អ្នកអភិវឌ្ឍន៍អចលនទ្រព្យខ្នាតយក្សចំនួន២មិនសមបំណង លើការអភិវឌ្ឍអចលនទ្រព្យនៅសិង្ហបុរី

ដោយ: គង់ លាងហួរ

អន្តរជាតិ: ក្រុមហ៊ុនអចលនទ្រព្យធំៗចំនួន២ របស់សិង្ហបុរីបានរាយការណ៍ ពីលទ្ធផលប្រាក់ចំណូលខុសគ្នា នៅក្នុងឆមាសទី១ កាលពីថ្ងៃទី១៤ ខែសីហា ដោយសារការដំឡើងអត្រាការប្រាក់ និងការធ្លាក់ចុះនៃទីផ្សារអចលនទ្រព្យសកល។

ប្រាក់ចំណេញសុទ្ធ(Net Profit) របស់ក្រុមហ៊ុនយក្ស CapitaLand Investment (CLI) ក្នុងឆមាសទី១ បានធ្លាក់ចុះ៥,៧%មកនៅត្រឹម៣៣១លានដុល្លារ បើធៀបនឹងឆ្នាំមុន បន្ទាប់ពីខាតបង់ចំនួន១៧០លានដុល្លារ ក្នុងឆមាសទី២ ឆ្នាំ២០២៣។ ប៉ុន្តែប្រាក់ចំណូល(Revenue) បានកើនឡើងបន្តិចដល់១,៣៧ពាន់លានដុល្លារ។

ក្រុមហ៊ុន CapitaLand បានវាយតម្លៃថា ការធ្លាក់ចុះនៃប្រាក់ចំណេញរបស់ខ្លួន បណ្តាលមកពីការវិនិយោគ អចលនទ្រព្យ ដែលបានរងផលប៉ះពាល់ ពីការដំឡើងអត្រាការប្រាក់ខ្ពស់ និងការប្រែប្រួលនៃអត្រាប្តូរប្រាក់បរទេស។

ទាក់ទងនឹងបញ្ហានេះ លោក Lee Chee Koon នាយកប្រតិបត្តិក្រុមហ៊ុនCLI បានលើកឡើងថា “នៅឆ្នាំ២០២៤នេះ យើ​ងនឹងបន្តស្តារផលប័ត្រឡើងវិញ និងបន្តរក្សានូវសន្ទុះនៃការធ្វើពិពិធកម្មការវិនិយោគ នៅក្នុងប្រទេសចិន និងសហរដ្ឋអាមេរិក”។

លោក Andrew Lim ប្រធានគ្រប់គ្រងផ្នែកប្រតិបត្តិការ(COO) របស់ក្រុមហ៊ុន CapitaLand Investment អះអាងថា លោកមើលឃើញឱកាសវិនិយោគ នៅក្នុងប្រទេសអូស្ត្រាលី ដូចជា ផ្នែកឥណទាន និងកន្លែងស្នាក់នៅ។  ក្រុមហ៊ុនក៏កំពុងស្វែងរកការវិនិយោគ លើមជ្ឈមណ្ឌលទិន្នន័យរបស់ប្រទេសជប៉ុន ក៏ដូចជាអគារការិយាល័យកម្រិត A របស់ប្រទេសកូរ៉េខាងត្បូងផងដែរ។

ទន្ទឹមនឹងនោះ ប្រាក់ចំណេញសុទ្ធរបស់ក្រុមហ៊ុន City Developments (CDL) បានកើនឡើង៣២ភាគរយ ដល់៨៧,៨លានដុល្លារ ក្នុងរយៈពេល៦ខែដើមឆ្នាំនេះ បើធៀបនឹងប្រាក់ចំណូលសុទ្ធចំនួន៦៦,៥លានដុល្លារ ដែលបានកត់ត្រាក្នុងរយៈពេលដូចគ្នាកាលពីឆ្នាំមុន។

ប៉ុន្តែប្រាក់ចំណូល(Revenue) បានដាំក្បាលចុះ៤២ភាគរយដល់១,៥៦ពាន់លានដុល្លារ។

លោក Sherman Kwek នាយកប្រតិបត្តិក្រុមហ៊ុន CDL  បានបញ្ជាក់ នៅក្នុងសេចក្តីថ្លែងការណ៍មួយថា “វិស័យអចលនទ្រព្យបានប្រឈមមុខ នឹងបញ្ហាយ៉ាងខ្លាំង ពីលក្ខខណ្ឌម៉ាក្រូសេដ្ឋកិច្ច និងការចំណាយហិរញ្ញប្បទានកាន់តែខ្ពស់ ដែលជះឥទ្ធិពល ដល់ដំណើរការហិរញ្ញវត្ថុរបស់ក្រុមហ៊ុន”៕ប្រភព:BLOOMBERG៕