ដោយៈ គង់ ម៉ាលីនណា
ភ្នំពេញៈ សមាគមមីក្រូហិរញ្ញវត្ថុកម្ពុជា (CMA) បានឱ្យដឹងថាត្រឹមដំណាច់ឆ្នាំ ២០២៣ ឥណទានជាប្រាក់រៀល បានកើនឡើងដល់ ២៥ ភាគរយ នៃផលបត្រឥណទានសរុប ខណៈដែលប្រាក់បញ្ញើជាប្រាក់រៀលបានកើនឡើងដល់១៦ ភាគរយ នៃប្រាក់បញ្ញើសរុប។
យោងតាមសេចក្តីប្រកាសព័ត៌មានរបស់សមាគមស្តីពី វិស័យមីក្រូហិរញ្ញវត្ថុ បានជួយជំរុញកំណើនប្រើប្រាស់ប្រាក់រៀល ក្នុងឆ្នាំ ២០២៣ ដែលបានចេញផ្សាយនៅថ្ងៃទី ២៥ ខែមីនា ឆ្នាំ ២០២៤។
ក្នុងសេចក្តីប្រកាសព័ត៌មានបានបញ្ជាក់ទៀតថា តួលេខនេះកើនលើសកម្រិតកំណត់ដោយបទប្បញ្ញត្តិ ដែលបង្ហាញពីការកើនឡើងនៃទំនុកចិត្តលើរូបិយប័ណ្ណជាតិ។ កិច្ចប្រឹងប្រែងទាំងនេះមិនត្រឹមតែបានជំរុញឱ្យមានទំនុកចិត្តដ៏រឹងមាំលើប្រាក់រៀលប៉ុណ្ណោះទេ ប៉ុន្តែថែមទាំងបង្ហាញពីការប្តេជ្ញាចិត្តរបស់វិស័យនេះចំពោះការលើកកម្ពស់ភាពលេចធ្លោរបស់ប្រាក់រៀល នៅក្នុងប្រព័ន្ធអេកូឡូស៊ី នៃវិស័យហិរញ្ញវត្ថុនៅកម្ពុជាទៀតផង។
CMAបានបញ្ជាក់ថា សមតុល្យឥណទានជាប្រាក់រៀលបានកើនឡើងដល់ចំនួន៥,៥៦ ពាន់ពាន់លានរៀល ខណៈប្រាក់បញ្ញើជាលុយរៀលនៅតាមគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ (MDI)ទាំង៤បានកើនឡើងដល់១,៥២ពាន់ពាន់លានរៀល។ ទិន្នន័យនេះ បានបង្ហាញពីការផ្លាស់ប្តូរគួរឱ្យកត់សម្គាល់ នៃទម្លាប់សន្សំរបស់សាធារណជន ឆ្ពោះទៅរកការសន្សំជារូបិយប័ណ្ណក្នុងស្រុក។
លោកស្រីឌិត នីតា ប្រធានសមាគមមីក្រូហិរញ្ញវត្ថុកម្ពុជាបានលើកឡើងពីសារៈសំខាន់ ជាយុទ្ធសាស្ត្រនៃគំនិតផ្តួចផ្តើមទាំងនេះ។
លោកស្រីបានបញ្ជាក់ថា វិធីសាស្ត្រដ៏មានប្រសិទ្ធភាព ដែលសមាជិករបស់យើងបានអនុវត្តក្នុងឆ្នាំ ២០២៣ ត្រូវបានរៀបចំឡើងដើម្បីលើកកម្ពស់តួនាទីរបស់ប្រាក់រៀល ក្នុងប្រតិបត្តិការហិរញ្ញវត្ថុ និងធ្វើឱ្យទំនាក់ទំនងរវាងសហគមន៍ និងរូបិយប័ណ្ណជាតិកាន់តែមានភាពស៊ីជម្រៅ។
លោកស្រីបញ្ជាក់ថា “កិច្ចខិតខំប្រឹងប្រែងនេះ មានសារៈសំខាន់ណាស់ ក្នុងការបង្កើតប្រព័ន្ធអេកូឡូស៊ី នៃវិស័យហិរញ្ញវត្ថុប្រកបដោយបរិយាបន្ននិងមានភាពធន់”។
