការកើនឡើងនៃតម្លៃលំនៅដ្ឋានក៏បណ្តាលមកពីកត្តាប្រជាជនសម្រុកងាកចេញពីការវិនិយោគលើរូបិយប័ណ្ណក្នុងស្រុកទៅជាការវិនិយោគលើអចលនទ្រព្យជំនួសវិញ ដោយសារពួកគេភ័យខ្លាចថា តម្លៃរូបិយប័ណ្ណក្នុងស្រុករបស់មីយ៉ាន់ម៉ានឹងដាំក្បាលចុះបន្ថែមទៀត។
យោងតាមទីភ្នាក់ងារអចលនទ្រព្យ iMyanmarHouse បានរាយការណ៍ថា ខុនដូស្តង់ដារជាច្រើននៅទីក្រុង Yangon ត្រូវបានដាក់លក់ក្នុងតម្លៃប្រហែល៥០០លានគីយ៉ាត (ប្រមាណ៩១.០០០ដុល្លារអាមេរិក) ក្នុងមួយយូនីតនៅក្នុងខែសីហា ឆ្នាំ២០២៤។
តួលេខនៃតម្លៃខាងលើបានហក់ឡើងជាង៧០% បើធៀបនឹងកម្រិតតម្លៃនៅក្នុងខែកុម្ភៈ ឆ្នាំ២០២១ នៅពេលក្រុមយោធាមីយ៉ាន់ម៉ាបានចូលកាន់កាប់រដ្ឋាភិបាល។ តម្លៃខុនដូជាមធ្យមបានកើនឡើងប្រហែល៣០% ក្នុងចន្លោះខែមិថុនា និងខែកក្កដា ឆ្នាំ២០២៤៕ប្រភព: Nikkei Asia៕
