ដោយៈ គង់ សូរិយា
ភ្នំពេញៈ យោងតាមសេចក្តីប្រកាសព័ត៌មាន កាលពីថ្ងៃសៅរ៍ ថា ធនាគារពិភពលោក បានអនុម័តឥណទាន បន្ថែមចំនួន៣៥លានដុល្លារដល់ប្រទេសកម្ពុជា សម្រាប់ការកែលម្អផ្លូវជនបទ ដែលធន់នឹងអាកាសធាតុនៅក្នុងខេត្តចំនួនបី។
ឥណទាននេះ នឹងគាំទ្រដល់គម្រោងកែលម្អ ការតភ្ជាប់ផ្លូវនៅកម្ពុជា ដើម្បីកែលម្អផ្លូវដែលធន់នឹងអាកាសធាតុ តភ្ជាប់ទៅកាន់តំបន់ទីផ្សារ សេវាសុខភាព និងសាលារៀនទូទាំងខេត្តក្រចេះ កំពង់ចាម និងខេត្តត្បូងឃ្មុំ។
សេចក្តីប្រកាសព័ត៌មានបានបន្ថែមថា ខេត្តទាំងបីមានប្រជាជនជាង២លាននាក់ ក្នុងនោះ៨០ភាគរយរស់នៅក្នុងតំបន់ជនបទ ដោយបន្ថែមថា គម្រោងកែលម្អការតភ្ជាប់ផ្លូវនៅកម្ពុជា ត្រូវបានអនុម័តនៅក្នុងខែកក្កដា ឆ្នាំ២០២០ ជាមួយនឹងការផ្តល់ហិរញ្ញប្បទានចំនួន១០០លានដុល្លារ។
ឥណទានបន្ថែមនេះ នឹងជួយចំណាយលើថ្លៃគម្រោង ដែលគេរំពឹងទុកនានា ជាចម្បងសម្រាប់កិច្ចសន្យាការងារផ្លូវថ្នល់ ដោយបន្ថែមថាអតិផរណាខ្ពស់ និងតម្លៃកើនឡើងនៃធាតុចូលសំខាន់ៗ រួមទាំងប្រេងឥន្ធនៈ និងកៅស៊ូ(bitumen) ក្នុងរយៈពេល៣ឆ្នាំចុងក្រោយនេះ ដែលធ្វើឱ្យមានការចំណាយ ខ្ពស់ជាងការប៉ាន់ស្មាន នៅឆ្នាំ២០១៩ មុនពេលការអនុម័តគម្រោងដើម។
សេចក្តីប្រកាសព័ត៌មានបានឲ្យដឹងថា បច្ចុប្បន្ននេះការងារជួសជុលផ្លូវ កំពុងដំណើរការលើផ្លូវជាតិ និងផ្លូវខេត្តគោលដៅចំនួន១៣០ គីឡូម៉ែត្រ និងផ្លូវជនបទចំនួន១៤២ ក្នុងចំណោម២៧០គីឡូម៉ែត្រ។
លោកស្រី Maryam Salim ប្រធានប្រចាំប្រទេសរបស់ធនាគារពិភពលោកនៅកម្ពុជាបានមានប្រសាសន៍ថា “លទ្ធភាពទទួលបានសេវាសុខភាព និងសាលារៀន និងការផ្លាស់ប្តូរទំនិញទៅកាន់ទីផ្សារ ជាពិសេសក្នុងរដូវវស្សា បានបង្កបញ្ហាប្រឈមយ៉ាងខ្លាំង សម្រាប់ប្រជាជនកម្ពុជានៅតាមតំបន់ជនបទ”។
លោកស្រីបានបន្ថែមថា “ស្ថានភាពផ្លូវមិនល្អ ការរំខានដែលបណ្តាលមកពីទឹកជំនន់ និងថ្លៃដឹកជញ្ជូនខ្ពស់ ក៏ជាឧបសគ្គចម្បងក្នុងការទទួលបានការថែទាំសុខភាព និងការសង្គ្រោះបន្ទាន់សម្រាប់ស្រ្តីមានផ្ទៃពោះ”។ គម្រោងនេះកំពុងអនុវត្តន៍ ដោយក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទ៕