ឥណទានមីក្រូហិរញ្ញវត្ថុបានជះឥទ្ធិពលខ្លាំង លើសេដ្ឋកិច្ចកម្ពុជា តាមរយៈវិស័យផ្សេងៗដូចជា គ្រួសារ ពាណិជ្ជកម្ម កសិកម្ម និងផ្នែកផ្សេងៗទៀត។ សកម្មភាពទាំងនេះបញ្ជាក់ពីការប្តេជ្ញាចិត្តរបស់វិស័យមីក្រូហិរញ្ញវត្ថុ ក្នុងការជំរុញការអភិវឌ្ឍសេដ្ឋកិច្ចដ៍ទូលំទូលាយ។
លោកស្រីប្រធានសមាគម បានបញ្ជាក់បន្ថែមថា អន្តរាគមន៍នៃឥណទាន តាមវិស័យគោលដៅដ៏ច្បាស់លាស់នេះ មិនត្រឹមតែបានជំរុញសកម្មភាពសេដ្ឋកិច្ចប៉ុណ្ណោះទេ ថែមទាំងបានសង្កត់ធ្ងន់លើតួនាទីដ៏សំខាន់ របស់វិស័យមីក្រូហិរញ្ញវត្ថុ ក្នុងការគាំទ្រការអភិវឌ្ឍរបស់ប្រទេសកម្ពុជាទៀតផង។
នៅក្នុងសិក្ខាសាលាស្តីពីឱកាសខួបលើកទី៤៤ នៃការដាក់ឱ្យចរាចរប្រាក់រៀលឡើងវិញ ក្នុងដំណើរឆ្ពោះទៅមុខ ដើម្បីប្រាក់រៀល និងប្រព័ន្ធបាគង កាលពីពេលថ្មីៗនេះ នៅមជ្ឈមណ្ឌលសិក្សាបច្ចេកទេសធនាគារ រាជធានីភ្នំពេញ លោកស្រី ជា សិរី ទេសាភិបាលធនាគារជាតិនៃកម្ពុជាបានថ្លែងថា ការប្រើប្រាស់ប្រាក់រៀលតាមប្រព័ន្ធអេឡិចត្រូនិកបានកើនឡើង ក្នុងអត្រាមួយខ្ពស់ដោយក្នុងឆ្នាំ ២០២៣ ប្រតិបត្តិការទូទាត់ជាប្រាក់រៀល តាមប្រព័ន្ធអេឡិចត្រូនិកបានកើនឡើង៤៤ភាគរយ ធៀបនឹងឆ្នាំ២០២២។
លោកស្រីបានបន្ថែមថា ជាលទ្ធផល ការប្រើប្រាស់ប្រាក់រៀលតាមប្រព័ន្ធអេឡិចត្រូនិកបានកើនឡើង ក្នុងអត្រាមួយខ្ពស់ ដោយក្នុងឆ្នាំ២០២៣ ប្រតិបត្តិការទូទាត់ជាប្រាក់រៀល តាមប្រព័ន្ធអេឡិចត្រូនិកបានកើនឡើង៤៤ភាគរយ ធៀបនឹងឆ្នាំ២០២២ និងខ្ពស់ជាងកំណើននៃប្រតិបត្តិការទូទាត់ អេឡិចត្រូនិកជាប្រាក់ដុល្លារអាមេរិក ដែលកើនក្នុងអត្រា៣,១ ភាគរយ។
លោកស្រីបានបញ្ជាក់ថា ធនាគារជាតិនៃកម្ពុជា ក៏បានជំរុញការតភ្ជាប់ប្រព័ន្ធទូទាត់ជាមួយប្រទេសជិតខាង និងក្នុងតំបន់ ដើម្បីឱ្យប្រជាពលរដ្ឋកម្ពុជា ដែលមានគណនីជាប្រាក់រៀល អាចទូទាត់តាមប្រព័ន្ធឃ្យូអរកូដ (QR code) បានងាយស្រួលនៅក្នុងប្រទេសទាំងនោះ។ ក្នុងទិសដៅលើកកម្ពស់ការប្រើប្រាស់ប្រាក់រៀល ធនាគារជាតិនៃកម្ពុជាបានខិតខំ សម្រួលការប្រើប្រាស់ប្រាក់រៀលឱ្យមានភាពងាយស្រួលជាបន្តបន្ទាប់។
