ដោយៈ ហ្វីអូណា
ភ្នំពេញៈ កម្ពុជាបានចំណាយប្រាក់ជិត១,០៨ពាន់លានដុល្លារ លើការនាំចូលប្រេងឥន្ធនៈចំនួន៤ប្រភេទ ដើម្បីបំពេញតម្រូវការប្រើប្រាស់ក្នុងស្រុកនាឆមាសទី១ ឆ្នាំ២០២៣។ការនាំចូលនេះ ធ្លាក់ចុះជិត១០ភាគរយ បើធៀបនឹងរយៈពេលដូចគ្នាឆ្នាំ២០២២។ នេះបើតាមក្រសួងពាណិជ្ជកម្ម។
ទិន្នន័យដដែលបានបង្ហាញថា ចាប់ពីខែមករា ដល់ខែមិថុនា ឆ្នាំ ២០២៣ ការនាំចូលប្រេង (៤ ប្រភេទ) មានទឹកប្រាក់ ១ ០៧៨,១៥ លានដុល្លារធ្លាក់ចុះ៩,៧២ភាគរយ ធៀបនឹងរយៈពេលដូចគ្នាឆ្នាំមុន។ ប្រេងឥន្ធនៈទាំង៤នោះ រួមមាន ប្រេងម៉ាស៊ូត (D.O) ចំនួន ៦៥១,៨៥លានដុល្លារ ធ្លាក់ចុះ៨,០៤ភាគរយ ប្រេងសាំង (E.A) ៣៩០,៩៨ លានដុល្លារ ធ្លាក់ចុះ៥,៣ភាគរយ ប្រេងសាំងយន្តហោះ (ZA1) ៣២,០៥លានដុល្លារ កើនឡើង៥៥,៨១ភាគរយ និងប្រេងខ្មៅ (F.O) មានចំនួន៣,២៦លានដុល្លារ ធ្លាក់ចុះ៩៣,៧១ភាគរយ។
អ្នកវិភាគសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ឲ្យដឹងកាលពីពេលថ្មីៗនេះថា ការធ្លាក់ចុះចំនួនប្រាក់នាំចូលប្រេងឥន្ធនៈ កាលពីឆមាសទី១ ឆ្នាំនេះ គឺដោយសារកត្តារួមផ្សំមួយចំនួន ដូចជា តម្លៃប្រេងក្នុងឆមាសទី១ ឆ្នាំ២០២២ ខ្ពស់ជាងឆមាសទី១ ឆ្នាំ២០២៣ (តម្លៃប្រេងបានកើនខ្ពស់ បន្ទាប់ពីជម្លោះប្រដាប់អាវុធ រវាងប្រទេសនាំចេញប្រេងរុស្ស៊ី ជាមួយអ៊ុយក្រែន) ការធ្លាក់ចុះចំនួនរោងចក្រ /សហគ្រាស ដែលប្រើម៉ាស៊ីនភ្លើងផ្ទាល់ កំណើនរថយន្តអគ្គិសនី និងជាពិសេសការប្រើប្រាស់ប្រេងខ្មៅសម្រាប់ផលិតអគ្គិសនីនៅកម្ពុជា បានធ្លាក់ចុះយ៉ាងគំហុក (កំណើនថាមពលអគ្គិសនី ទទួលបានពីថាមពលកកើតឡើងវិញ)។
លោកបញ្ជាក់ថា “សម្រាប់ខ្ញុំការធ្លាក់ចុះទឹកប្រាក់ ក្នុងការនាំចូលប្រេងឥន្ធនៈ កាលពីឆមាសទី១ កន្លងមក គឺមិនឆ្លុះបញ្ជាំងពីការធ្លាក់ចុះនៃសមត្ថភាពផលិតកម្មនៅកម្ពុជាឡើយ”។លោកបន្តថា “ការថមថយនេះ គឺដោយសាររោងចក្រ និងសហគ្រាសនៅកម្ពុជាស្ទើរទាំងអស់បាននាំគ្នាងាកមកប្រើអគ្គិសនី ដែលផលិតពីប្រភពស្អាត (មិនបំពុលបរិស្ថាន) កាន់តែច្រើន”៕
