ដោយ: គង់ លាងហួរ
អន្តរជាតិ: ជនអន្តោប្រវេសន៍ហុងកុង ដែលធ្វើដំណើរទៅរស់នៅកាន់ចក្រភពអង់គ្លេស កំពុងរីករាយនឹងការធ្លាក់ចុះ នៃទីផ្សារលំនៅដ្ឋានរបស់ប្រទេសមួយនេះ ក្នុងពេលបច្ចុប្បន្ន ខណៈដែលវាបង្ហាញពីឱកាសវិនិយោគអចលនទ្រព្យមួយផ្សេងទៀត។
ជាក់ស្តែង លោកស្រី F. Chiu ជាជនជាតិហុងកុងដែលបានផ្លាស់ទៅទីក្រុងឡុងដ៍ ជាមួយឪពុកកាលពីជិតមួយឆ្នាំមុន កាលពីពេលថ្មីៗនេះ បានទិញផ្ទះល្វែងទំហំជិត១ពាន់ម៉ែត្រហ្វីត នៅគម្រោង TCRW Soho របស់ Galliard Homes ក្នុងតម្លៃ£២,១៥លានផោន(ប្រហែល២,៦៨លានដុល្លារ) ។
លោកស្រីក៏បានទិញផ្ទះមួយល្វែងទៀត កាលពីប៉ុន្មានសប្តាហ៍មុន ដែលលើកនេះទិញនៅគម្រោង Orchard Wharf ស្ថិតក្នុងទីក្រុង London Docklands ហើយយូនីតដែលមានបន្ទប់គេងមួយ នៅក្នុងគម្រោងនេះ មានតម្លៃចាប់ពី៤៦០.០០០ផោនឡើងទៅ។
លោកស្រី Chiu ដែលស្នើសុំបង្ហាញតែឈ្មោះគ្រួសារបានអះអាងថា “បទពិសោធន៍នៃការទិញលើកដំបូង ផ្តល់ឱ្យខ្ញុំនូវទំនុកចិត្តគ្រប់គ្រាន់ ក្នុងការទិញផ្ទះមួយផ្សេងទៀត”។លោកស្រីបន្ថែមថា “យើងបានទិញអចលនទ្រព្យ Orchard Wharf ជាសាច់ប្រាក់ ហើយអ្នកជួលផ្ទះរបស់យើង បានផ្លាស់ចូលទៅរស់នៅ នៅថ្ងៃទី៣បន្ទាប់ពីខ្ញុំទទួលបានសោ”។
ការទិញផ្ទះលើកទីពីរ របស់លោកស្រី Chiu កើតឡើងចំពេលមានសំណាង។ ពោលគឺ កាលពីខែកញ្ញាឆ្នាំមុន រូបិយប័ណ្ណអង់គ្លេសបានធ្លាក់ថ្លៃ ដល់កម្រិតទាបរយៈពេលប្រាំឆ្នាំ គឺ១,០៨ដុល្លារអាមេរិក បន្ទាប់ពីរដ្ឋាភិបាល បានដាក់ចេញផែនការកាត់បន្ថយពន្ធ និងបន្ទុកលើបំណុលក្រោមរដ្ឋបាល គ្រប់គ្រងរយៈពេលដ៏ខ្លី របស់អតីតនាយករដ្ឋមន្ត្រី Liz Truss ។
យោងតាមក្រុមអ្នកវិភាគបានឱ្យដឹងថា តម្លៃផ្ទះនៅចក្រភពអង់គ្លេសក៏បានស្ថិតនៅក្រោមសម្ពាធ ចាប់តាំងពីធនាគារអង់គ្លេស (BOE) បានចាប់ផ្តើមរឹតបន្តឹងរូបិយវត្ថុនៅចុងឆ្នាំ២០២១។
យោងតាមទិន្នន័យចុងក្រោយ របស់រដ្ឋាភិបាលបានឱ្យដឹងថា នៅក្នុងខែកុម្ភៈ តម្លៃផ្ទះជាមធ្យមនៅចក្រភពអង់គ្លេស បានធ្លាក់ចុះក្នុងរយៈពេល៣ខែជាប់ៗគ្នា។
ដោយសារកម្រិតអតិផរណាប្រចាំឆ្នាំ មានអត្រាប្រហែល១០ភាគរយ ចាប់តាំងពីខែកក្កដា ហើយធនាគារកណ្តាលអង់គ្លេស (BOE) ទំនងជាបន្តដំឡើងអត្រាការប្រាក់ ក្នុងរយៈពេលដ៏ខ្លីខាងមុខនេះ តម្លៃផ្ទះត្រូវបានគេព្យាករណ៍ថា នឹងធ្លាក់ចុះបន្ថែមទៀត៕