លោកស្រីបន្តថា ក្នុងចំណោមវិធានការនានា ប្រព័ន្ធទូទាត់អេឡិចត្រូនិក ជាពិសេសប្រព័ន្ធបាគង បានរួមចំណែកយ៉ាងសំខាន់ក្នុងការសម្រួល ដល់ការទូទាត់ប្រាក់រៀល ឱ្យកាន់តែមានភាពទាន់សម័យ ឆាប់រហ័ស និងចំណាយតិច។
លោកស្រីជា សិរី បានសង្កត់ធ្ងន់ថា ការតភ្ជាប់នេះក៏បានអនុញ្ញាតឱ្យទេសចរបរទេស អាចទូទាត់តាមរយៈឃ្យូអរកូដ (QR code) នៅតាមហាងទំនិញនានានៅកម្ពុជា ដែលហាងទាំងនោះនឹងទទួលបានការទូទាត់នេះជាប្រាក់រៀល។
បច្ចុប្បន្ន កម្ពុជាបានតភ្ជាប់ប្រព័ន្ធទូទាត់ជាមួយប្រទេសថៃ វៀតណាម និងឡាវ ព្រមទាំងក្រុមហ៊ុនផ្តល់សេវាទូទាត់អន្តរជាតិមួយចំនួន ជាមួយនឹងផែនការតភ្ជាប់ ជាមួយប្រទេសផ្សេងទៀត ក្នុងតំបន់ ដូចជា ចិន និងឥណ្ឌាជាដើម។
របាយការណ៍CMAបានឲ្យដឹងទៀតថា ប្រតិបត្តិការទូទាត់ជាប្រាក់រៀលតាមរយៈប្រព័ន្ធទូទាត់បាគង បានកើនឡើងគួរឱ្យកត់សម្គាល់ ពោលគឺកើនឡើង៣,៤ដង ខ្ពស់ជាងខ្លាំងធៀបនឹងកំណើនប្រតិបត្តិការទូទាត់ជាប្រាក់ដុល្លារ ដែលបញ្ជាក់ពីភាពជោគជ័យនៃរូបិយប័ណ្ណជាតិ។
កំណើននេះ បង្ហាញពីដំណើរទៅមុខរួមគ្នាឆ្ពោះទៅរកការពង្រឹងតួនាទីរបស់ប្រាក់រៀល ក្នុងនាមជាមធ្យោបាយ នៃការដោះដូរទំនិញ ដែលជួយកាត់បន្ថយគម្លាត រវាងពាណិជ្ជកម្មឌីជីថល និងពាណិជ្ជកម្មបែបប្រពៃណី ហើយនេះក៏ជាការបង្ហាញឱ្យច្បាស់ អំពីដំណើររបស់កម្ពុជាឆ្ពោះទៅរកភាពស្វ័យម្ចាស់ការ និងនិរន្តរភាពផ្នែកសេដ្ឋកិច្ច។
វិស័យមីក្រូហិរញ្ញវត្ថុកម្ពុជា បានក្លាយជាកម្លាំងចលករដ៏សំខាន់នៅក្នុងសេដ្ឋកិច្ចជាតិ ដោយបានជួយជំរុញឱ្យមានកំណើនដ៏គួរឱ្យចាប់អារម្មណ៍ នូវការប្រើប្រាស់ប្រាក់រៀលក្នុងឆ្នាំ ២០២៣។ ក្រោមកិច្ចប្រឹងប្រែងដែលដឹកនាំ ដោយធនាគារជាតិនៃកម្ពុជា សមាជិកនៃសមាគមមីក្រូហិរញ្ញវត្ថុកម្ពុជា បានខិតខំឈ្មុសឈ្មុលធ្វើដំណើរឆ្ពោះទៅរកការបង្កើន ការប្រើប្រាស់រូបិយប័ណ្ណក្នុងស្រុក ដោយពង្រឹងតួនាទី និងភាពធន់របស់ប្រាក់រៀល ក្នុងរចនាសម្ព័ន្ធសេដ្ឋកិច្ចកម្ពុជា៕
