ដោយ៖ ម៉ាណេត
ភ្នំពេញ៖ ពាណិជ្ជកម្មទ្វេភាគីរវាងកម្ពុជា និងថៃ សម្រេចបានទំហំទឹកប្រាក់ ១១៩,៣០ ពាន់លានបាត ឬ៣,៨៤ពាន់លានដុល្លារ កើនឡើង ០,៧៣% ក្នុងរយៈពេល ៩ ខែ ឆ្នាំ២០២០ ធៀបនឹងរយៈពេលដូចគ្នាលពីឆ្នាំមុន ខណៈពាណិជ្ជកម្មឆ្លងដែនរបស់ប្រទេសថៃ រួមទាំងពាណិជ្ជកម្មឆ្លងកាត់បានធ្លាក់ចុះ ៤,៨៨% ដែលជំរុញដោយការរីករាលដាលនិងសេដ្ឋកិច្ចធ្លាក់ចុះ។
នាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ បានរាយការណ៍កាលពីថ្ងៃពុធថា ការធ្វើពាណិជ្ជកម្មតាមព្រំដែន និងឆ្លងកាត់សរុបមានចំនួន ៩៦៨,៨៧ ពាន់លានបាត ខណៈប្រទេសម៉ាឡេស៊ីជាដៃគូធំបំផុតដោយសារតម្លៃនាំចេញ និងកៅស៊ូ ដែលទទួលបានតម្លៃខ្ពស់បំផុតក្នុងចំណោមផលិតផលដែលត្រូវបានធ្វើពាណិជ្ជកម្ម។
ការធ្វើពាណិជ្ជកម្មឆ្លងកាត់ មានប្រទេសជាច្រើន។
ក្នុងចំណោមតួលេខសរុបការនាំចេញមានចំនួន ៥៦៣,៩៥ ពាន់លានបាត ធ្លាក់ចុះ ៤,៦៦ ភាគរយធៀបនឹងឆ្នាំមុន ខណៈពេលដែលការនាំចូល មានតម្លៃ ៤០៤,៩២ ពាន់លានបាត ធ្លាក់ចុះ ៥,១៩ ភាគរយ ដែលធ្វើឱ្យអតិរេកពាណិជ្ជកម្មមានចំនួន ១៥៩,០២ ពាន់លានបាត។
ពាណិជ្ជកម្មតាមព្រំដែនជាមួយប្រទេសជិតខាងចំនួន ៤ របស់ថៃ មានតម្លៃ ៥៦១,១០ ពាន់លានបាត ធ្លាក់ចុះ ១០,០៣% ធៀបនឹងឆ្នាំមុន។ ការនាំចេញសរុប មានទំហំទឹកប្រាក់ ៣២៩,៨៧ ពាន់លានបាត ធ្លាក់ចុះ ៨,៤៥% និងការនាំចូលមានចំនួន ២៣១,២២ ពាន់លានបាត ធ្លាក់ចុះ ១២,១៩% ។ ប្រទេសថៃបានរក្សាអតិរេកពាណិជ្ជកម្មក្នុងទំហំទឹកប្រាក់ ៩៨,៦៤ ពាន់លានបាត។
ពាណិជ្ជកម្មទ្វេភាគីជាមួយម៉ាឡេស៊ីមានចំនួន ១៧៥,១០ ពាន់លានបាត (ធ្លាក់ចុះ ១៧,២៣%) បន្ទាប់មកពាណិជ្ជកម្មជាមួយឡាវ (១៣៩,៦៨ ពាន់លានបាត ធ្លាក់ចុះ ៥,៦០%) មីយ៉ាន់ម៉ា (១២៧,០១ ពាន់លានបាត ធ្លាក់ចុះ ១២,៨៣%) និងកម្ពុជា (១១៩,៣០ ពាន់លានបាត ឬ៣,៨៤ពាន់លានដុល្លារ កើនឡើង ០,៧៣%)។
ជារួមពាណិជ្ជកម្មឆ្លងកាត់ មានតម្លៃ៤០៧,៧៧ ពាន់លានបាត បានកើនឡើង ៣,២៥ ភាគរយចន្លោះពីខែមករាដល់ខែកញ្ញាឆ្នាំនេះ ។
ពាណិជ្ជកម្មឆ្លងកាត់ជាមួយចិនខាងត្បូង មានតម្លៃ ១៧៦,២១ ពាន់លានបាត បានកើនឡើង ១៨,១៩% និងសិង្ហបុរី មានតម្លៃ ៦៤,៤៤ ពាន់លានបាត កើនឡើង ១១,៨៩%។ ការនាំចេញសំខាន់ៗ រួមមានផ្លែឈើ កុំព្យូទ័រ និងគ្រឿងបន្លាស់ ផលិតផលកៅស៊ូ ម៉ាស៊ីន និងសៀគ្វីអគ្គិសនី។
តម្លៃពាណិជ្ជកម្មឆ្លងកាត់ជាមួយប្រទេសវៀតណាម មានទំហំទឹកប្រាក់៤៥,៥៨ ពាន់លានបាត ធ្លាក់ចុះ ១៥,០៥ ភាគរយ និងប្រទេសដទៃទៀតមានតម្លៃ ១២១,៥៧ ពាន់លានបាត ធាក់ចុះ ៩,៧១ ភាគរយ។ ប្រទេសផ្សេងទៀត រួមមានអ្នកនាំចូលបន្ទាប់បន្សំ ដូចជាហុងគ្រី រុស្ស៊ី ឥណ្ឌា ក្រូអាត សហភាពអឺរ៉ុប និងសហរដ្ឋអាមេរិក។
លោក Keerati Rushchano អគ្គនាយកនៃនាយកដ្ឋានពាណិជ្ជកម្មបរទេស បាននិយាយថា កត្តាសំខាន់ដែលប៉ះពាល់ដល់ទំហំពាណិជ្ជកម្មតាមព្រំដែនគឺជំងឺរាតត្បាត និងការបិទច្រកទ្វារព្រំដែន ដើម្បីទប់ស្កាត់ការផ្ទុះឡើងនៃការរាលដាល៕ Bangkok Post
